Култура
Доделени наградите на Фестивалот за европски анимиран филм – Flipbook Film Festival
Со доделување на наградите заврши првото издание на Фестивалот за европски авторски анимиран филм Flipbook Film Festival, кој се одржа од 11 до 13 август 2020 година во Младинскиот културен центар.
Жирито во состав: Катрин Новаковиќ, Катерина Стојановски и Гоце Господиновски, наградата за најдобар филм во главната конкуренција му ја додели на филмот Sh_t Happens на режисерите Михаела Михали и Давид Штумф.
Во истата категорија жирито додели специјална награда на македонскиот филм „Карантин“ во режија на Иван Андреевски.
Наградата на онлајн-публиката, која гласаше за филмовите на Cinesquare, му припадна на филмот „Ќерка“ во режија на Дарија Кашчеева.
Во студентската селекција наградата за најдобар филм му припадна на Cockpera на хрватската авторка Ката Гугиќ, а специјалната награда од жирито на филмот The Kite. За најдобар анимиран документарен филм беше прогласен Carlotta’s face, а специјалната награда од жирито му беше доделена на Macka je uvek zenska на режисерките Мартина Мештровиќ и Тања Вујашиновиќ од Хрватска.
Ова се образложенијата од жирито за наградите:
SH_T HAPPENS

Овој мал голем филм, со навидум толку лесен стил, ќе ве замисли дали случајно не гледате некоја комерцијална анимација од високобуџетско студио. Преку совршениот спој на носталгична анимација и трагикомичен наратив дава една интимна перспектива на секогаш актуелните дуалитети на човековото постоење: љубов – страст, живот – смрт, смисла и апсурд. Едно потсетување на чешката и словачката анимациска доминација од едно друго време, која полека но сигурно се враќа.
QUARANTINE (специјална награда)

Со интересна техника, која ги меша естетиките на традиционалната стоп и современата 3Д-компјутерска анимација, овој краток филм нè води во еден за секого многу присутен амбиент, но преку комична призма, која барем за миг ни дозволува да се насмееме и малку да издишеме од нашето загушувачко секојдневие. Мајсторски сработена анимација од еден млад автор, која укажувана тоа дека златното време на македонскиот анимиран филм е пред нас.
Студентски: COCKPERA

Храбра цртачка техника со динамична, но елегантна анимација. Хумор и еротизам, кои го трансцендираат цртежот од кој произлегуваат. Скокајќи помеѓу неколку жанрови и медиуми, успева да ја плени целокупната перцепција. Овој студентски филм како да излегува од златните денови на загрепската анимација, но со младешка полетност на денешницата најавувајќи нова доминација на хрватскиот анимиран филм.
THE KITE (специјална награда)

Чешка стоп-анимација во најдобро светло. Одличен карактер и сет-дизајн. Суптилната анимација успева да ја пренесе меѓучовечката блискост и врските што ги надминуваат времепросторот, животот и потоа. Филм кој ги поместува линиите меѓу студентската и професионалната продукција. Традицијата на Јиржи Трнка успешно продолжува.
Анимиран документарен филм: CARLOTTA’S FACE

Филмот е сработен со уметнички израз, кој се надоврзува на нарацијата и создава еден амалгам од дело и документ. Дозволува интимно да го доживееме наративот низ кој нè води и создава сочуство со носителот на дејството.
A CAT IS ALWAYS FEMALE (специјална награда)

