Култура
Промоција на „Самодиви: панорама на македонската поезија пишувана од жени, од преродбата до денес“

Вечерва, 14 септември, од 19 часот, во дворот на градската библиотека „Браќа Миладиновци“ – Скопје, ќе се одржи промоција на „Самодиви: панорама на македонската поезија пишувана од жени, од преродбата до денес“, приредена од Славе (Ѓорѓо) Димоски и Јулијана Величковска, издание на „Поетска ноќ во Велестово“.
Изданието содржи песни од 114 поетеси, што живееле/живеат и твореле/творат во Македонија од времето на преродбата, сè до ден-денес. Книгата е поддржана од Министерството за култура, а промоцијата е дел од богатата понуда на Град Скопје – кандидат за европска престолнина на културата за 2028 година.
Промотори на книгата ќе бидат приредувачите Славе (Ѓорѓо) Димоски и Јулијана Величковска.
Стихови ќе читаат: Гордана Михаилова-Бошнакоска, Сеида Бегановиќ, Дијана Петкова, Елизабета Баковска, Ана Димишковска, Сузана В. Спасовска, Маја Апостолоска, Ана Стојаноска, Емељ Туна, Николина Андова-Шопова, Билјана Стојановска, Александра Спасеска, Ана ГолејшкаЏ-икова, Катерина Гогова, Лира Бојку, Христина Цветаноска, Ивана Јовановска и Софија Тодороска.
„Бранот на романтизмот што ја зафатил Македонија во средината на XIX век, всушност, го претставува зародокот на македонското женско творештво. Врз него е изградено и современото македонско женско авторство, како впрочем и целокупната современа македонска книжевност“, вели во предговорот вСлавчо Ковилоски.
„Нè радува фактот што современата генерација авторки е рамноправна на книжевната сцена освојувајќи значајни меѓународни поетски награди, членувајќи во жиријата за доделување награди, а некои од нив се и издавачи, организатори на поетски фестивали и слично. Особена надеж полагаме во најновата генерација поетеси и со нетрпение чекаме да го посведочиме нивниот голем успех. Прославувајќи ги овие исклучителни гласови на македонските поетеси свесни сме за дострелите на македонската поезија воопшто, а нивното поетско писмо претставува растреперен лирски нерв моќен да разбуди емпатија, разбирање и длабока човечност“, ќе истакнат Славе (Ѓорѓо) Димоски и Јулијана Величковска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
(Видео) Tри филма што Скорсезе ги смета за врв на кинематографијата

Мартин Скорсезе, еден од највлијателните американски режисери, со децении ги поместува границите на филмскиот израз. Неговата филмографија опфаќа широк опсег на жанрови – од насилни урбани приказни до сложени љубовни драми и духовни дилеми.
Иако неговите понови филмови како Ирецот и Тишината сè уште се препознатливи по нивната визуелна раскош и длабока анализа на ликови, многумина сè уште сметаат дека неговите најголеми дела потекнуваат од поранешниот период – со насловите Таксист, Добри момци и Разгеневниот бик.
Во текот на својата кариера, Скорсезе често ги издвојуваше режисерите кои го инспирираа, меѓу кои и Акира Куросава, Ингмар Бергман и Џон Форд. Сепак, еден особено го допре – јапонскиот режисер Кенџи Мизогучи, познат по класичните филмови кои прикажуваат емоции преку поетски ритам и внимателно изработени слики.
Како негов омилен го наведува филмот на Мизогучи, Приказни под месечината и дождот (Ugetsu monogatari), од 1953 година, кој ја следи приказната за амбициите, љубовта и војната во 16 век.
„Овој филм имаше најголемо влијание врз мене. Има моменти во тој филм што ги гледав одново и одново и кои секој пат ми го одземаат здивот“, рече Скорсезе, пренесе магазинот „Фар аут“.
Иако Приказни под месечината и дождот често се смета за ремек дело, Скорсезе ја цени целата трилогија која ги вклучува и Животот на Охару (Saikaku ichidai onna) и Саншо судијата (Sanshô dayû), за која вели дека е „врвот на светската кинематографија“.
Работата на Мизогучи го отелотворува она што многумина го сакаат во јапонскиот филм – суптилност, емоции и елеганција. Неговото влијание може да се види и кај современите режисери како Хироказу Коре-еда кој го комбинира секојдневниот живот со длабоки емотивни слоеви. Восхитувањето на Скорсезе кон Мизогучи е уште еден доказ за неговата длабока поврзаност со филмската историја – и неговата непоколеблива почит кон мајсторите на визуелното раскажување приказни.
Култура
МКЦ – Битола ќе го одбележи Меѓународниот ден на џезот со концерт на „Филип Динев трио“

Младинскиот културен центар – Битола (официјален младински клуб на УНЕСКО) за одбележување на Меѓународниот ден на џезот ќе организира концерт во живо на Филип Динев Трио во среда на 30 април 2025 година со почеток во 22.00 часот, во кафе бар Порта Џез во Битола.
Филип Динев е македонски гитарист/композитор со интернационална кариера. Магистрант на ХФМТ Хамбург, автор и продуцент на 2 оригинални изданија – „Romann“ (2024) и „Szvetlo“ (2020).
Париз, Будимпешта, Базел, Талин, Берлин, Хамбург, Лајпциг и Дрезден се само дел од европските градови каде Динев има концeртирано. Композиторскиот печат и виртуозноста со влијание од класична, балканска и традиционална џез музика го прават Динев еден од најавтентичните гитаристи во регионот и Европа. Покрај авторските концерти, свирел и со светски имиња, како Nils Landgren, China Moses и Teemu Viinikainen.
Филип Динев – гитара/композиции
Андреа Мирчевска – контрабас
Дамјан Грујо – тапани
Влезот за концертот е бесплатен.
Овој концерт по единаесетти пат ќе ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Култура
„Кои се правата на писателите“ – трибина во ДПМ

Во просториите на Друштвото на писателите на Македонија утре, 25 април, со почеток во 19 часот ќе се одржува трибината „Кои се правата на писателите?“.
На трибината ќе учествуваат познатите автори, членови на Друштвото на писателите на Македонија: Делвина Крлуку, Блаже Миневски, Билјана Црвенковска, Игор Станојоски и Петар Андоновски. Модератор ќе биде претседателот на ДПМ, Живко Грозданоски.
„Авторските права се нешто за што ретко се разговара, особено во книжевниот свет во Македонија, иако тие ги засегаат сите чинители во областа на издаваштвото, а најмногу писателите, преведувачите, илустраторите, и секако – издавачите.
Што значи сопственост на авторски права? Кога, како и под кои услови таа се отстапува на издавачи или на агенти? Како се вреднуваат авторските права и колкава треба да биде висината на авторскиот хонорар при издавање на едно дело? Како се проценува авторскиот хонорар од страна на издавачот и како се проценува од страна на Министерството за култура и туризам кога се работи за конкурсите за поддршка на дела од национален интерес? На кои начини авторите да се запознаат подобро со овие проблеми и како да се изборат за фер и транспарентен однос? Најпосле, која е улогата на Друштвото на писателите на Македонија во овој контекст?“, се наведува во соопштението на ДПМ.