Економија
Управата за јавни приходи го одбележа денот на даночните обврзници
Управата за јавни приходи по 26 пат го одбележа Денот на даночните работници „Св. Матеј“, и 76 години од воспоставување на даночен систем.
Настанот го отвори и пред присутните се обрати Директорката на Управата за јавни приходи, Сања Лукаревска, која во пресрет на 30 годишниот јубилеј идната година испрати силна порака дека УЈП не е само институција која се грижи за приходната страна во Буџетот, туку е и основата на сите општествени процеси , двигател на економските текови, партнер на даночните обврзници. Лукаревска рече дека даночните работници и УЈП се присутни во сите можни евиденциски процеси, и се клучот за размена на податоци со, институциите, координирајќи ги важните процеси во даночната сфера, борбата против корупцијата и во реформската агенда.
Таа говореше и за соработката со Светска Банка, ММФ и US Treasury како и за работните процеси кои се случуваат во Управата за јавни приходи.
„Соработката со Светска Банка ќе се круниса со нов Интегриран Даночен Информационен Систем, што ќе ја зголеми ефикасноста, ефективноста и ажурноста на сите услуги, процеси, тековни активности , од една страна, а од друга страна тоа ќе има свој ефект и во процесот на наплатата и во сузбивање на даночното затајување .Врз основа на тој процес, формирани се работно тело и два комитети за усогласеност и реформи. Неизбежно е да ја споменеме и Е – фактурата , чија реализација несомнено ќе не позиционира во трката за развој и модернизација со даночните управи од регионот и пошироко . Со овој проект, голема помош ќе имаат сите и бизнис заедницата, државните институции и граѓаните. “-рече Лукаревска
Директорката на УЈП во своето обраќање истакна дека сметководителите се едни од најголемите корективи на институцијата.
,,Нема критика која не сме ја земале во предвид, нема сугестија на која не сме и посветиле соодветно внимание, не постои било кој нивен проблем што заеднички не сме го разгледувале. Дали сме направиле доволно ,сеуште не. Но само со меѓусебна поддршка и добронамерност и во иднина ќе продолжиме да ја цврстиме меѓусебната доверба. Нивните критики не мотивираат уште повеќе да продолжиме кон нашата модернизација и трансформација. – рече Лукаревска
Министерот за финансии, Фатмир Бесими, во своето обраќање рече дека УЈП ја има поддршката на Министерството за финансии во процесот на имплементација на модерни, дигитализирани услуги.
„Ќе продолжиме и понатаму, преку блиска соработка со Управата за јавни приходи, заеднички да работиме на реализација на низа приоритети во даночната сфера, меѓу кои и континуирано унапредување на даночното законодавство, зголемување на ефикасноста и ефективноста во прибирањето на даночните приходи, борба против неформалната економија, зголемување на транспарентноста на даночниот систем и зајакнување на соработката со министерствата за финансии и даночните администрации од регионот и пошироко“, посочи министерот Бесими и додаде дека даночните работници имаат една од најзначајните улоги во проведување на словото на даночните закони и борбата со неформалната економија.“ – истакна министерот за финансии Фатмир Бесими.
Премиерот Димитар Ковачевски, упати честитки за посветеноста во работењето на вработените во УЈП, а во своето обраќање го потенцираше партнерскиот однос кој Управата за јавни приходи го гради низ годините со даночните обврзници, институциите и меѓународните организации.
„Управата за јавни приходи има многу значајна улога за државата како целина и во таа насока ги охрабруваме чекорите и новитети кои се воведуваат, како дигитализација на услугите и модернизација на процесите.
Заедно со нас, спроведувате ефикасен, транспарентен и праведен даночен систем и даночна политика преку наплатување даноци, градејќи партнерски однос со даночните обврзници. Ви честитам за вашата посветеност во работењето и високиот квалитет на услугите за даночните обврзници со цел навремено и точно исполнување на обврските и праведно и ефикасно собирање на даноците и на јавните давачки. Тоа е клучно за функционирањето на една држава и значи средства за изградба на темелите на општеството како инфраструктура, образование, здравство, заштита на животната средина, одржување на јавниот ред и мир и се останато од интерес на граѓаните“, порача претседателот на Владата на Република Северна Македонија, на денешното одбележување на Денот на даночните службеници Свети Матеј.
При тоа, премиерот Ковачевски потенцира дека показател за успешната работа на УЈП како една од најзначајните институции се и последните бројки за наплата на даноците.
„Во периодот од јануари заклучно со ноември 2023 година, остварен е вкупен даночен приход од над 1,6 милијарди евра, што е зголемување за 7,62% од остварениот даночен приход за истиот период во 2022 година. Пораст на наплатата е регистрирана и во ноември годинава, кога истата изнесувала над 163 милиони евра што е реализација од 111% од планираниот вкупен приход за ноември, односно за 42% поголема наплата од ноември 2022 година.
