Од 26. до 28. јуни, во киното „Фросина“ во Младинскиот културен центар (МКЦ), ќе се одржи седмото издание на „Златна рамка“ – Денови на македонскиот филм, во организација на Друштвото на филмските работници на Македонија (ДФРМ). Тридневната ревија ќе понуди богата програма од најновите македонски кратки, документарни и долгометражни филмови, а влезот за сите проекции е бесплатен.

Иницирана како дел од стратешката програма за афирмација на филмската уметност и поддршка на домашната продукција, филмската ревија „Златна рамка“ се етаблира како еден од клучните настани во македонската културна сцена. Со своето седмо издание, ревијата ја продолжува својата мисија – да ја претстави актуелната продукција транспарентно и критички, да ја доближи до домашната публика и медиумите, како и да придонесе кон унапредувањето и квалитетот на македонската кинематографија преку стимулирање на продукциската и креативната динамика во индустријата.

„Златна Рамка“, покрај тоа што е филмска ревија, претставува и платформа за професионален дијалог, каде филмските автори, продуценти и актери дискутираат за релевантни прашања, ги споделуваат своите достигнувања и остваруваат соработки.

Особено значајно е што овогодинешното издание на „Златна рамка“ се совпаѓа со јубилејот – 75. години од основањето на Друштвото на филмски работници на Македонија – здружение што има витално значење за развојот и заштитата на македонската кинематографија од нејзините почетоци до денес. Од своето основање, ДФРМ претставува глас и поткрепа за сите професионалци во домашната филмска индустрија.

„Златна рамка“ ја симболизира основната кинематографска единица, рамката, и на симболичен начин ги обединува творештвото, критиката, традицијата и современоста во македонскиот филм. Со секое ново издание, ревијата ја афирмира својата важност како двигател на културен дијалог што ги надминува жанровските, лингвистичките и културните граници.

Во рамки на тридневната програма, присутните може да очекуваат да уживаат во програма со различни долгометражни филмови, кратки и документарни филмови од најновата македонска филмска продукција.

ПРОГРАМА

Краткометражни филмови:

На 26 јуни со почеток во 18 часот ќе бидат прикажани пет кратки филмови. На програмата се остварувања на режисерите: Елеонора Венинова, Халим Лута, Надежда Панов, Трифун Ситниковски и Васил Христов.

Долгометражни филмови:

27 јуни, 20:30 часот: “Убиј ги прво децата“ во режија на Димитар Оровчанец, во продукција на “Трис Филмс“.
28 јуни, 20:00 часот: “Најтешкото нешто“ во режија на Сердар Акар, во продукција на “Сектор филм“.

Документарна програма:

27 јуни, 19:00 часот: “Време на бетон“ во режија на Игор Иванов, во продукција на “Скопје Филм Студио“.
28 јуни, 18:00 часот: “Богатство“ во режија на Арсим Фазлија, “Сејви Продукција“.

Дополнително, на 28 јуни, како дел од социјалната програма ќе се одржи и специјална проекција на „Најтешкото нешто“ во Домот за стари лица “Мајка Тереза“ за публиката која не може да го посети киното “Фросина“.

Инсталација е поставена во центарот на Скопје на малиот сквер кај Ким во порта Буњаковец, која има за цел да прати силна визуелна порака. Инспирирана од симболиката на отровните стрели, инсталацијата го прикажува говорот на омраза како невидливо, но моќно оружје што повредува.

Идејата на оваа акција е да нè потсети дека и зборовите можат да бидат опасни. Во центарот на инсталацијата е поставено човечко лице со широко отворена уста, од која излегуваат „отровни“ стрели — симболична претстава на зборовите што креаторите на говор на омраза ги користат за да навредат, повредат или омаловажат. Со димензии 1,4 х 1,2 метри и изработена од рециклирани метални материјали (лим, профили, арматури), оваа скулптурна композиција привлекува внимание со својата впечатлива форма и силна симболика.

На подножјето стои јасна порака: „Говорот на омраза повредува“ — повик до сите нас да размислиме за последиците од нашите зборови, особено во време кога комуникацијата сè почесто се одвива во дигиталниот простор, а говорот на омраза станува сè поголем општествен проблем.

Оваа уметничка интервенција има за цел да ја подигне јавната свест за штетните ефекти на говорот на омраза и да поттикне општествена одговорност, емпатија и почит кон другите.

