На 15 јули почнува јубилејното 20. издание на фестивалот на европски филм „Синедејс“. Фестивалот ќе се одржи на отворено на повеќе локации во Скопје, а ќе трае до 21 јули. Ќе бидат прикажани повеќе од 40 филма.

„Како увертира на годинешното јубилејно издание во тек е Европското патувачко кино, кое се одвива под отворено небо. Досега ги посетивме Крива Паланка и Струмица, а викендов ни следува Струга, со која ќе го заокружиме загревањето за официјалниот почеток на 20. ‘Синедејс’. Јубилејот го одбележуваме со одлична програма, од која дел донесена директно од Канскиот фестивал, нови наслови и имиња, како и богата музичка програма со која ги враќаме концертите во живот. Годинешнава програма, на наша радост, вклучува и гости од регионот и малку пошироко, некои од нив и физички присутни, други онлајн со свои предавања, мастер-класи и средби со публиката. Особено се гордееме што годинава имаме мастер-клас на највлијателниот европски режисер изминативе 30 години, револуционер на современото кино, господинот Бела Тар. Едноставно, правиме сѐ за да ја надминеме дистанцата и да го живееме и уживаме филмот во оваа топла, летна, скопска недела на ‘Синедејс’“, вели Маргарита Арсова, програмски координатор на фестивалот.

Со слоганот „Филм фактор 20“ филмскиот пулс на „Синедејс“ ќе се прошири во целиот град и програмата се сели покрај вода или во дебела ладовина на POP-UP кинолокациите покрај Вардар, езерцето во Градскиот парк, на врвот на Водно или на Кале, покрај познатите локации како МКЦ, Градскиот парк, паркот „Ибни Пајко“ и за најмладите – два детски филма во киното „Милениум“.

Селектор на програмата на 20. „Синедејс“ е долгогодишниот соработник на фестивалот, Бернд Будер, па и годинава ќе има филмови структурирани во повеќе селекции.

Како дополнителна програма на фестивалот е Living music project со кој на пет филма ќе се изведува музиката во живо, создадена од разни тимови од композитори и режисер, потоа предавање на тема „Музиката во македонскиот филм“ на проф. д-р Александар Трајковски.

Годинава фестивалот првпат соработува со УНИЦЕФ и во негови рамки ќе се одржат работилници и филмски програми, кои ќе ја потенцираат важноста на филмската уметност во процесот на зачувување на животната средина.

На фестивалот публиката ќе има можност да ги види најновите остварувања на Јасмила Жбањич, Андреј Кончаловски, Висар Морина, Џиа Копола, Кирил Сребреников, Вуди Ален, Педро Алмодовар…

Програмата на cinEmusic ни го носи електронскиот состав Bella Technika, бенд составен од два члена на веќе непостојниот Дарквуд Даб, потоа новата сензација на домашната сцена, Дина Јашари, загрепскиот феномен Свемирко и за затворање – швајцарските инструментални магови од L’éclair, првпат во Скопје.

Билетите ќе бидат по цена од 100 денари за сите филмови, освен за филмовите од POP-UP КИНО, кои се бесплатни. Билетите може да се купат онлајн, преку bileti.mkc.mk, како и на самиот влез на овие локации.