Култура
Почна петтото јубилејно издание на „Саксклар“, меѓународен фестивал по кларинети саксофон
На 30 мај 2022 година, со концертот на Горан Трајковски – саксофон и Маја Божиновска – пијано во Штип почна петтото јубилејно издание на „Саксклар“, меѓународниот фестивал по кларинети саксофон.
Фестивалот изминативе пет години е пример за една успешна музичка приказна и кој стана препознатлив бренд не само помеѓу кларинетистите и саксофонистите, туку во целата музичка и уметничка јавност кај нас и пошироко.
Како пример за тоа се многубројните концерти, семинари и натпревари во рамки на фестивалот, каде што покрај нашите најдобри кларинетисти и саксофонисти, настапија и повеќе светски имиња од сферата, како Матијас Мулер (Швајцарија), Детлеф Бенсман (Германија), Огњен Поповиќ (Србија), Јоргос Лигеридис (Грција), Драган Сремец(Хрватска), Вељко Кленковски (Србија), Матјаж Древеншек (Словенија), Жан Мишел Бертели(Франција).
Во изминативе пет години, „Саксклар“ од една дводневна манифестација лоцирана исклучиво во Скопје, прерасна во фестивал во вистинска смисла на зборот, кој опфаќа повеќе градови од републиката со повеќе од 10 настани (целини) во својата програма и како таков добива една уникатност во своето дејствување не само во државата туку и на територијата на целиот Балкан, па и пошироко.
Овогодишното јубилејно издание својата програма која е поддржана од страна на Министерството за култура на РСМ, ја реализира преку повеќе камерни концерти, и тоа во Штип, Кавадарци, Битола и Скопје.
Покрај Горан Трајковски и Маја Божиновска, имавме можност да чуеме прекрасни изведби на наши домашни уметници како Спире Јовановски и Верица Дивитарова, Ристо Ѓоревски, Весна Ѓиновска Илкова и Елена Атанасовска Ивановска, Лазар Соколов и Емилија Кабранова-Филипова. Но не помалку интересен оваа година е и изборот на странските гости.
Статис Мавроматис (Грција) и Давор Реба (Хрватска), двајца извонредни музичари, солисти и педагози со светско реноме, оваа година се одговорни за водењето на семинарите кои ќе се случат на 13 јуни во Скопје, на Факултетот за музичка уметност, и на 14 јуни во Државното музичко училиште во Битола.
Покрај образовната активност, присутните ќе имаат можност да уживаат и во нивните интерпретациски вештини и тоа на 15 јуни во Културен и информативен центар во Битола, односно 16 јуни во Камерната сала на Филхармонија во Скопје, каде што ќе настапат заедно со едни од најдобрите македонски кларинетисти и саксофонисти, и Камерниот оркестар на Битола, под диригентската палка на Владимир Димовски.
Овие два настана се всушност и главната прослава по повод јубилејот на Меѓународниот фестивал по кларинет и саксофон „Саксклар“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Вечер на новоприбрани архивски материјали во Кинотеката
На 27 декември, сабота, со почеток во 20 часот, во Кинотеката ќе се одржи Вечер на новоприбрани архивски материјали, во која ќе бидат прикажани дел од филмовите набавени во 2025 година преку откуп на материјал или меѓу-архивска размена. Проекцијата на оние филмски материјали кои намаат звук ќе бидат прикажани со музичка придружба во живо на ИВЛ.
Една од основните дејности на Кинотеката, поточно на Филмскиот архив (односно Одделението за прибирање, заштита, обработка и чување на филмови и филмски материјали) при оваа институцаја е токму прибирањето на филмови и филмски материјали кои се поврзани со Македонија. Кинотеката години наназад води истражување, идентификација, пронаоѓање и прибирање на филмови и филмски материјали кои се однесуваат или се снимени во Македонија со цел збогатување на збирките, фондовите на кинотека и нивно зачувување.
