Култура
„ДромФест – КултурДром во вашиот дом“

Првпат во општина Аеродром се оддржува културно-уметничка манифестација, која во себе содржи: музика, театар, улични артисти, поезија, базар на ракотворби, со единствена цел збогатување на културно-уметничкиот живот на жителите на Аеродром и сите други посетители.
Зошто „ДромФест“?
Затоа што заедница без уметност и култура е мртва заедница
Затоа што уметноста и вдахнува живот на заедницата
Затоа што уметноста е потребна секому, а достапна е само некому
Затоа што најголемата скопска општина речиси и да нема манифеатации од културата
Затоа што Аеродром има најголем број музичари, актери, уметници, поети, писатели, ракотворци…
Затоа што нема простор, сцена, локација, објект за културни настани
„ДромФест“ – музички фестивал
16 декември, од 17 до 24 часот, на платото зад „Капитол мол“
Настапуваат:
Ласт експедишн, Лоши Деца, Лара Иванова, No Name Nation, Пајак, Cruel, Sol Nocivo, Коноп бенд и Диџеј Жолти Ман
„ДромФест“ – базар на ракотворби
17 и 18 декември, од 10 до 20 часот во ТЦ „Бисер“
На базарот на ракотворби ќе бидат изложени ракотворби (филигран, слики од срма, врамени везови со македонски фолклор, рачно работени кукли, рачно работен накит, плетени додатоци за облека, новогодишни рачно работени украси….) од членките на Здружението на домаќинките на Македонија.
„ДромФест“ – детска програма
17 декември, од 12 до 14 часот, во „Капитол мол“, на приземје и на втори кат
Пантомима шоу со единствениот Кирил Трајковски-Максим
Интерактивна претстава за деца со многу забава, хумор и едукативна програма преку техники на пантомимата.
Претстава со жонглери и акробати од „Фазбабл“
„ДромФест“ – театар
17 декември, од 20 часот, во „Капитол мол“, на трети кат, ќе се одржи театарска претстава „Пациенти“ на театар „Провокација“.
Не пропуштајте ја урнебесната комедија „Пациенти“
Режија: Ѓорѓи Ризески
Играат: Роберт Ристов, Мирјана Ристов и Радо Алексовски
„ДромФест“ – „СтихоДром“
18 декември, од 18 часот, во „Капитол мол“, на втори кат, ќе се одржи поетското читање
„СТИХОДРОМ: врзете се, поетуваме!“, што Скопскиот поетски фестивал го организира во соработка со „ДромФест – КултурДром во вашиот дом“, на кој ќе настапат дванаесет поети од општина Аеродром, поддржани со диџеј-сет на Кристијан Јордановски.
Посетителите ќе имаат можност да слушнат поезија од: Андреј ал-Асади, Иван Антоновски, Јулијана Величковска, Диме Данов, Искра Донева, Светла Јакшиќ, Живко Новески, Лилјана Пандева, Димитар Пандев, Дијана Петкова, Глигор Стојковски и Виолета Танчева-Златева.
„ДромФест“ – школа за гитара „Бојкоски“
18 декември, од 16 до 17.30 часот, во „Капитол мол“, на втори кат
Малите виртуози од Школата за гитара „Бојкоски“, ќе приредат незаборавно музичко патување низ класиката, џезот, забавната, рок и народна музика.
Ристе Бојкоски e македонски уметник, виртуозен гитарист и професор во Школата за гитара „Бојкоски“.
Покровител на фестивалот е Општина Аеродром.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Најдобрите кадри ги правам кога снимам со камера од рака, вели Лустиг – кинематограферот на Вим Вендерс

