Култура
Прекрасна вечер на саксофони на „Охридско лето“

За љубителите на класичната музика, фестивалот „Охридско лето“ синоќа приреди прекрасен концерт на гудачки инструменти со „Фукио саксофон квартет“ од Шпанија. Со нивната изведба и добро одбраниот репертоар, членовите на овој состав ги задоволија вкусовите и на стручните лица од светот на класичната музика кои вообичаено ги има на секој фестивалски концерт.
Публиката и синоќа си замина задоволна од она што имаше можност да го слушне, но и самите уметници кои се четворица пријатели, заминуваат по настапот на „Охридско лето“ со силни импресии и од настапот, и од она што го видоа во Охрид.
„Во Охрид, и воопшто во Македонија сме првпат. Стигнавме петокот и добро беше што имавме можност да го видиме овој град, овие прекрасни глетки и превкусната храна. Првиот ден се одморивме и уживавме во убавините на градот, а следниот ден се почувствувавме инспирирани и вежбавме. Среќни сме што и покрај ситуацијата со Ковид-19, сепак дојдоа луѓе во публиката кои не ја изоставаат музиката“, рече алт саксофонот, Хавиер Ларсон Паез.
Од основањето на овој состав во 2007 година, квартетот е интензивно посветен на истражувањето на камерната музика за саксофон.
„Ние имаме многу разновиден репертоар кој вклучува и наши оригинални дела за саксофонски квартет. На фестивалот „Охридско лето“ се потрудивме да ги претставиме сите можности на саксофонот, сите негови страни“, изјави тенор саксофонот Хозе Мануел Бањулс Маркос.
„Фукио саксофон квартетот“ изведе дела од чешкиот композитор Антонин Дворжак, од шпанскиот композитор и пијанист Исак Албениц, делото „Фугата“ од Астор Пјацола, гудачки квартет од Мајкл Ниман,а на репертоарот беа и Интермецо бр.1 од мексиканскиот композитор Мануел Мариа Понсе во аранжман на Фукио квартетот, како и делото „Градови“ од композиторот Лаго.
„Нашите планови за иднина како квартет саксофони се да продолжиме со музиката и се повеќе и повеќе да се усовршиме. И секако, да посетиме многу други убави места како Охрид“, рече сопран саксофонот Жоакин Саес Белмонте.
Шпанските музичари кои се обединети во еден од највозбудлиивите млади саксофон квартети во Европа, настапуваат во во голем број европски земји. Тие се активно посветени на порачки на нова музика за нивната формација, а се насочени и кон образовната работа со млади, па често одржуваат мајсторски курсеви и работилници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.