Култура
Денес почнува прославата за 50 години МКЦ
Со годишната програма по повод јубилејот 50 години МКЦ, Младинскиот културен центар денес напладне ги отвора своите врати за сите посетители, токму онака како што биле отворени во далечната 1972 година на 28 декември.
Целодневната програма, која буквално ќе исполни секое ќоше на МКЦ, почнува во 12 часот со програма за најмладите, односно отворени предавања во планетариумот. Во текот на попладневните часови ќе се одржат работилници за танц за деца, новогодишна работилница за деца со образовни потреби, работилницата „Арт и Крафт“ со уметниците Драган (Драш) Китановски и Марјан Димиќ, како и настап на инклузивниот хор „Ветерница“ и здружението „Трисомија 21“ по што следува и театарска претстава за деца „ЏИНче“ од театарот „Сенки и облаци“.
Програмата потоа продолжува со промоција на книгата „Неправилен ритам“ од музичкиот критичар и новинар Љупчо Јолевски во киното „Фросина“ од 18.30 часот. Во киното „Фросина“, со почеток од 15 часот, па сè до раните утрински часови, ќе се одвиваат проекции на филмови од програмата „Фестивали на гости“, која вклучува филмски проекции на фестивалите што со години веќе традиционално се одржуваат во Младинскиот културен центар: „Џифони“, фестивалот на планинскиот филм ЕХО , Скопскиот филмски фестивал, „Македокс“, „Киненова“, Филозофскиот филмски фестивал и новооформениот фестивалот на анимирниот филм „Флипбук“.
Во 19 часот е закажан перформансот на уметникот Мирослав Масин, кој специјално за јубилејот 50 години МКЦ наслика дело со наслов „Птици“, кое ќе биде трајно изложено во просториите на институцијата. Во рамките на ликовната програма планирани се ретроспективни изложби на плакати на МКЦ, како и дела на уметници што изложувале во галеријата, како и ликовен перформанс на младите автори Бранкица Јордановска, Ертунч Сали, Сања Симоска, Филис Синаноска, Воскресија Андреевска и Амир Карахасан со наслов „Го цртаме МКЦ“.
Главниот протоколарен дел е закажан во 20 часот, со настап на двата ансамбла на МКЦ, Градскиот дувачки оркестар и Женскиот младински хор, кој оваа година слави јубилеј 50 години, како и својата матична институција. По тоа, следуваат долгоочекуваните настапи на музичките групи „Бадмингтонс“, „Санаториум“, „Чиста околина“, Дина Јашари, „Суперхикс“ и 21 век.
Во новооформениот простор Клуб МКЦ, со почеток од 22 ч, ќе пуштаат музика 20 најтесно селектирани диџеи, кои имаат цел да ја анимираат публиката до раните утрински часови.
Да не ги заборавиме и двата одлични настана за прослава на литературната програма во МКЦ: „Битката на недоискажаните, односно фристајл-битка на поетите версус раперите“, како и поетскиот перформанс „Поетска епизода 3“.
Со оглед на габаритноста на театарот како уметничка форма и исполнетоста на просторот, театарската програма ќе се одвива во рамките на проекции на театарски претстави со наслов „Што сме можеле да имаме на МОТ, а што никогаш нема да имаме“ – со проекции на генијални, современи театарски продукции, кои можеби еден ден ќе бидат дел од репертоарот на фестивалот. Овие проекции ќе почнат во 17 часот и ќе се одвиваат во Џебното кино на МКЦ.
Покрај споменатите програми во рамките на дејностите на МКЦ, ќе се одржат и неколку презентации и работилници, односно работилница за мајсторијата на скречувањето со диџеј Гоце и Чваре, предавање на Архитектонскиот факултет со наслов „Невидливо Скопје“ и презентација на филмскиот клуб „Ед Вуд“, кој со години функционирал во рамките на МКЦ, со проекција на филм на Гоце Цветановски.
„Навистина беше тешко да се создаде програма во која треба да биде собрана толкава историја на настани, случувања, иницијативи, програми и активности што се случиле во овие ѕидови во 50 години постоење. Решивме да се фокусираме на дејностите на МКЦ и фестивалите во наша организација и за нив да успееме и да најдеме најсоодветна форма како да ги претставиме. Некои од нив со постојни активности и настани, други со нешто поинакво и филувано во духот на МКЦ.