Филмот „Совршени денови“ на Вим Вендерс беше синоќа беше прикажан во рамките на официјалната селекција Камера 300 на ИФФК „Браќа Манаки“, а кинематограферот на филмот Франц Лустиг денес одговараше на новинарски прашања и откри детали за работата на филмот, изборот на локациите.
„Снимав со камера од рака бидејќи така ги правам најдобрите кадри. Сметам дека статичната камера го губи контактот меѓу актерите и кинематограферот бидејќи треба да гледам на монитор. Со камерата од рака светлината некако се впива во кадарот и тоа може да се види на филмот“.
Од 1994 година Франц работи како директор на фотографија за реклами и музички видеа со некои од водечките режисери ширум светот, како Сем Браун, Гери Фридман, Сајмон МекКуид, Стјуарт Мекинтајр, Џонс и Тино, Мартин Амунд, Томас Јонсгарден, Начо Гајан, Даниел Клајнман, Ринган Ледвиџ, Тарсем и Ралф Шмерберг.
Во поглед на музиката во филмот рече дека најголем дел од песните во филмот биде додадени отпосле бидејќи бил мошне сложен и тежок процесот со добивање на авторските права. Според тоа како ги движи усните биле избрани други и дополнети.
-Песната на Нина Симон навистина ја пееше и тоа беше најтрогателниот момент. Плачевме додека снимавме, раскажа Лустиг.
Соработува со режисерот Вим Вендерс на три долгометражни филмови: „Земја на изобилството“, за кој ја освои наградата „Најдобра камера“ на Германските филмски награди; „Не доаѓај чукајќи“, за кој го заслужи признанието „Најдобар европски кинематографер“ во 2005 година; и „Пукање во Палермо“ од 2007 година.
-Додека снимаме Вим секогаш ги прикажува градовите онакви какви што се во моментот. На тој начин ги зачувува, бидејќи ако по 20 години одите во Палермо или во Токио сигурно тие нема да изгледаат исто. Но, со нашите филмови тие остануваат зачувани, рече Лустиг.
Неговата документарна работа е исто така важен сегмент во кариерата за него и ги вклучува филмот „2 или 3 работи што ги знам за него“ на Малте Лудин за животот и смртта на нацистичкиот татко на Лудин и документарниот филм „Танц за сите“ од 2008 година. Во 2012 година, Франц ја доби наградата Мобиус за „Најдобар кинематографер“.
Од селекцијата на кратки филмови, денеска беше претставена кинематограферката Сташа Букумировиќ, чиј филм „Нека цвета росно цвеќе“ беше вчера прикажано на 44. ИФФК „Браќа Манаки“. Станува збор за патување на една жена која во текот на патувањето ќе развие љубовна врска.
-Локациите се многу важни за овој филм, бидејќи сакав внатрешната емоција да ја доловам преку надворешните промени и тоа не беше толку тешко бидејќи во текот на снимањето се сменија сите четири годишни времиња во Црна Гора, раскажа Сташа.
Ерик Полума, кинематограферот на „Сончев часовник“ од документарната програма раскажа дека сценариото било мошне блиско на актерите и затоа не било сложено да се изведе.
Филмот „Трагата на дивечот“, за кинематограферката Бојана Андриќ бил шлаг на тортата, бидејќи е тоа периодот на седумдесеттите и за неа било многу инспиративно и направила истражување. Таа вели дека кинематограферите, особено кога се млади треба да ги прифаќаат сите искуства кои може да ги добијат, бидејќи има време за да избираат сценарија, за почеток за да научат да бидат кинематографери мора што повеќе да работата.
– Јас кога бев млада работев и на сапуници, така го изоштрив чувството за снимање.
За Фестивалот „Браќа Манаки“ слушала од своите професори уште додека студирала.
-Само најдобри зборови имаа моите професори за вашиот Фестивал. Оваа година има извонредно издание и посакувам нагорната линија да трае, рече Андриќ.
Култура
Свечено доделување на наградата „Анте Поповски – Антево перо“

Вечерва, во Музејот на македонската борба за самостојност во Скопје, со почеток во 19.30 часот, ќе се одржи централниот настан од годинешното, шесто по ред издание, на меѓународната поетско-културна манифестација „Анте Поповски – Антево перо“.
Присутните посетители ќе имаат можност да проследат видеоматеријали со кус рецитал на академик Анте Поповски, но и снимки од негови песни во интерпретација на артистката Софија Гогова-Врчаковска. Модератор ќе биде м-р Александра Јуруковска, ќе биде прочитана одлуката на жири-комисијата за наградите, а пред присутните ќе се обрати д-р Атина Цветаноска.
Манифестацијата се одржува во чест на творештвото на бардот на современата македонска поезија, академик Анте Поповски, и е поддржана со програмата за 2023 година на Министерството за култура.
По доделувањето на наградите, ќе се одржи и поетско читање, во кое, освен наградените автори, учество ќе земат и неколку други учесници на годинешниот конкурс.
Култура
„Бела ноќ“ во Националната галерија со Симон Шемов и Миле Корубин