Владата креира позитивни политики и затоа успеавме да постигнеме ефикасност, големите даночни обврзници од почетокот на годинава заклучно со ноември да учествуваат со 43,5 проценти во вкупно наплатените даноци во државата“ – посочи премиерот Ковачевски на настанот.
Во рамки на настанот а по повод Денот на даночните работници „Св. Матеј“, беа доделени и Плакети за успешната соработка на Управата за јавни приходи со меѓународни и домашни институции а беа врачени и Пофалници за вработените.
На настанот присуствуваа претставници на дипломатскиот кор и на Владата, на меѓународни организации со кој соработува УЈП, директори на повеќе институции, градоначалници, медиумски работници и други значајни личности од општествениот живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Нацевска: Кога плаќањата се извршуваат без напор, економијата расте со доверба
„Единствената област за плаќања во евра, СЕПА, веќе е дел од нашата реалност. Тоа не е само симбол, туку и услуга. Преку пониските трошоци, брзината и едноставниот сет информации потребен за извршување на плаќањето, граѓаните и компаниите од нашата земја веќе ги чувствуваат придобивките кога испраќаат пари или кога плаќаат снабдувачи во странство или, пак, кога примаат дознаки од странство“, порача вицегувернерката на Народната банка, Емилија Нацевска, во завршното обраќање на 16. конференција за плаќањата и пазарната инфраструктура, одржана под наслов „Преповрзување на плаќањата во дигиталната ера“.
Вицегувернерката истакна дека следниот приоритет е развивањето и воведувањето инстант плаќања, како нова навика, а не само можност. „Целта е практична – да можете да платите и да ви биде платено за неколку секунди, во секое време (24/7/365), преку безбеден систем и со сигурно порамнување преку централната банка“, рече Нацевска, додавајќи дека меѓусебното поврзување на платните системи на земјите од Западен Балкан, како и со европскиот ТИПС ќе придонесе за побрза економска интеграција на регионот во Европската Унија.
Покрај СЕПА и инстант плаќањата, во фокусот на Конференцијата беа и отпорноста и довербата во платните системи, како предуслов за стабилност, којашто е неопходна за непречено функционирање на економијата. Нацевска истакна дека размената на искуства, тестирањето и координираното реагирање при инциденти се клучот за одржувањето на довербата на јавноста.
Посебно внимание ѝ беше посветено на улогата на финтек-компаниите и на небанкарските даватели на платежни услуги, коишто веќе се рамноправен дел од системот. „Тие носат брзина, практичност и конкуренција, но со тоа и одговорност за заштита на корисниците и податоците“, нагласи таа.
Во однос на иновативните решенија и регулативата, вицегувернерката порача дека тие не треба да се гледаат како спротивности, туку дека регулаторите треба да создадат простор за нови идеи, но и да обезбедат сигурност на плаќањата и заштита на клиентите, бидејќи рамнотежата меѓу иновацијата и стабилноста е исклучително важна, рече Нацевска, нагласувајќи ја важноста на пропорционалноста во регулирањето, заради обезбедување еднакви правила и правични услови за сите учесници на пазарот.
Во своето завршно обраќање, Нацевска потсети дека ако на претходната конференција се зборуваше за планови, оваа година веќе се истакнуваат конкретни резултати и реални решенија.
„Се движиме во вистинската насока – од дизајн кон услуга, од концепти кон видливи придобивки“, заклучи вицегувернерката, изразувајќи им благодарност на сите учесници, партнери и организатори на Конференцијата за нивните идеи, соработка и посветеност во градењето подобар и посигурен платен екосистем.
Економија
Истече рокот за поднесување и плаќање на ДДВ обврските за третиот квартал
Управата за јавни приходи ја информира јавноста дека заклучно со 27 октомври 2025 година, кога истече законскиот рок за поднесување на ДДВ-04 пријавите и плаќање на даночниот долг за третиот квартал од 2025 година, сè уште постојат даночни обврзници кои не ги исполниле своите законски обврски.
Според евиденцијата на УЈП, остануваат неподнесени 2.209 тримесечни и 146 месечни пријави, како и 7.436 тримесечни и 1.270 месечни даночни обврзници кои не го извршиле плаќањето на пријавениот даночен долг. Редовноста во исполнувањето на обврските е знак на одговорност и доверба, вредности што заеднички го градат системот во кој сите учествуваме и веруваме.
Управата за јавни приходи веќе достави персонализирани известувања до сите обврзници со пријавен, а ненаплатен долг за соодветниот даночен период.
