Култура
Поранешниот советник на Путин, Витали Мански, претседател на жирито на „Киненова“
Витали Мански, режисерот што се спротивстави на најмоќните светски лидери оваа година, е претседател на жирито на „Киненова“. Кога станува збор за современата документаристика, во свет во кој социјалните мрежи одиграа главна улога во револуционерната арапска пролет, многу е тешко за еден филмаџија да најде автентична приказна која веќе медиумски не е преџвакана. Ова особено се однесува за јавните личности, вклучувајќи ги и светските лидери, за чија медиумски коректна слика се грижат куп луѓе во заднина. Тогаш како да се навлезе подлабоко во една приказна и да се претстави пред публиката откривајќи нешто што досега таа не го видела?
Витали Мански, едноставно, ѕирна во својата домашна архива и на светот му подари неверојатно документаристичко дело во кое ја следиме вистинската историска приказна за подемот на Владимир Путин, кој од нигде никаде одеднаш ја презема големата Русија под свое. Личниот соработник на поранешниот агент на КГБ одблизу имал можност да биде сведок на сите случувања во врска со новиот месија, честопати документирајќи ги и домашните случувања на кои присуствувале најблиските луѓе на новиот претседател. Но, по одредено време, кога од доволна дистанца Мански го гледал целиот тој материјал, со поинаков пристап и побистар поглед, спакуван во документарен филм, тој праќал сосема нова слика за семоќниот лидер.
Како увертира пред ова генијално доку-сведоштво, авторот пред три години го реализира исто така контроверзниот и освестувачки документарен филм за Северна Кореја со наслов „Под сонцето“ (Under the sun). Мански по покана на Кин Јонг-ил одреден период престојувал во таа држава за да сними филм според строго контролирано сценарио за едно семејство во исчекување на роденденот на лидерот, но рускиот автор не секогаш ја гасел камерата кога ќе се викнело „стоп!“ Поради сето ова, Мански со сопругата токму од 2015 година живее во самоегзил во Латвија, честопати во интерјуата истакнувајќи дека по вакви слободоумни остварувања, тие се плашат за сигурноста во својот понатамошен живот.
„Путиновите сведоци“, остварувањето што минатата година беше прогласено за најдобар документарен филм на престижниот фестивал во Карлови Вари, домашната публика ексклузивно ќе може да го види во рамките на „Киненова“ во присуство на авторот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денеска ќе биде погребана Брижит Бардо
Француската филмска актерка Брижит Бардо, која почина минатиот месец на 91-годишна возраст, денеска ќе биде погребана во летувалиштето Сен Тропе на француската ривиера, објави Ројтерс, повикувајќи се на локалните власти.
Погребната церемонија ќе се одржи во 10 часот во црквата „Нотр Дам де л’Асумпсион“, по што Бардо ќе биде погребана во строга приватност на градските гробишта. Комеморација отворена за граѓаните и обожавателите ќе се одржи во старата градска четврт Ла Понш.
Бардо светската слава ја стекна со филмот „И Бог ја создаде жената“ и стана една од најголемите икони на француската поп-култура. По повлекувањето од филмот во 1973 година, се посвети на заштита на животните, но подоцна беше контроверзна фигура поради своите политички ставови.
Култура
Почина Георги Сталев Поповски
Друштвото на писателите на Македонија информира дека на 30 декември 2025 година, во 95. година од животот, почина Георги Сталев Поповски, поет, прозаист, преведувач, драмски писател, научен работник и поранешен универзитетски професор, доктор по филолошки науки и најстар член на писателската асоцијација.
Георги Сталев Поповски е роден на 22 април 1930 година во Витолиште, а почина во Скопје. Високото образование го завршил на Филозофскиот факултет во Скопје. Во текот на својата богата професионална кариера, меѓу другото, бил и долгогодишен уредник на списанието „Современост“.
Член на Друштво на писателите на Македонија бил од 1956 година, како прв член примен во Друштвото по заслуга на своите достигнувања во областа на книжевниот превод.
Поповски е добитник на бројни признанија и награди, меѓу кои двапати наградата „Димитар Митрев“ на Друштвото на писателите на Македонија за книжевна критика и есеистика, наградата „Златен лавров венец“ за најдобар драмски текст на фестивалот „Мали и експериментални сцени“ во Сараево (1972), наградите „Григор Прличев“ и „Кирил Пејчиновиќ“ за книжевен превод, медалот од Фондот „Лермонтов“ во Москва, како и македонските државни награди „11 Октомври“ и „Св. Климент Охридски“, како и наградата на Град Скопје „13 Ноември“.
Тој останува актуелен и во 2025 година како еден од авторите на збирката раскази Она што се памети живее („Никогаш докрај раскажани приказни“) во издание на ДПМ, во која е застапен со расказот „Доста ми е власт играње“ – сеќавање на неговиот татко, Стале Попов, корифејот на македонскиот роман.
Култура
Македонска премиера на „Приказната за Силјан“ – филм создаден за домашната публика што допре до светот
Документарниот филм „Приказната за Силјан“, во режија на Тамара Котевска, синоќа ја имаше својата македонска премиера во Македонскиот народен театар во Скопје.
Режисерката Тамара Котевска изјави дека филмот првенствено бил создаден за домашната публика, без амбиција да стигне толку далеку на меѓународната сцена, додавајќи дека токму реакцијата од македонските гледачи за неа има најголема тежина.
Таа посочи дека, иако ѝ е драго што филмот бил прикажан и прифатен од светската публика, најважно ѝ е што ќе го гледаат луѓето низ цела Македонија. Котевска најави дека се планираат премиери и проекции во сите градови, нагласувајќи дека жителите на помалите места заслужуваат да имаат можност да го видат филмот.
„Мило ми е што го виде светот, но повеќе од сè ценам што го видовте денес сите вие и што допрва ќе го гледа цела Македонија“, истакна Котевска.
Таа нагласи дека луѓето како Никола и неговото семејство се суштината на приказната и причината зошто создава вакви филмови, додавајќи дека особено ѝ значи да ги раскажува и приближува приказните од помалите и поскриени средини во Македонија, кои, како што рече, се суштински дел од културата и светот во кој живееме.
„Приказната за Силјан“ имаше светска премиера на Венецискиот фестивал, и доби повеќе значајни меѓународни признанија.
Државниот врв на премиерата на „Приказната за Силјан“ во МНТ: „Добивме вредно филмско остварување“

