Македонскиот народен театар се врати од регионална турнеја (дел на првиот блок патувања), носејќи со себе голема гордост и силни впечатоци.

МНТ веднаш продолжи со својата динамична програма, каде што на 15 април, на IV Театарски фестивал „5РЕ“ во Велес, на сцената на театарот „Јордан Хаџи Константинов-Џинот“, настапи со актуелната претстава „12“, по мотивите на Реџиналд Роуз (12 Angry Men), во адаптација и режија на Синиша Евтимов.

Во согласност со едногласната одлука на жири-комисијата, во состав на: Александар Георгиев, Александар Ивановски и Миле Вратеовски, претставата на фестивалот во Велес стана добитник на две награди: награда за најдобра претстава во целина и награда за најдобра режија.

Извонредните актери во „12“: Ѓорѓи Јолевски, Гораст Цветковски, Тони Михајловски, Никола Ристановски, Благој Веселинов, Александар Микиќ, Игор Џамбазов, Јордан Симонов, Нино Леви/Сенко Велинов, Оливер Митковски, Владо Јовановски и Сашко Коцев, досега ги освоија домашниот и меѓународниот аудиториум со својата силна социјална порака и извонредна актерска игра, а овие награди се дополнителна сатисфакција за освојување нови признанија.

Министерот за култура и туризам Зоран Љутков се обрати на отворањето на Форумот посветен на културните рути на Советот на Европа на кој беа презентирани културните рути во кои е вклучена и нашата држава: „Рута на Св. Кирил и Методиј“, „Винска рута-Итер Витис“ и „Рута на римски иператори и Дунавска винска рута“.

Според Љутков културните рути не се само туристички патеки. Тие се патишта на вредности, дијалог, споделено наследство и европско заедништво. Затоа Форумот е одлична можност за дискусија, размена на идеи, мислења и искуства со експерти и учесници од различни сфери за идниот развој на оваа област.

„Со повеќе од 40 сертифицирани рути, Советот на Европа ни покажува како културата може да биде мост – меѓу историјата и современоста, меѓу локалното и глобалното, меѓу народите и нациите. Република Македонија, како земја која веќе активно учествува во „Рутата на Свети Кирил и Методиј“, „Винската рута Итер Витис“ и „Рутата на римските императори и Дунавската винска рута“, преку своето исклучително богато и разнолико културно наследство, има значаен потенцијал не само да биде дел од оваа мрежа, туку и да придонесе како рамноправен креатор на нови иницијативи. Наша обврска е да ги истакнеме и презентираме вредностите со кои располагаме – од античките траги до современите културни практики, од духовното наследство до живата традиција“, рече Љутков.

Министерот потенцираше дека Културните рути на Советот на Европа се важен инструмент за развој на културниот туризам, кој ќе го зголеми интересот за нашата држава како дестинација и ќе придонесе за зајакнување на економијата преку туризмот.

Токму од тие причини, додаде Љутков, овој форум го гледам како отворена покана – да ги споделиме идеите, да соработуваме, да размислуваме стратешки и креативно. Да создадеме културни рути што нема само да ги водат туристите, туку ќе ги носат вредностите на нашите заедници низ Европа.

Филмскиот фествал „Браќа Манаки“ го најавува своето 46. издание, кое ќе се одржи во Битола и објавува повик за пријавување филмови.

Пријавувањето е од 17 април до 27 јуни на https://filmfreeway.com/ManakiBrothers.

Награди:

– Златна камера 300 за најдобра кинематографија (официјален избор)

– Сребрена камера 300 за кинематографија (официјален избор)

– Бронзена камера 300 за кинематографија (официјален избор)

– Железна камера 300 за најдобра кинематографија (конкурс за документарни филмови)

– Мала камера 300 за најдобра кинематографија (конкурс за кратки филмови)

– Кристална камера 300 за најдобра кинематографија (конкурс за студентски филмови)

Почесни награди:

– Златна камера 300 за животно дело во кинематографијата

– Специјална Златна камера 300 за исклучителен придонес во светската кинематска уметност

– Златна камера 300 за креативна синергија (кинематографер и режисер или Гафер или оператор на камера или Steadicam оператор или држач за клучеви)

– Голема ѕвезда на македонската кинематографија