Нашата желба за уште поуспешни наредни 50 години мора да биде стратешки поддржана од институциите, најпрвин од нашите најнадлежни – Градот Скопје, па потоа и од Министерството за култура. Бидејќи во нас мора да согледаат рамноправен партнер затоа што и, можеби нескромно, без МКЦ нема фундаментална култура“.
Влезот на сите настани е бесплатен и отворен за сите посетители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Кинотека ќе биде прикажан грчкиот филм „Што ако“
Грчкиот филм „Што ако“ (What If) во режија на Христофорос Папакаљатис, ќе биде прикажан вечер во 20 часот во Кинотека.
Прикажувањето на филмот е дел од тековната серија проекции на грчки филмови на Амбасадата на Грција, со наслов „Ајде да се запознаеме“, иницијатива која има цел да ја приближи публиката до современата грчка кинематографија.
Филмот „Што ако“ е трогателна романтична драма од креаторот на светски признатата серија на „Нетфликс“ – Маестро во сина. Дејството на филмот се одвива во Атина во периодот на економската криза и ја следува приказната на Димитрис, 33-годишен ерген, кој живее навидум обичен живот. Една вечер, кога неговото куче, женка германски овчар со име Лоунсом, го поттикнува да излезе, Димитрис се соочува со клучна одлука: да излезе или да остане дома. Ако излезе, ќе ја запознае Христина, љубовта на својот живот; ако остане дома, ќе ја пропушти шансата да ја сретне. Филмот ги истражува вечните прашања за судбината, вистинската љубов и изборот прикажувајќи го истовремено и влијанието на сериозната економска криза врз луѓето и личните односи. Истата приказна е раскажана од две перспективи.
Влезот за проекцијата во Кинотека е бесплатен по принципот прв дојден – прв услужен. Филмот е наменет за лица над 16 години, информираат од амбасадата.
Култура
Почина Кетрин О’Хара
Почина Кетрин О’Хара, легендарна актерка и ѕвезда на серијата Schitt’s Creek и култните филмови Бубимир и Сам дома. Имала 71 година, а веста ја потврдила нејзината менаџерка, пренесе „Пипл“. Засега не се соопштени дополнителни детали.
О’Хара е родена во Торонто во 1954 година и кариерата ја започнала во легендарниот комичарски театар Second City, а потоа стекнала голема популарност со телевизиската емисија SCTV, за која освоила и награда „Еми“.
Филмската публика ја памети по улогите во Бубимир, Сам дома и Сам дома 2, како и по бројни филмови на режисерот Кристофер Гест. Глобална популарност доживеа со улогата на Моура Роуз во Schitt’s Creek, за која во 2020 година освои „Еми“, „Златен глобус“ и награда SAG.
Последните години гостуваше во серии и филмови, меѓу кои The Last of Us и Argylle.
Зад себе ги остави сопругот Бо Велч и нивните два сина.
Фото: скриншот од филмот „Сам дома“
Култура
Почина поетот и преведувач Тихомир Јанчовски
На 58-годишна возраст денеска во Скопје почина поетот и преведувач Тихомир Јанчовски.
Веста за неговото прерано заминување ја соопшти Друштво на писателите на Македонија, изразувајќи длабоко жалење за загубата на еден од најзначајните современи македонски автори и педагози.
Од Друштвото информираат дека за точниот датум и час за испраќање последен поздрав ќе следи дополнително известување.
Јанчовски беше поет, писател, преведувач, професор, музичар, издавач, автор на над триесет книги, пред сè поезија, преводи и (поетски) романи, како и една книга историја („Историја на православното монаштво на територијата на денешна Република Македонија“, Сигмапрес, Скопје, 2010).
Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик. Тихомир Јанчовски, со својата автентичност и креативност останува еден од најомилените наставници на повеќе генерации средношколци во гимназијата „Орце Николов“, во меѓународното училиште „Нова“ и во Американската гимназија во Скопје.

