Концертната промоција на најновиот албум „Let Us Be“ на светски познатиот македонски гитарист и автор Владимир Четкар ќе се одржи на 8. мај (среда) со почеток во 21 часот, на поткровјето на мултимедијалниот простор Јавна Соба (Public Room) во Скопје.

Овој концерт Четкар го означува и почетокот на големата меѓународна турнеја, која ќе продолжи во неколку американски метрополи – Бостон, Њујорк, Чикаго – а потоа и во Јапонија. Албумот „Let Us Be“ е четвртиот студиски проект на Четкар, снимен во Чикаго со учество на повеќе од 40 врвни студиски музичари и саунд инженери. Изданието, кое беше ексклузивно објавено во Јапонија преку музичката куќа P-Vine Records, веќе се најде на полиците на јапонските музички продавници.

„Албумот е инспириран од секојдневни моменти, љубов, предизвици и искрени емоции. Сакам на концертот заедно да го славиме животот, мигот, прошката и љубовта. На албумот симболично порачувам – оставете нè да бидеме она што сме и какви што сакаме да бидеме,“ вели Четкар во пресрет на промоцијата.

Владимир Четкар, дипломец на престижниот „Berklee College of Music“ во Бостон, веќе две децении успешно ја гради својата меѓународна кариера, постојано балансирајќи помеѓу Македонија и САД. Роден во Охрид, денес голем дел од времето го поминува во Њујорк, каде што ја продолжува својата музичка приказна.

Во вторник, 6 мај во 19 часот во Градската библиотека „Браќа Миладиновци“ – Скопје ќе се одржи разговор со поетесата Биљана Стојановска, чија стихозбирка „Додека спиеш“ е книга на месецот.

Разговорот со Стојановска е дел од големата кампања „Читаме современи македонски автори“. Модератор ќе биде книжевната критичарка Александра Јуруковска, а стихови ќе чита актерот Андреј Серафимовски.

-Стојановска умее со природноста на Господинов, да напише стихови за празнење на цревата и тоа да биде поетично. Умее во песните да даде неочекуван пресврт или ефект на изненадување, но умее и од реалност незабележливо да нѐ внесе во бајка и да нѐ воодушеви со магичниот реализам. Да ни раскаже приказна за камионот со сладолед и за вкусовите на летото среде зима, но и да нѐ тресне од сивиот бетон и да нѐ врати во реалноста на болничките соби каде што луѓето се обидуваат да си го вратат достоинството и да си ја задржат главата на рамена, вели Снежана Стојчевска во рецензијата за книгата.

Биљана Стојановска е родена 1984 година. Има дипломирано на Филолошкиот факултет „Блаже Конески“ во Скопје, на отсекот за македонска книжевност и јужнословенски книжевности. Во 2015 година ја објави нејзината прва збирка поезија „Зборовите немаат значење“ во издание на „Антолог“. Добитник е на книжевната награда „Тодор Чаловски“ за 2017 година за книгата „Стан што се распаѓа“ (2018, „Галикул“). „Стан што се распаѓа“, како и „Додека спиеш“ беa во најтесна конкуренција за наградата „Браќа Миладиновци“ што ја доделуваат „Струшките вечери на поезија“. „Потрага по храброст“ е нејзината четврта книга, којашто е книга за деца, со илустрации на уметникот Владимир Лукаш, во издание на „Чудна шума“ (2024). Нејзината поезија е преведена на англиски, германски, кинески, српски, полски, словенечки јазик, а застапена е и во повеќе македонски списанија за литература и антологии. Стојановска работи како новинар.

Со „Додека спиеш“ (издание на „Чудна шума“) се заокружува третиот циклус од кампањата „Читаме современи македонски автори“ во чии рамки беа претставени 24 книги од исто толку автори. Кампањата започна во септември 2022 и се одвиваше во циклуси од по осум месеци со исто толку автори и дела. Во 2024 година Градската библиотека „Браќа Миладиновци“ за оваа кампања ја доби наградата Промотор на читачката култура што ја доделува Македонската асоцијација на издавачи.

На 6 мај во ИТ хабот Нетавил во Скопје, со почеток од 18 часот ќе се одржи промотивен настан за третото издание на фестивалот Стрип Трип. Како дел од промотивниот настан, илустраторите Симон Калајџиев и Белкис Аксу ќе ги престават своите дела и инспирациите што стојат зад нив.

Дополнително, ќе се одржи и цртачка „џем“ сесија со дел од најактуелните автори во македонскиот стрип. Во текот на вечерта, ќе бидат споделени и дел од содржините што се подготвуваат за главниот настан на Стрип Трип што ќе се одржи од 6 до 8 јуни во Младинскиот Културен Центар во Скопје. Настанот е отворен за јавноста, а организаторите ги покануваат сите љубители на стрипот и графичката уметност во државата.

Симон Калајџиев е уметник и футурист од Скопје кој живее и работи како професионален илустратор во Токио, Јапонија. Има работено како независен илустратор и графички дизајнер за многу различни проекти, вклучувајќи: филмови, списанија, реклами, учебници, веб-сајтови, и фестивали. Бил инструктор за цртање стрип и еден од основачите на стрип работилницата во НВО Погон Скопје, 2002-2006. Уредник е и на стрип магазинот Comicus Magnus во издаваштво на истата организација. Тој е добитник на повеќе престижни награди од полето на архитектонската илустрација. Меѓу позначајните изданија, автор е на арт-зборникот „Верлосен“ (2023) и експерименталниот графичко-книжевен проект за асемичко пишување „Öлпест“ (2025).

Белкис Аксу е илустраторка што потекнува од Измир, Турција, а веќе неколку години живее и работи во Скопје. Периодов работи на графичкиот роман, „Всушност, нејзиното лице е прекрасно“ заедно со Дерија Атлас. Дополнително, Аксу илустрира детски книги и атласи, објавува месечен билтен во вебкомик формат, предава на работилници за илустрација, а организира и клуб за графички романи заедно со Атлас. Работи во Јуфи Арт студиото во Дебар Маало со уште двајца уметници.

Стрип Трип 2025 е меѓународен фестивал на стрипот што ќе се одржи во Младинскиот Културен Центар (МКЦ) во Скопје од 6-8 јуни 2025. Главна цел на фестивалот е промоција и популаризација на македонскиот и светскиот стрип. На фестивалот ќе бидат претставени најновите достигнувања и иновативни изрази во деветтата уметност и сродните креативни индустрии. Воедно, ќе бидат претставени стриповите на најмладата генерација на стрип автори. Фестивалот ќе биде отворен за сите посители.