Министерството за култура енергично го осудува вандалскиот чин на оштетување на Аквадуктот, коj е дел од културно наследство, при што се оштетени 10 потпорни носечки столбови.

„Во соработка со Управата за заштита на културното наследство, Конзерваторскиот центар –Скопје Општина Карпош, Министерството за внатрешни работи и Министерството за култура, по извршениот увид преземени се итни мерки за превентивна заштита и се обезбедени засилени патроли за безбедност на Аквадуктотот кој е заштитено културно наследство од прва категорија“, се вели во соопштението.

Овој четврток (24 октомври) во Филхармонијата ќе настапи влијателниот француски контрабасист Рено Гарсија Фонс, кој по работата во врвни француски симфониски оркестри во 90-тите, се одлучува за солистичка кариера.

Рено Гарсија Фонс разви свој музички јазик и стил, со кој на автентичен начин го еманципира инструментот на кој свири. Контрабасот во рацете на Фонс звучи како шпанска гитара, африканска бас-лаута, како виола или персиска виолина. Станува збор за врвен инструменталист со каталонско потекло и од таму всушност потекнува неговиот интерес кон шпанската и ориенталната култура.

Концертот ќе го води Џијан Емин, а на програмата се дела од Рено Гарсија Фонс, како и ремек делото на Морис Равел – „Дафнис и Клое“.

Равел во „Дафнис и Клое“ употребува светол колорит и прецизно избрана инструментација преку која ја ослободува француската музика од заштитната школка на вагнеризмот. Ова дело на спиритуалниот аристократ, како што го нарекуваат критичарите, е уште една потврда на генијалноста на Равел и неговото софистицирано чувство за креација.

На 21 октомври, понеделник, во МКЦ ќе се одржи концерт на еден од најуникатните бендови од Јужна Америка – Föllakzoid и аудиовизуелниот колектив – Žen како нивна предгрупа.

Föllakzoid почнува со работа пред десет години како трансерска авантура меѓу тројцата другари од најраното детство – Диего, Хуан Пабло и Доминго од Сантјаго, Чиле. Со огромни познавања за културното наследство од античката музика на Андите, овој бенд полека учи како да го усогласи ова влијание со современите звуци од нивното време создавајќи богата, но истовремено и минималистичка атмосфера. I e најновиот албум, нивно четврто издание, а трето за една од најактивните и најинтересни издавачки куќи денес – њујоршката Sacred Bones Records. За разлика од минатите изданија што беа направени во single take со целиот бенд, на овој албум се работеше три месеци во изолација.

Kреативната перспектива на бендот отсекогаш била отфрлување на наративните и музичките сознанија, кои ги обликуваат физичките и дигиталните формати и концепции кои се достапни и визуелно и музички, со цел да се направи временско просторна метричка структура која ги распушта авторот и наративните парадигми.

Аудиовизуелниот женски колектив Žen e оформен во 2010 година во Загреб, каде што го пронаоѓа својот креативен дом во АКЦ „Медика“. Нивното деби I onda je sve počelo (2013), објавено под квир-феминистичката издавачка куќа Unrecords од Виена, и албумот „Јантар“ (2015), објавен како соработка помеѓу Unrecords и францускиот независен издавач Vox Project, ги направи еден од најпознатите и најважни бендови од регионот на поранешна Југославија.

Во 2017 година му се приклучуваат на словенечкиот Moonlee Records, а во ноември 2017 година објавен е нивниот трет албум Sunčani ljudi. Žen разиграно ги раздвојува родовите стереотипи и ги поврзува границите на аудио и визуелната уметност евоцирајќи патувања преку усогласување на гласот, потопени во прогресивна симбиоза на гитара, бас и тапани.