Култура
Алаѓозовски: Подготвен е нацрт на колективниот договор за вработените во културата
СДСМ подготви нацрт на колективниот договор за вработените во културата, изјави попладнево претседателот на Комисијата за култура на СДСМ, Роберт Алаѓозовски, на прес-конференција, по најавите за организирање протестен марш поради отсуството на општ колективен договор.
Од владејачката партија велат дека ги исправаат децениските неправди што биле нанесени од страна на ВМРО-ДПМНЕ. Колективен договор за култура, како што посочи Алаѓозовски, последен пат бил потпишан во 2005 година помеѓу СОНК – Самостојниот синдикат за образование, наука и култура на РСМ и Министерството за култура. Во овој период, нагласи Алаѓозовски, многу често биле доделувани бруто-коефициенти за пресметка на плата на нововработени што не биле во согласност со колективниот договор, туку коефициентите биле носени субјективно, а така се постапувало и кај новоформираните институции од областа на културата за нововработените лица.
„СДСМ подготви нацрт на колективниот договор за вработените во културата кога во претходниот период се одржаа повеќе средби и консултации со претставниците на синдикатите и на установите во културата за решавање на најургентните потреби и проблеми што произлегуваат од работниот однос на уметниците и другите вработени во културата. По повеќегодишен застој, се унапредуваат правата на вработените во културата. Владата предводена од СДСМ останува посветена секојдневно да работи исклучливо во интерес на државата и граѓаните“, нагласи Алаѓозовски.
Тој истакна дека владејачката партија извршила нивелација по работни места по дејности во институциите од областа на културата, со што 2.899 лица ќе добијат повисоки плати.
„Со ребалансот на буџетот за 2019 година се зголемија средствата наменети за исплата на платите на вработените во установите од областа на културата за 146.321.000 денари заради спроведување на процесот на нивелација на платите во установите од областа на културата или за 13,79 отсто во однос на одобрените средства за плати со буџетот за 2019 година. При изработката на пресметката се утврди дека вкупниот број лица кај кои би се јавило зголемување на платите изнесува 2.899 лица“, рече Алаѓозовски.
Додаде дека Министерството за култура веќе извршило подобрување на состојбата со платите во установите од областа на библиотечната, заштитата, музезејската и аудиовизуелната дејност по основ на законски стекнатите стручни звања и распореденост на соодветни работни места.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Центарот за култура „Трајко Прокопиев“ втора Меѓународна изложба на уметничка фотографија Мотус 2025
Здружението за промоција на интелектуални, мултикултурни и спортски вредности – Мотус од Куманово, преку својот Фото клуб – Мотус, во период од 18 декември (четврток) 2025 во просториите на Центар за култура „Трајко Прокопиев“ во Куманово, ќе ја организира втората Меѓународна изложба на уметничка фотографија Мотус 2025.
На изложбата ќе бидат изложени пеесетина фотографии. Учество зедоа 249 автори од 50 земји.

Финансиер на изложбата е Општина Куманово, преку програмата за подршка на културни манифестации за 2025 година, а истата е под патронат на Меѓународната Федрација на Фотографска Уметност (ФИАП 2025/393), (Фото Сојуз на Македонија (ФСМ 2025/003) и Меѓународна Фото Асоцијација Дунав (ДИПА 2025/054).
Изложбата ќе биде отворена на 18 (четврток) декември 2025 во 19:30 часот во просториите на Центар за култура „Трајко Прокопиев“ во Куманово.
Култура
„Интер(но)фејс“ на Борис Шемов во „Мала станица“
На 18 декември 2025 година, со почеток во 20.00 часот, во Мултимедијалниот центар „Мала станица“, во рамките на програмските активности на Националната галерија, ќе биде отворена изложбата „Интер(но)фејс“ на уметникот Борис Шемов, курирана од д-р Ана Франговска.
„Интер(но)фејс“ е мултимедијален проект кој се фокусира на односот меѓу човекот и вештачката интелигенција, на улогата на јазикот како визуелно, идеолошко и комуникациско средство, како и на пост-интернет естетиката како нова културна реалност. Преку различни медиумски форми – текстуални интервенции, видео-содржини, алгоритамски и дигитални процеси – изложбата отвора прашања за моќта, контролата, технологијата и трансформацијата на субјектот во современиот дигитален контекст.
Насловот „Интер(но)фејс“ упатува на двојната природа на интерфејсот – како техничка површина на комуникација меѓу човекот и машината, но и како внатрешен, идеолошки простор во кој се преговараат значењата, одлуките и позициите на моќ. Изложбата го третира интерфејсот не само како функционален медиум, туку како критичка зона на судир меѓу човечкото искуство и алгоритамската логика.
Проектот се надоврзува на актуелните уметнички и теориски дискурси за постхуманизмот, визуелната култура и дигиталната медијација на реалноста. Во таа рамка, „Интер(но)фејс“ ја поставува вештачката интелигенција не како неутрален технолошки алат, туку како активен фактор во креирањето на современите културни, политички и етички релации.
Изложбата „Интер(но)фејс“ може да се посети во периодот од 18 до 24 декември 2025 година во Мултимедијалниот центар „Мала станица“, Национална галерија, Скопје.
Култура
Концерт на Драган Ѓорѓевиќ-Сузуки и Дино Имери во Музејот на македонската борба
На 17 декември (среда), со почеток во 20 часот, во амбиентот на Музејот на македонската борба, ќе се одржи концерт на двајцата истакнати уметници од регионалната и меѓународната сцена – виолончелистот Драган Ѓорѓевиќ Сузуки, еден од најценетите и највлијателни виолончелисти во регионот, и пијанистот Дино Имери, волшебникот на пијаното.
Сузуки е препознатлив по својата извонредна техничка виртуозност, длабока музикалност и силно сценско присуство, а критиката и публиката го вбројуваат меѓу најдобрите виолончелисти на Балканот. Заедно со Дино Имери, еден од најреномираните македонски пијанисти, тие носат концертна вечер од врвен уметнички ранг.
Публиката ќе има можност да ужива во внимателно избрана програма со дела од: Бетовен, Шнитке, Шуман, Дебиси, како и композиции од Имери Илкоска, носејќи свеж и современ израз во концертната вечер.
Концертот е со слободен влез, претставувајќи ретка можност за љубителите на класичната музика да доживеат висок уметнички квалитет и инспиративна интерпретација.