Еден успешен анимиран превод на скулпторскиот медиум. Фрла светло на борбата за креативен израз и родова еднаквост во професија и време под машка доминација. Храбро впуштање на анимацијата во водите на документарниот филм, но и скулпторскиот медиум.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Поддршка за културата во Битола: MINT зад Шекспир фестивалот 2025
Денес официјално започнува Шекспир фестивалот во Битола, еден од најзначајните и најреномирани театарски настани во регионот, кој годинава повторно ги обединува највлијателните и најиновативните Шекспирови продукции од светот.
Организиран од Народниот театар Битола, фестивалот претставува платформа каде класичните драмски текстови добиваат современи интерпретации, а Битола станува центар на висока сценска уметност.
Во пресрет на свеченото отворање, денес се одржа работна средба помеѓу директорот на Народниот театар Битола, Васко Мавровски, и генералниот директор на MINT Fintech Group, Никола Јошевски. MINT е долгогодишен партнер и спонзор на Народниот театар Битола, а годинава ја проширува својата поддршка и како клучен спонзор на Шекспир фестивалот.
Средбата, одржана во фоајето на театарот, беше можност за разговор за заедничката визија, новите идеи и стратешкото планирање на програмските и културните иницијативи за 2026 година.
„MINT продолжува да вложува во културата не како обврска, туку како уверување дека уметноста ја гради заедницата, а силната културна сцена значи силно и одржливо општество,“ истакнаа од компанијата.
Вечерва, со кревање на завесата, Битола повторно ќе стане театарски центар чијашто традиција, енергија и визија ја прават препознатлива на културната мапа на регионот.
(ПР)
Култура
Објавен „Речник на псевдонимите во македонската книжевност од првата половина на ХХ век“ од Славчо Ковиловски
„Македоника литера“ објави нова книга на Славчо Ковилоски со наслов „Речник на псевдонимите во македонската книжевност од првата половинана ХХ век“.
Овој речник се надоврзува на „Речникот на псевдонимите во македонската книжевност од XIX век“, од истиот автор, публикуван во 2022 година. Покрај лажните имиња од сите видови (псевдоними, кратенки, знаци) овде се вклучени и одредници со прекари на публицисти, родените имиња на авторите, како и одреден број партизански псевдоними.
Во Речникот се наоѓаат книжевни псевдоними на 187 автори и 36 псевдоними од други области со вкупен број од 223 лица со скриени имиња. Исто така, има 19 родени (крстени) имиња на луѓе од книжевноста и културата, како и 37 автори чии прекари се споменуваат покрај нивните имиња. Вкупниот број на псевдоними изнесува повеќе од петстотини. Посебно поглавје е посветено на теорискиот пристап при објаснувањето на методологијата, односно постапките за дешифрирање и категоризирање на скриените имиња. Овој дел е особено важен, бидејќи без соодветен критички метод на потврдување или негирање на авторството препишано според псевдоним, не може да се добие релевантен одговор, прецизно дефиниран, елабориран според современите концепции на теоријата на книжевноста, но и на книжевно-историските односи и практики.
Славчо Ковилоски (Скопје, 1978) е македонски книжевен историчар, културолог, поет, прозаист. Автор е на неколку прозни, поетски и монодрамски дела, како и на повеќе монографии од областа на книжевноста, историјата и културологијата. Прикази и статии објавувал во повеќе македонски списанија и дневните весници. Има преведено шест белетристички и научни дела од хрватски и бугарски на македонски јазик и повеќе преводи од српски јазик објавени во периодиката. Делови од неговото прозно и поетско творештво се преведени и препеани на неколку европски јазици.
Работи во Институтот за македонска литература (Одделение за македонска литература во XIX век), при Универзитетот „Св. Кирил и Методиј“ во Скопје.
Култура
Пијано-рецитал „Скопје во петолиние 2028“
Културниот информативен центар – Скопје го најавува пијано рециталот „Скопје во петолиние 2028“ – македонска музичка приказна во чест на Скопје, Европска престолнина на културата 2028.
Овој уникатен рецитал ќе ја раскаже музичката приказна на нашиот град преку внимателно одбрани дела на македонски композитори, претворајќи го Скопје во вистинска партитура, а пијаното – во раскажувач. Рециталот претставува интимна пијанистичка нарација која го пренесува духот и енергијата на градот директно до срцето на публиката.
На пијаното ќе настапи Давид Павиќ, млад, но веќе признат пијанист кој го претставува новиот бран на македонски уметници. Со внимателно одбраниот репертоар, рециталот ќе го истакне генерацискиот премин на македонските композитори и континуитетот на музичкото изразување во Македонија.
Овој рецитал е прв целовечерен концерт од ваков вид воопшто кај нас, во кој младата надеж на македонската пијанистичка сцена, Давид Павиќ, преку својот личен уметнички израз ќе ги претстави делата на македонските композитори во ново светло.
Со внимателна интерпретација и емоционална длабочина, тој не само што ги оживува музичките дела на македонските композитори, туку и ги афирмира пред домашната и меѓународната публика.

