Економија
Уште една хуманитарна акција на Credissimo

По повод месецот на розoвата панделка, Credissimo донираше 60.000 ден.
За да го поддржи и одбележи месецот посветен на борба против ракот на дојка, Credissimo спроведе хуманитарна акција ,,Да донираме заедно”, во која ги повика да се вклучат сите општествено одговорни граѓани, кои со само еден коментар на нивен пост на социјалните мрежи донираа по 50 денари.
Сумата од сите коментари, во вкупен износ од 60.000 денари, Credissimo ја донираше на невладиното Здружение „Езра”, кое поттикнува иницијативи за развој во здравството и за подобрување на здравствените услуги.
Собраните средства се за активностите на здружението ,,Езра” кое има за цел да ги подобри здравствените услуги и да ги застапува онколошките пациенти. Ваквите иницијативи се круцијален дел за зголемување на општествената свест кај граѓаните.
Како дел од оваа кампања, а со цел да се подигне свеста за важноста од редовни прегледи и контроли, навремено барање лекарска помош, како и да се едуцираат жените за превенцијата и лекувањето, Credissimo организираше мамографски преглед за сите жени вработени во компанијата.
На годишно ниво, во последните 5 години се дијагностицирани 7,8 милиони случаи на рак на дојка кај жените. Раното откривање на ракот на дојката е најдобра превенција и претставува клучен дел за успешно лекување.
Ова не е прва акција на Credissimo, која како општествено одговорна компанија постојано се залага и вложува во кампањи за поддршка и развој на здравствениот систем во Македонија. Здравјето и здравствената свест треба да бидат еден од главните приоритети за сите поединци и компании, како би се изградило цврсто, стабилно и функционално општество.
Имајќи предвид дека борбата со ракот на дојка како и другите видови на рак, не завршува со крајот на октомври како светски месец за рак на дојка, средствата од донацијата ќе бидат наменети за повеќе клучни активности кои ги организира нашето здружение во рамките на овогодишната програма на кампањата.
Подигнувањето на свеста за важноста за раното откривање на ракот на дојка е клучно, но исто така е многу важно обезбедување на директна поддршка за новооперираните пациентки од рак на дојка и лобирање за обезбедување на подобрени услуги и пристап до терапии за сите пациенти кои се борат со оваа болест – изјави Емануела Додева претседателка на здружение „Езра”.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.