Култура
Агенцијата за филм: Годинава светот го освоија инспиративни македонски филмови

Домашната кинематографија ќе ја испрати 2019 година како исклучително успешна година во која инспиративните македонски филмови го освоија светот, беше пораката од годинешниот настан „Во наша режија“, организиран од Агенцијата за филм на Република Северна Македонија заедно со „Креативна Европа медија деск МК“ и Друштвото на филмските работници.
Пред присутните филмски работници и актери, директорот на Агенцијата за филм, Горјан Тозија, истакна дека годинава е навистина многу ретка по огромниот филмски бум што го создадоа и креираа, како што рече, нашите филмски мајстори.
„Во прилог на овој факт сведочат и бројките од премиери на 29 филма, учество на над 200 фестивали и добиени над 60 награди. Во оваа пригода да потсетиме само дека македонскиот кандидат за ‘Оскар’, ‘Медена земја’, ги собра аплаузите на три континента. Притоа, овој магичен филм, кој рапидно го зголемува бројот на свои фанови, се закити со голем број престижни награди од реномирани филмски фестивали, како што се ‘Санденс’, Интернационалниот фестивал во Сао Пауло и многу други. Со наградата ‘Лукс’, пак, Европскиот парламент му се поклони на македонскиот филм ‘Господ постои, името ѝ е Петрунија“, рече Тозија.
Тој ги спомена и другите проекти, како најновиот филм на Милчо Манчевски „Врба“, кој беше прикажан на етаблираниот филмски фестивал во Рим. Потоа, „Извидник“ на Алекс Цветков и „Незаборавна пролет во заборавено село“ на Куртим Бектеши, кои имаа свои проекции на важни филмски фестивали.
На вчерашниот настан Агенцијата за филм првпат ја промовира публикацијата за постигнатите резултати, настани и активности за измината година со наслов „Факти и бројки“.
Оваа публикација директорот Горјан Тозија ја најави како редовна тековна активност истакнувајќи дека нејзиното издавање претставува тотално скенирање на целокупната годишна работа на институцијата.
На крајот беше порачано дека со голема возбуда се чекаат новите подвизи на македонската кинематографија, на која светските филмски хоризонти ѝ се широко отворени.
Настанот „Во наша режија“ имаше и хуманитарен карактер преку иницијативата „Топол дом за сите“. Собраните финасиски средства ќе бидат донирани за реновирање на живеалиштата за деца што живеат во тешки услови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Димитрија Доксевски избран за директор на фестивалот „Браќа Манаки“

Актерот Димитрија Доксевски на денешното свечено Собрание на Друштвото на филмски работници (ДФРМ) е избран за нов директор на Меѓународниот фестивал на филмска камера „Браќа Манаки“.
Според статутот на ДФРМ, мандатот на Димитрија Доксевски важи за следните две изданија на фестивалот.
Димитрија Доксевски ја презентираше предлог програмата на фестивалот и се заложи дека ќе работи на зачувување на реномето што го има овој интернационален фестивал на филмска камера, соопшти ДФРМ.
Димитрија Доксевски е македонски филмски и театарски актер, сценарист и продуцент, роден на 28 јули 1983 година во Скопје. Дипломирал актерска игра на Факултетот за драмски уметности во Скопје во 2006 година во класата на проф. Кирил Ристоски, а во 2014 година магистрирал режија на истиот факултет во класата на проф. Слободан Унковски. Својата професионална кариера ја започнал во Македонскиот народен театар во 2006 се до 2011. Продолжил кратко да работи во Кумановскиот театар во прериодот од 2011 до 2013, по што во 2014 година се приклучил на ансамблот на Драмски театар Скопје и се до денес е активен член на тој театар. Покрај настапите на матичната сцена, Доксевски има учествувано и во претстави на други театарски сцени низ Македонија, како и во филмски и телевизиски проекти во и надвор од Македонија.
Учествувал во организирање и продуцирање повеќе театарски претстави, организирање на повеќе од 20 музички настани со артисти од целиот свет, продуцирање и организација на 2 големи музички (open air) фестивали со повеќе од 20 интернационални изведувачи, продуцирање и реализација на кратки филмови, играни видеа за деца и театарски претстави.
Култура
Љуљзиме Лека-Муљаку во Чифте амам со циклусот „Метаморфоза II“

На втори април, среда, во 19.00 часот, во Чифте амам ќе биде отворена самостојна изложба на Љуљзиме Лека Муљаку со наслов „Метаморфоза II“.
Љуљзиме Лека Муљаку припаѓа на современата уметничка сцена и ја претставува генерацијата уметници кои својата дејност ја започнале со визуелен израз од 90-тите години.
Таа ќе се претстави во Националната галерија со 50 слики од различни формати, интересен циклус со дела изработени во акрилна техника.
Изложбата „Метаморфоза II“ е нов циклус на дела кој претставува реалистичен поглед на егзистенцијалните естетски вредности. Фигуративната композиција на овој циклус ја отсликува егзистенцијалната уметност на женската невиност и достоинство.
Ликовното претставување тесно се поврзува со идејата на женскиот феномен во нашето општество и го претставува нејзиното диспропорционално присуство во видлив облик.
Изложбата ќе биде поставена до 13 април 2025, а куратор е Нарона Љума Весели.
Култура
Ремек-делото „Тоска“ од Џакомо Пучини на 4 април во НОБ

На 4 април со почеток во 20.00 часот на сцената на Националната опера и балет ќе се изведе ремек-делото „Тоска“ од Џакомо Пучини, музичка драма во вистинска смисла на зборот, монументална, брилијантно оркестрирана, реалистична опера во три чина. Љубовта, страста, љубомората и политичките интриги се движечките драмски елементи на овој „оперски трилер“.
Гостинот од Италија, Марио Меникаљи ќе диригира со изведбата на оваа драматична трагедија на Пучини, во режија на Огњан Драганов од Бугарија, сценографијата е на Зоран Николовски, а костимографијата на Марија Пупучевска, хор-мајстор: Ѓурѓица Дашиќ и Јасмина Ѓоргеска, а концерт-мајстор е Верица Ламбевска.
Во насловната улога ќе настапи Благица Поп Томова , во улогата на Каварадоси ќе настапи Зоран Сотиров, во улогата на Скарпија, Maрјан Јованоски, во останатите улоги настапуваат: Борко Биџовски, Драган Ампов, Никола Стојчески, Тихомир Јакимовски, Никола Чедомировски, Десанка Глигоријевиќ заедно со хорот и оркестарот на Националната опера и балет.
Tоска е опера во три чина од Џакомо Пучини. Напишана е по италијанското либрето од Луиџи Илика и Џузепе Џакоза. Либретото се базира на драмата „Тоска“ од Викториен Сарду. Светската премиера на операта е одржана на 14 јануари 1900 г. во Рим, Италија.