Во тек е спроведување на активности и мерки во координација со сметководителите и обврзниците, со цел да се избегнат блокади на сметки и дополнителни трошоци за присилна наплата. Важно е да се внимава на роковите, бидејќи за секој ден на задоцнување се пресметува камата во износ од 0,03% од преостанатиот долг, како и изрекување на дополнителни глоби. Оттука, потсетуваме на обврската за точно, целосно и навремено плаќање на поднесените ДДВ-04 пријави. По доставата на опомените, Управата ќе пристапи кон присилна наплата кај сите обврзници кои нема да го подмират долгот доброволно. УЈП апелира до сите засегнати обврзници да постапат одговорно и навремено, со цел да се обезбеди стабилна даночна историја и да се избегнат непотребни последици. За дополнителна помош и поддршка, даночните обврзници и сметководителите можат да се обратат преку е-пошта на [email protected] или телефонски на 0800 33 000 (од фиксен) и 02 3253 200 (од мобилен). Вашата дисциплина денес е вашата предност утре.
Економија
„Реплек“ на најпрестижниот саем за фармација CPHI – потврда за конкурентноста, квалитетот и интернационалниот потенцијал
Портфолиото на фармацевтската компанија „Реплек“ и оваа година предизвикува голем интерес на CPHI саемот за фармација, кој од 28-ми до 30-ти октомври се одржува во Франкфурт, Германија, под мотото „Ја обликуваме иднината на фармацијата“. CPHI саемот е собир на глобалните лидери во фармацијата и во неговите рамки се презентираат иновациите во индустријата.
„Реплек“ го презентира своето производно портфолио – фармацевтски производи и козметика, а значително внимание предизвикуваат производите на компанијата на база на канабис, за кои интересот континуирано расте. Во рамките на саемот, менаџментот на компанијата остварува бројни средби за проширување на соработката и освојување на нови пазари и понатамошно унапредување на позициите кои се градени 80 години, јубилеј кој годинава го одбележува компанијата.
„‚Реплек’ континуирано вложува во дигитализација, иновации, лансирање на нови производи, како и во проширување на пласманите. Наша стратешка цел е продлабочување на постојните партнерства и склучување нови, со цел ширење на компанијата и на пазарите каде што досега не сме биле присутни. Со воведувањето напредни технологии и иновативни решенија во портфолиото, нашите производи и брендови сѐ повеќе го освојуваат меѓународниот фармацевтски пазар, на кој ја потврдуваме нашата позиција како конкурентен производител, но и како сигурен и доверлив партнер. Нѐ радува фактот што реномирани компании од Европската унија, Јужна Америка и Азија го потврдуваат интересот и веќе имаме најава за проширување на соработката. Дополнително, саемот е одлична можност за привлекување потенцијални партнери не само за извоз во регионот и пошироко, туку и за истражување на интересот за Реплек како регионален дистрибутер и партнер за продажба и маркетинг на Балканот“, изјави Душан Пецовски, генерален директор на „Реплек“.
Во рамките на саемот, заедно со меѓународните партнери, „Реплек“ ќе го одбележи и својот 80-годишен јубилеј. CPHI покажува дека долгогодишната фармацевтска традиција е нешто што високо се вреднува на меѓународниот пазар, ја зголемува довербата во компанијата и нејзината конкурентност. Континуираното сертифицирање со EU GMP сертификатот за добри производни практики е уште еден аспект кој значајно влијае на конкурентноста на компанијата на меѓународниот пазар.
CPHI е највлијателниот светски фармацевтски настан, кој годинава се одржува по 36 пат, а свое учество на саемот имаат најзначајните фармацевтски компании. Оваа година саемот на едно место собра повеќе од 62.000 професионалци и експерти од над 166 земји, а нивните предавања за најновите достигнувања во областа на фармацијата предизвикуваат огромен интерес. Присутни се и 2.400 изложувачи од целиот свет. Саемот секоја година се одржува на различна локација. На овој престижен настан компаниите од фармацевтскиот сектор од целиот свет имаат можност за промоција на своите портфолија, како и презентација на нивните иновативни производи и брендови.
Компанијата „Реплек“ околу 75 отсто од своите производи ги пласира на странските пазари, во повеќе од 25 држави во Европската Унија, Централна и Југоисточна Азија, како и во регионот Адрија. Најголема потврда за високиот квалитет и конкурентноста на производите на компанијата која има 80-годишна традиција, е фактот што голем дел од нив на некои од пазарите се во рангот на најпродаваните.
„Реплек“ континуирано инвестира во модернизација и унапредување на своето производно портфолио, со цел зајакнување на своите пазарни позиции. Во таа насока е и значајното двојно меѓународно признание кое компанијата го доби минатиот месец, односно двата EAEU GMP сертификати, кои се резултат на инспекции кои потврдуваат дека производствените процеси и системот за квалитет на „Реплек“ се целосно усогласени со принципите за добра производна пракса регулирани за Евроазиската економска унија. Овие сертификати се потврда за високите стандарди што се применуваат во секоја фаза од работењето и постојаното подобрување на квалитетот на секој чекор, од развојот и производството, до финалната дистрибуција.
(ПР)