Оваа акција е подготвена од Центарот за современи уметности – Скопје во рамките на проектот Мрежа за разновидност 2.0 – Нова агенда што го спроведува Здружението за унапредување на новинарските практики „Иновативни медиуми – Скопје.

„Скопско лето“ продолжува оваа недела со неколку концерти и претстави на различни локации.

Денеска ќе се одржи јубилеен концерт на „Баклава“ со почеток во 20:30 часот во Куршумли ан.

Групата „Баклава“ слави две децении музичко творештво со специјален концерт на „Скопско лето“. Препознатлива по својот автентичен акустичен звук, Баклава ќе ве прошета низ богатиот и разновиден музички свет создаван во текот на нивната 20-годишна кариера.

На концертот ќе бидат изведени песни од сите пет албумски изданија: „Баклава“, „Калемар“, „Ме манкас мучо“, „IV“ и „За Скопје со љубов“ – како музичко патување низ љубовта, традицијата и урбаниот ритам.

Влезницaта по цена од 500 денари, ќе се продава на влезот на Куршумли ан, пред почетокот на настанот.

На 24.06.2025г. (вторник) има три настани на фестивалот „Скопско лето 2025“.

Со почеток во 18:00 часот во Драмски Театар ќе се одигра театарската претстава „Гидионовиот јазол“. Билетите се во продажба на karti.com.mk

Со почеток во 20:00 часот во Младинскиот културен центар ќе се одигра театарската претстава „Добри луѓе“. Билети: bileti.mkc.mk или на билетарницата од МКЦ Скопје.

Со почеток во 20:30 часот во Музеј на македонската борба за самостојност ќе се одржи пијано рецитал на Горјана Стојановска. На програмата ќе бидат изведени дела од Ј.С. Бах, Шуберт, Лист, Чајковски, Володос, С. Рахмањинов и А. Скријабин. Билетите ќе се продаваат пред почетокот на настанот, на влезот на салата во Музејот на македонската борба за самостојност по цена од 300 денари.

На 25.06.2025г. (среда) ќе се одигра детска театарска претстава „Куќа на духовите“ со почеток во 19:00 часот во Театар за деца и младинци. Билетите се во продажба на karti.com.mk.

Исто така во среда, ансамблот Арт Нет (Србија) во Музејот на македонската борба за самостојност ќе ја претстави концертната изведба на првото сценско дело на Џакомо Пучини – Le Villi, со либрето на Фердинандо Фонтана.  Влезот ќе биде регулиран со влезници по цена од 300 денари, кои ќе се продаваат пред почетокот на настанот пред влезот на салата во Музејот на македонската борба за самостојност.

На 26.06.2025г. (четврток) со почеток во 20:30 часот во Сули ан Ансамблот Консонанс ќе одржи музичка приказна „Песна за жирафата“. Во оваа музичка приказна преку приказна и интеракција, децата ќе можат да се заапознаат со музиката од периодот на класицизмот и да ги слушнат аранжманите напишани специјално за овој концерт, кои нè едуцираат за познатата музика на Ф. Ј. Хајдн изведена од квинтет сочинет од следниве инструменти: виолина, флејта, англиски рог, кларинет и бас кларинет. Сите овие инструменти се солистички инструменти кои можат да настапуваат и сами, но најчесто се употребувани во поголеми ансамбли, во голем симфониски оркестар, оперска и балетска музика.

Влезот ќе биде регулиран со влезници по цена од 300 денари (родител+дете), кои ќе може да се купат пред почетокот на настанот на влезот на Сули ан.

На 27.06.2025г. (петок) со почеток во 20:30ч. во Сули ан ќе се одржи детска театарска претстава „Во царството на другарството“ во продукација на Театар „Хит“ – Скопје.

Влезот ќе биде регулиран со влезници по цена од 300 денари, кои ќе се продаваат пред почетокот на настанот, на влезот на Сули ан.

Исто така, на 27.06.2025г. (петок) со почеток во 20:30 часот во Музејот на македонската борба за самостојност ќе се одржи концерт насловен „Звуците на љубовта низ италијанскиот романтизам“ на Марија Ташевска (сопран) и Анастасија Кочева (пијано).

Влезот ќе биде регулиран со влезници по цена од 300 денари, кои ќе се продаваат пред почетокот на настанот на влезот на салата во Музејот на македонската борба за самостојност.