Економија
ФИТР ги награди 6-те најуспешни иницијативи за поттикнување на младите во истражување и иновации во Западен Балкан

Фондот за иновации и технолошки развој денеска ги додели наградите од повикот „Натпревар за успешни иницијативи од Западен Балкан” на кој шест најуспешни иницијативи добија награда во вредност од 18.000 евра, како признание за напорите и успехот во создавање на вредности и нови можности за младите во Западен Балкан.
Покрај паричната награда, шесте наградени ќе бидат вклучени во петмесечна комуникациска кампања преку социјалните медиуми, со цел подигнување на јавната свест за улогата и важноста на младите во иновациските процеси. Наградите се дел од европскиот проект POLICY ANSWERS во кој Фондот ја доби главната улога во пилотирање на мерки за поддршка за истражување, развој и иновации во сите економии од Западен Балкан.
Главниот добитник на награда во вредност од 8.000 евра е иницијативата „Одржливо управување со електронски отпад – услуга за поправка и правилно отстранување на oтпад од електрична и електронска опрема во Источна Македонија”. Се работи за платформа која им овозможува на младите да се стекнат со знаења, вештини и практични исуства во сферата на циркуларна економија и поттикнување на еколошка одговорност.
Преку проектот се собрани 1500 кг отпад од електрична и електронска опрема, од кои 90% се дијагностицираат и селектираат, а 10% се враќаат во употреба. Кампањата за подигнување на јавната свест придонесе за зголемено учество од 50% во локалните акции за чистење и селекцијата на електронскиот отпад. Со обука за електронско поправање на различни електронски уреди беа обучени 6 млади луѓе, со што се отворија можности за вработување и пракса во зелени работни места.
„Овие награди претставуваат дел од пошироката визија на ФИТР за поддршка на младинскиот потенцијал и регионалната соработка. Денес ја славиме вашата храброст, труд и верба дека иновациите можат да направат вистинска разлика. На сите тимови и млади лидери кои беа дел од ова патување – ви благодарам за вашата страст. Сигурен сум дека вашите идеи ќе имаат значајно влијание во иднина” истакна директорот на Фондот за иновации и технолошки развој Никола Додов во своето обраќање кон финалистите на натпреварот.
Покрај главната награда, беа доделени уште пет награди од 2.000 евра на иницијативи кои демонстрираа влијателност и ангажман на младите во клучни општествени предизвици, и тоа: „Лансирање на кариера”; „Вовед во Индустрија 4.0 во Босна и Херцеговина преку знаење”; „ТвојаРабота II – Младите ја надминуваат невработеноста на регионално ниво преку можности за работа на Балканот”; „Награда за социјално влијание (SIA)” и „Фашиорејшн”.
Натпреварот се организираше во периодот од 18 февруари до 18 април 2025 година, на кој пристигнаа вкупно 65 иницијативи од економиите на Западен Балкан. Во финална селекција беа одбрани 12 иницијативи кои ги презентираа своите проекти пред жири комисија, кои ја донесоа и финалната одлука за избор и селекција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.