Култура
Промоција на книгата „Во потрага по Роберт Џонсон“ на Питер Гуралник

На 22 февруари, со почеток во 20 часот, во Клуб-ресторанот МКЦ ќе се одржи промоција на музичката биографија „Во потрага по Роберт Џонсон“ на американскиот автор Питер Гуралник, а во издание на издавачката куќа „Авант прес“ од Скопје.
Роберт Џонсон е еден од најпознатите и сигурно најславниот меѓу сите рурални блузери. Како што вели популарната легенда за него, тој си ја продал својата душа на ѓаволот една ноќ на некој крстопат во Мисисипи во замена за вештини за свирење гитара. Веројатно неговата музика и свирење им се чинеле толку недостижни и како да не се од овој свет, поради што за него се плеткале приказни за спогодбата што била направена. Џонсон бил фантом кој талкал по САД каде што настапувал по разни фарми, клубови, ресторани, веселби, без многу да се знае за него. За време на својот краток, но бурен и динамичен живот, сè што оставил зад себе се снимени 29 песни и многу митови и легенди.
За многумина, тој е најголемиот блузер на сите времиња, односно се смета за таков од страна на модерната популарна култура. Со самото тоа тој си обезбедил свое место во пантеонот на музичките легенди, но неговото влијание било огромно и не било ограничено на блузот, туку допрело до сите популарни жанрови денес, повеќе од која било друга блуз фигура. Од неговата музика, покрај блуз музичари кои ги свиреле неговите песни како Мади Вотерс, Елмор Џејмс, Хаулин Вулф и многу други, негови песни се снимени и од плејада популарни рок-музичари од Ролинг Стоунси, Ерик Клептон, Лед Цепелин, Ред хот чили пеперс, Боб Дилан, Питер Грин, Касандра Вилсон, Дорс, Вајт страјпс.
Од времето кога починал на 27 години во 1938 г., разни колекционери и луѓе трагале по информации и сведоштва за неговиот живот и музика. Питер Гуралник е еден од тие кои трагале по неговата оставштина и своите искуства ги ставил во оваа книга. Гуралник е еден од најпознатите американски музички автори и историчари со книги кaкo Last Train to Memphis: The Rise of Elvis Presley, Dream Boogie: The Triumph of Sam Cooke, Sweet Soul Music: Rhythm and Blues and the Southern Dream of Freedom и многу други. Соработувал и со режисерот Мартин Скорсезе на неговиот серијал документарни филмови за блуз музиката.
Преводот на книгата е на Ненад Георгиевски, а промотор на промоцијата ќе биде архитектот, фотограф и колекционер на музика, Ангел Ситновски. На промоцијата ќе настапи и познатото блуз дуо In the Mood во чиј репертоар се застапени многу од песните на Џонсон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Поетско читање во Њујорк

Минатата недела со поетско читање на македонски и англиски јазик во преполната сала, дел од Њујоршката јавна библиотека (New York Public Library) во Њујорк, Никола Маџиров го отвори Светскиот поетски салон во рамките на Фестивалот на светската литература и уметност (World Literature and Arts Festival) кој се одржува од 14-ти до 30-ти април во салите на Њујоршката јавна библиотека.
На сцената пред околу сто и педесет присутни гости, Никола Маџиров настапи заедно со американската џез композиторка, пејачка и мултиинструменталистка Бека Стивенс, двапати номинирана за музичката награда Греми и редовна соработничка на современиот музички гениј Џејкоб Колиер — шесткратен добитник на Греми, на американскиот џез состав „Снарки Папи“ — добитници на пет Греми награди, како и на рок-легендата Дејвид Крозби — членот и основач на „Крозби, Стилс, Неш &“Јанг.
Бека Стивенс, заедно со лидерот на „Снарки Папи“ — Мајк Лиг, веќе компонираа песна според стиховите од песната „Окото“ (The Eye) на Никола Маџиров, која таа ја исполни на отворањето на Поетскиот салон во Њујорк, а истата вечер премиерно ја изведе и нејзината нова композиција „Ние немаме сон“ (We Have No Sleep) според истоимената песна на Маџиров.
Оваа композиција ќе се најде на еден од следните албуми на Бека Стивенс. По заедничкиот поетско-музички перформанс, следуваше разговор на Маџиров со аргентинскиот поет-полиглот, универзитетски професор и преведувач на Песоа и Пизарник — Патрицио Ферари. Настанот беше во организација на „Њујорк Паблик Лајбрери“ и „Лајмлајт Поетри“ од Њујорк.
Според стиховите на Маџиров веќе имаат компонирано американската композиторка и добитничка на Пулицеровата награда за современа опера — Дујун, американскиот авангарден џез композитор и соработник на Бјорк и Лу Рид — Оливер Лејк, македонскиот пијанист и џез композитор — Гордан Спасовски, како и композитори на џез, опера и класична музика од Германија, Италија, Литванија, Естонија.
Култура
Неколкудневна турнеја на Театар Провокација низ регионот со „Земја на штркови“

Театар Провокација ја најавува својата неколкудневна турнеја низ регионот, со претставата „Земја на штркови“, која започнува на 13-ти мај, со учеството на фестивалот „Друмеви театрални празници“ во Шумен, Р. Бугарија, по кое следуваат и гостувањата во Србија (од 15.05 до 18.05) низ градовите: Белград, Вршац и Панчево.
Претставата „Земја на штркови“ отворено зборува за големиот бран на иселување на македонците во последниве неколку години и за очајната потреба од системски промени, како главна причина за заминување на младите во поразвиените земји.
Скопската публика оваа претстава ќе може да ја погледне во среда, 23-ти април во МКЦ со почеток од 20:00.
Во претставта играат: Мирјана П.Ристов, Радо Алексовски, И.Јакимова и Р. Ристов. Текстот е работен по мотиви од „Топлината во ноември„ од Јана Добрева, костимите се на Елена Лука, автори на музиката е на Оливер Јосифовски и Давор Јордановски, вокалот е на Вера Милошебвска – Љубојна, сценските движења на Кренаре Невзати а адаптацијата на текстот, сценографијата и режијата се на Роберт Ристов.
Култура
Почина Тоше Поп-Симонов

Истакнатиот македонски композитор, продуцент и аранжер, Тоше Поп – Симонов почина денеска на 63 годишна возраст.
Поп-Симонов својата музичка кариера ја започна во 1980-тите, како еден од основачите и гитарист на култната скопска рок група „Бастион“, а потоа и гитарист на рок бендот „Асторија“.
Тој остави силен белег на македонската музика во периодот на 1990-тите, кога соработуваше со речиси сите позначајни имиња од поп, рок, како и од фолк сцената во земјава и изведувачи од регионот, меѓу кои и Тоше Проески, Мизар, Архангел, Меморија, Анастасија, Дарио, Верица Пандиловска, Силви бенд, „Фрајле“ и Алка Вуица.
Неговите пријатели и соработници се простуваат од него со објави на социјалните мрежи.
Погребот на Поп-Симонов ќе се одржи во вторник, на 22 април 2025 година, на градските гробишта во Бутел од 11:30 часот.