Премиерот Зоран Заев заедно со министерот за земјоделство, шумарство и водостопанство, Арјанит Хоџа, директорот на Агенцијата за финансиска поддршка во земјоделството и руралниот развој, Никица Бачовски, како и Весна Ивановиќ-Кастаред, раководителката на „Ју-ен жени“ (UN Women), тело на ОН за родова еднаквост и зајакнување на жените, во Градскиот парк во Скопје, заедно со претставници на Националната федерација на фармерите, присуствуваше и се обрати на доделувањето на 11 од вкупно 250 договори за грант од програмата „Рурални жени“ на Министерството за земјоделство, шумарство и водостопанство, што ја спроведува Агенцијата за финансиска поддршка во земјоделството и руралниот развој.

Истакнувајќи ја целта на мерката „Поддршка за активен женски член во земјоделското домаќинство“, која е во насока на подобрување на целокупните резултати од работењето на земјоделското стопанство и достигнување повисоки стандарди за подобрување на квалитетот на земјоделско производство и за намалување на трошоците во работењето, премиерот Заев им честита и им посака успех на претприемачките, кои ќе добијат финансиски грант во висина од 180.000 денари за набавка на опрема, која ќе им помогне во нивните досегашни и идни активности.

„Владата, Министерството за земјоделство, шумарство и водостопанство и Министерството за труд и социјална политика ќе ги направат сите неопходни чекори за остварување на определбите утврдени во декларацијата за подобрување на економскиот и социјалниот статус на руралните жени. Институциите работат во насока на подобрување на економската и социјалната положба на жените во руралните средини преку зајакнување на ефективноста и влијанието на националните програми за финансиска поддршка на земјоделството и руралниот развој, законите и стратегиите од областа на родовата еднаквост, недискриминацијата, земјоделството, руралниот и социјалниот развој“, посочи премиерот Заев.

Министерот за земјоделство, шумарство и водостопанство, Арјанит Хоџа, изрази задоволство од поттикот и храброста што се јавуваат кај жените од руралните подрачја, како вистински носители на земјоделските семејства и кои искористувајќи ги мерките, ги јакнат позициите во општеството и водат кон подобрување на социјалната реалност.

Премиерот Зоран Заев по посета на Технолошко-индустриската развојна зона во Тетово изјави дека се реализира уште една значајна инвестиција за нашата земја.

„Денес се поставува камен-темелникот на новата заедничка инвестиција на американската компанијата ‘Леар’ и ‘Нормак инвестмент груп’ тука во Технолошко-индустриската развојна зона во Тетово. Инвестицијата на новиот втор циклус изнесува 15 милиони евра, а производниот погон се гради на површина од 8.000 м2. Со оваа инвестиција се отвораат нови од 1.000 до 1.500 работни места“, изјави Заев.

Тој додаде дека и во услови на пандемија Владата силно се залага за одржување и зајакнување на економската активност и ги поздрави плановите на инвеститорот до ноември 2021 година да биде завршена и втората фаза од инвестицијата.

„Ваквите големи инвестиции се поддржани од државата и инвеститорите имаат поволности и низа олеснувања во повеќе фази на процесот на инвестирањето. За сметка на тоа, овие инвестиции даваат голем придонес за локалниот регион во контекст на вработување, развој на човечкиот капитал, дополнително ја подобруваат извозната структура, креирајќи производи со повисока додадена вредност. Исто така, го подобруваат технолошкото ниво на економијата, а се подобрува и пристапот до меѓународните пазари на капитал“, потенцира Заев.

На поставувањето на камен-темелникот на новата инвестиција присуствуваа и првиот вицепремиер Артан Груби, министрите за финансии и за надворешни работи, Фатмир Бесими и Бујар Османи, а се обрати и министерот за економија, Крешник Бектеши, кој ја поздрави новата инвестиција.

„Ваквите инвестиции и инвеститори што продолжуваат да ги шират инвестициите во земјата уште еднаш ни докажуваат дека сме на вистинскиот пат како Влада во привлекувањето и поддршката на странските инвеститори. Тоа значи дека ќе се зголеми вработеноста во овој регион. Сакам да најавам дека засилено работиме на измени и дополнувања на Законот за финансиската поддршка на инвестициите, со што во наредниот период дополнително ќе се зголеми поддршката, а ќе се олеснат условите за сите инвеститори во земјата и новина е што финансиската поддршка ќе биде фокусирана и на рамномерниот регионален развој“, изјави Бектеши.

Американската компанија „Леар“ е меѓу светските лидери за производство на седишта на возила со високи перформанси, водечки во оваа индустрија, истакнуваат надлежните.

Информациските и комуникациски технологии доколку се користат на соодветен начин можат да придонесат за значително подобрување на квалитетот на живот, работа и создавање нови вредности, со што повеќекратно се оправдуваат напорите за имплементација на овие технологии, вели Саша Огненовски од ИКТ комората на Македонија, во однос на полемиките кои се водат во јавноста околу воведување дигитализација на учебниците во образовниот процес.

Тој додава дека овој став ИКТ комората го афирмирала и промовирала во изминатите десетина години со цел овие технологии да станат дел од институционалните политики со ставање особен акцент на нивната важност за унапредување на процесот на образование. Но, како што вели, досега немало значаен и квалитен напредок на ова поле.

„ Дигитализацијата придонесува за трансформација на економијата, владеењето и на општеството преку усвојување на постојните и на новите дигитални технологии. Дигитализирање на образованието, пак, значи засилување на процесите на учење со технологија. Се предвидува дека дигитализацијата во високото образование ќе овозможи квалитетен напредок, со овозможување на образование достапно за сите, но внимателно треба да се пристапува кога се во прашање основното и средно образование. Квалитет може да се постигне единствено доколку процесот се обликува да биде прифатлив за сите засегнати страни, бидејќи воведување на овие нови процеси во образованието ангажира и дополнителни средства за сите вклучени“, изјави Огненовски.

Од ИКТ комората истакнуваат дека дигитализација на образовниот процес треба да се реализира во поинаков процес, кој ќе биде инклузивен, со вклученост на сите засегнати страни со цел креирање најдобри можни решенија кои нема да се соочат со проблеми при имплементација.