Вечерта на 27 декември, сабота, ќе бидат прикажани дел од набавените архивски материјали – репортажите на „Филмске новости“ и патеписната репортажа „Од Сава до Вардар“ преземена од Белгискиот филмски архив.
Музичка придружба: ИВЛ.
Влезница: 150 мкд.
Култура
„Виртуози на хорна“ – завршен концерт на јубилејното издание на Скопскиот брас-фестивал
На 29 декември 2025 година, со почеток во 19:00 часот, во малата сала на Филхармонија ќе се одржи концертот „Виртуози на хорна“, последниот настан од петтото јубилејно издание на Скопски Брас Фестивал.
Покрај домашниот хорнист Благоја Василевски, на концертот ќе настапат и реномирани музичари од регионот: Михајло Булајиќ, прва хорна во Лондонски симфониски оркестар и Оркестарот на РТВ Словенија, Никола Чириќ, прва хорна во Белградска филхармонија, Илир Кодима, прва хорна во Косовска филхармонија и професор на Факултетот за музичка уметност во Тирана, како и Милан Роксандиќ од Театарот во Нови Сад.
Настанот претставува пример за меѓународна соработка и културна размена, со фокус на камерната музика за хорни и современ пристап кон брас сцената во регионот. Публиката ќе има можност да слушне програма што ги истакнува изразните можности на инструментот, со дела од класичниот репертоар и божиќни аранжмани за ансамбл хорни.
На програмата се најавени „Унгарска рапсодија бр. 5“ од Јоханес Брамс, „Радецки марш“ од Јохан Штраус, како и избор на божиќни композиции во аранжмани за хорни.
Култура
Белград се сеќава на Зафир Хаџиманов: музичка вечер во македонскиот КИЦ
Македонскиот КИЦ во Белград во своите простории на Македонска 30, на 26 декември 2025 година во 19 часот, организира музичка вечер посветена на Зафир Хаџиманов.
Настанот ќе го отвори директорот на КИЦ Белград Васко Шутаров, со краток осврт за културата на сеќавање кон големиот бард на културата Зафир Хаџиманов, за огромното културно наследство кое го остави како на македонската, така и на српската култура.
„Јас сонувам, јас творам, јас водам љубов на двата јазика”, знаеше често да каже Зафир, во неговите интервјуа за српските и македонските медиуми.
Вечерта посветена на Зафир Хаџиманов, ќе започне со неколку одбрани музички инсерти и грст фотографии, меѓу кои неколку и за првпат јавно презентирани, а ќе продолжи со интимен концерт посветен нему, со неговите најблиски, Бисера Велетанлиќ и Васил Хаџиманов.
Потретот на Зафир Хаџиманов е инициран и организиран од македонскиот КИЦ во Белград и поддржан од Министерството за култура и туризам.
Зафир Хаџиманов е роден на 25 декември 1943 година во Кавадарци. Дипломирал на Факултететот за драмски уметности во Белград, во 1967 година. Тој речиси целиот животен век го поминал во Белград, во брак со една од најпознатите југословенски пејачки Сенка Велетанлиќ – Хаџиманов, со која го добиле синот Васил Хаџиманов, познат џез-музичар. Значаен е како пејач кој настапувал на голем број фестивали, композитор, поет и актер, со препознатлив придонес во македонската и српската култура, особено преку спојот на традиционалните македонски музички елементи со современи и популарни форми. Во 1991 година, Хаџиманов бил еден од основачите на друштвото за македонско-српското пријателство „Шар Планина“ и на здружението на Македонците во Белград, „Македониум“. Поради неговите заслуги за промоцијата на македонската култура во Србија, во 2007 година, тој бил промовиран во почесен амбасадор на културата на Македонија во Србија.
Хаџиманов почина на 27 март 2021 година, на 77-годишна возраст, од компликации предизвикани од Ковид-19. Постхумно беше одликуван со „Златен медал за заслуги“ од претседателот на Србија, како и со „Орден за заслуги за Република Северна Македонија“ од претседателот Стево Пендаровски, за неговиот исклучителен придонес во уметничкото и музичкото творештво.