Две големи и исклучително значајни изложби се поставени во репрезентативните објекти Даутпашиниот амам и во Чифте амам, со кои Националната галерија партиципира во програмата на манифестацијата „Бел ноќ“ за 2023 година. Ја информираме широката публика дека в сабота, 30 септември 2023, од 20 часот, до доцните вечерни часови, ќе имаат задоволство бесплатно да ги посетат двете поставки, програмски активности во рамките на одбележување на јубилејот – 75 години постоење на Националната галерија.
Симон Шемов „Мултиверзум“
Даутпашин амам, 27 септември – 27 ноември 2023
Симон Шемов е мултимедијален уметник, професор, истражувач, вљубеник во природата и космосот. Проектот „Мултиверзум“ ќе ги претстави неговите ликовни остварувања што се однесуваат на неколку тематики, кои се провлекуваат како јадро низ целиот негов животен опус, а тоа се истражување на универзумот, пантеизмот, архетиповите, детската игра, фолклорот итн.
Продолжувајќи ги вечните трагања по истражување на односите реално – имагинарно, простор – време, пропорции, релации, растојанија, Шемов создава една мошне моќна визуелна, просторна, звучна потрага по тајните на космосот, послана низ магичниот Даутпашин амам. Истражувањата и метафизиката на космосот Шемов ги разработува во повеќе медиуми од неговата специјалност – виртуозноста и единственоста во создавање дела од рачно изработена хартија, платна, цртежи, комбинирани техники, колажи, со што мултимедијалниот наратив добива уште повеќе транспарентност.
Миле Корубин, 1922 – 2000
Чифте амам, 28 септември – 27 октомври 2023
Поттик за организирање омаж посветен на Миле Корубин (роден на 28 септември 1922 година во Прилеп, а починал на 13 септември 2000 година во Скопје), еминентен македонски сликар, е одбележувањето на 100-годишнината од неговото раѓање. Овие јубилеи се базични поводи преку кои Националната галерија како институција, која седум и пол децении се грижи за чувањето и заштитата на дел од движното културно наследство од историјата на уметноста на нашата земја, континуирано ги презентира врвните национални културни достигнувања.
На оваа примарна визија, мисија и функција се надоврзуваат и заложбите за константно потсетување за особените специфики на значајните легати од творештвото на големите уметници од модерното македонско сликарство и скулптура преку селекција и претставување дела што се наоѓаат во повеќе државни и јавни институции од земјата, како и во приватни колекции.

Корубин Миле, Исчекување, 1968, масло на платно
Временскиот опсег од петдецениска творечка дејност го вбројува Миле Корубин меѓу најплодните македонски сликари, воедно и педагози. Неговата стварност, трансформирана низ сликарските визии, со специфичен ликовен ракопис, манифестира сопствена логика на патувањето од предметното кон непредметното, односно од конкретната реалност до апстрактното. Тенденциозно избегнувајќи ги трендовите, метафоричкиот лирски пристап се чувствува и се развива следејќи ја имагинацијата од конкретноста, па сè до геометриската асоцијативност. Притоа како константа секогаш доминираат потсвесно воспоставената хармоничност и редот на елементите во просторно смирената до блажено лебдечката композициска структура. Неговиот луциден сликарски јазик и урамнотежени ликовни ориентации се наклонети кон естетизацијата, редуцирањето на сликарскиот израз, отстапувањето од перспективата, ослободувањето на чистиот простор на атмосферата, кон егзотиката и мистицизмот преку лиризмот на чистата форма, што го издвојува како автор посветен на истрајноста и доследноста на сопствената мисла.