Економија
Годинава, 43 отсто повеќе туристи патувале во светот за разлика од лани

Во светот од почетокот на годината до крајот на јули патувале 700 милиони туристи или 43 отсто повеќе од истиот период во 2022 година, тоа е 85 отсто од туристите од 2019 година, а до крајот на 2023 година тој број може да се зголеми на речиси 95 отсто, се новите податоци и прогноза на Светската туристичка организација.
Пренесувајќи ги податоците од новото издание на својот светски барометар, Светската туристичка организација истакнува дека помеѓу јануари и јули 2023 година, Блискиот Исток, Африка и Европа се најблиску до 2019 година во однос на бројот на меѓународни пристигнувања на туристи.
Во исто време тие сметаат дека е важно побарувачката за туризам да не се намалува, туку да се зголемува и, според Светската туристичка организација, да покаже одржливо закрепнување.
За јули, Светската туристичка организација нагласува дека од крајот на пандемијата тој е најпрометниот туристички месец во светот со 145 милиони меѓународни патници, што покажува дека туризмот силно закрепнува во сите делови на светот, но и се приспособува на новите околности и побарувачката.
Новото издание на светскиот барометар на Светската туристичка организација открива дека единствениот регион во светот што го надминал резултатот од 2019 година во седумте месеци од 2023 година бил Блискиот Исток, со 20 отсто повеќе меѓународни туристички пристигнувања, а потоа следуваат Африка и Европа со 92 и 91 процент, соодветно.
За седум месеци од 2023 година, Северна и Јужна Америка достигнаа 87 отсто од туристичките пристигнувања од 2019 година, а за Азија и Пацификот, Светската туристичка организација вели дека, според достапните податоци, закрепнувањето на туризмот исто така се забрза на речиси 60 отсто од нивото на пристигнувањето на странски туристи пред пандемијата.
Врз основа на податоците и информациите на пазарот, Светската туристичка организација предвидува дека до крајот на 2023 година меѓународниот туризам би можел да достигне 95 отсто од нивото на меѓународни туристички пристигнувања пред пандемијата.
„Изгледите за последниот квартал од оваа година укажуваат на продолжување на закрепнувањето, но со поумерено темпо по шпицот на летната сезона. Повторното отворање на Кина и другите азиски пазари и дестинации се очекува да продолжи да го поттикнува патувањето“, велат од Светската туристичка организација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Објавен јавен повик за финансиска поддршка за набавка на трактори

Министерството за земјоделство, шумарство и водостопанство објави јавен повик за доставување на барања за користење на средства од Програмата за финансиска поддршка на руралниот развој за 2025 година, наменет за модернизација на земјоделските стопанства преку набавка на трактори.
Максималната поддршка по корисник изнесува 600.000 денари, поддршката се исплаќа на годишно ниво според реализацијата на деловниот план.
Јавниот повик се однесува исклучително за набавка на трактори – приклучната земјоделска механизација не е покриена.
Право на користење на средствата имаат земјоделски стопанства кои се запишани во Единствениот регистар на земјоделски стопанства во Министерство за земјоделство, шумарство и водостопанство, согласно Закон за земјоделство и рурален развој.
Земјоделци кои во претходните десет години користеле финансиска поддршка за набавка на трактори преку ИПАРД Програмата или Националните програми за рурален развој, не се прифатливи како корисници на оваа мерка.
Крајниот рок за доставување на барањата е 07.07.2025 година.
Економија
Берзите реагираат бурно на расправијата Трамп-Маск, акциите на „Тесла“ паѓаат

На Вол Стрит, берзанските индекси паднаа, главно поради наглиот пад на цената на акциите на „Тесла“, додека пазарот беше поддржан од веста за разговорот помеѓу американскиот и кинескиот претседател Доналд Трамп и Си Џинпинг. Индексот Дау Џонс падна за 0,25 проценти на 42.319 поени, додека S&P 500 се лизна за 0,53 проценти на 5.939 поени, а индексот Nasdaq падна за 0,83 проценти на 19.298 поени.
Акциите на Тесла паднаа за 14 проценти
Цената на акциите на производителот на електрични автомобили „Тесла“ падна за повеќе од 14 проценти, откако јавната расправија помеѓу извршниот директор Илон Маск и Трамп се интензивираше.
Цената на акциите падна во четири од последните пет трговски дена, откако Трамп и Маск ја започнаа својата вербална војна, за време на која „Тесла“ изгуби околу 150 милијарди долари пазарна вредност.
Маск ги засили критиките кон огромниот закон за даночни стимулации на претседателот во последните денови, додека Трамп тврди дека Маск е вознемирен затоа што законот ги елиминира даночните олеснувања за купување електрични возила.
„Последиците за акциите на ‘Тесла’ се очигледни. Но, не гледам никакви значајни последици за остатокот од пазарот, освен мало влијание врз индексите. Генерално, берзата има многу проблеми, но ‘Тесла’ не е еден од нив“, рече Марк Шпигел, менаџер за портфолио во Stanphyl Capital.
Сепак, пазарот беше поддржан од телефонскиот повик меѓу Трамп и Си. Нема дополнителни информации за разговорите, освен дека тие се поканија еден со друг на официјални посети. И тоа беше оценето како позитивно од пазарот, бидејќи неодамнешниот спор околу клучните минерали се закани да го наруши кревкото трговско примирје меѓу двете најголеми економии во светот.
Економија
АД ЕСМ со најповолна понуда за електрична енергија, соопшти „ЕВН хоме“

ЕВН Хоме како универзален снабдувач на електрична енергија, на тендерот за набавка на електрична енергија за задоволување на потребите на корисниците за периодот јули-декември 2025 доби најповолна понуда од АД ЕСМ со купопродажна цена на електрична енергија од 62 евра за мегаватчас, за покривање на 100% од вкупно планираните количини, соопштија од таму.
Оваа цена, како што појаснуваат, е идентична со претходната која беше добиена на последниот тендер на Универзалниот снабдувач (јануари-јуни 2025), кога АД ЕСМ понуди купопродажна цена од 62 евра за мегаватчас.
„Под комплетен надзор на Регулаторната комисија за енергетика и согласно законските обврски и претходно утврдената методологија, во наредниот период ЕВН Хоме ќе ја пресмета цената на електрична енергија по однапред утврдени влезни параметри.
Како и секогаш, во крајната цена влегуваат: цената по која АД ЕСМ ја продава електричната енергија на ЕВН Хоме, цената на Преносниот систем оператор МЕПСО, цената на Операторот на пазар на електрична енергија МЕМО, како и цената на Дистрибутивниот систем оператор Електродистрибуција“, се истакнува во соопштението.