Култура
Светлана (Цеца) Бојковиќ доаѓа во Македонија

Комедијата „Цело тело тука ме боли“ ќе се изведе првпат во Македонија на 8 април во Национална опера и Балет.
Улогите им се доделени на актерите Радован Вујовиќ, Андријана Оливериќ, Светлана Бојковиќ, а текстот и режијата е на Никола Пејаковиќ.
Комедијата „Цело тело тука ме боли“ си поигрува со актуелните, современи болести на општеството, комбинирајќи ги со проблемите на сите времиња што го следат односот меѓу доминантна мајка и син единец; врска што се движи од жестоки конфликти до крајно интимни односи, во кои доминира малограѓанството на мајката и разгалувањето на синот.
Мајката решава тајно, без знаење на синот, да пишува огласи и да ги залепи околу Кошутњак и Баново Брдо дека син ѝ држи часови по математика за да го раздвижи и да го извлече од апатијата и екстремната депресија во која западнал. Двајцата живеат во голема куќа на Баново Брдо. Неговиот татко и нејзин сопруг Живан одамна умрел, а двајцата живеат досаден и монотен живот во неприродна заедница.
Синот не прави ништо и тоне во целосна незаинтересираност за животот и за светот надвор. Едно утро во таа куќа влегува млада жена, на која ѝ треба настава по математика. Иницира цела низа ситуации, кои на крајот, со многу комични пресврти, драматично влијаат на нивните животи. По тоа утро, ништо во нивните животи нема да биде исто.
Делото е создадено врз основа на мотивите од „Лекција“ на Ежен Јонеско и раскажува апсурдна приказна за нашето време, кое на многу начини може да се нарече – време на апсурдот.
Иако изгледа речиси дневно-политички актуелна, оваа приказна допира проблеми кои се стари откако постои човекот. Општеството тоне во грев и простатлак, без разлика што одредени делови силно му се спротивставуваат. Публиката ќе ги препознае настаните и ликовите од околината, ќе се смее и исмејува со оние на сцената. Оваа претстава никого не аболира, сите се виновни, нема невини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Неколкудневна турнеја на Театар Провокација низ регионот со „Земја на штркови“

Театар Провокација ја најавува својата неколкудневна турнеја низ регионот, со претставата „Земја на штркови“, која започнува на 13-ти мај, со учеството на фестивалот „Друмеви театрални празници“ во Шумен, Р. Бугарија, по кое следуваат и гостувањата во Србија (од 15.05 до 18.05) низ градовите: Белград, Вршац и Панчево.
Претставата „Земја на штркови“ отворено зборува за големиот бран на иселување на македонците во последниве неколку години и за очајната потреба од системски промени, како главна причина за заминување на младите во поразвиените земји.
Скопската публика оваа претстава ќе може да ја погледне во среда, 23-ти април во МКЦ со почеток од 20:00.
Во претставта играат: Мирјана П.Ристов, Радо Алексовски, И.Јакимова и Р. Ристов. Текстот е работен по мотиви од „Топлината во ноември„ од Јана Добрева, костимите се на Елена Лука, автори на музиката е на Оливер Јосифовски и Давор Јордановски, вокалот е на Вера Милошебвска – Љубојна, сценските движења на Кренаре Невзати а адаптацијата на текстот, сценографијата и режијата се на Роберт Ристов.
Култура
Почина Тоше Поп-Симонов

Истакнатиот македонски композитор, продуцент и аранжер, Тоше Поп – Симонов почина денеска на 63 годишна возраст.
Поп-Симонов својата музичка кариера ја започна во 1980-тите, како еден од основачите и гитарист на култната скопска рок група „Бастион“, а потоа и гитарист на рок бендот „Асторија“.
Тој остави силен белег на македонската музика во периодот на 1990-тите, кога соработуваше со речиси сите позначајни имиња од поп, рок, како и од фолк сцената во земјава и изведувачи од регионот, меѓу кои и Тоше Проески, Мизар, Архангел, Меморија, Анастасија, Дарио, Верица Пандиловска, Силви бенд, „Фрајле“ и Алка Вуица.
Неговите пријатели и соработници се простуваат од него со објави на социјалните мрежи.
Погребот на Поп-Симонов ќе се одржи во вторник, на 22 април 2025 година, на градските гробишта во Бутел од 11:30 часот.
Култура
„Јон Вардар против Галаксијата“ се прикажува на меѓународниот филмски фестивал во Москва

Првиот македонски долгометражен анимиран филм „Јон Вардар против галаксијата“ на Гоце Цветановски синоќа беше премиерно прикажан во Москва, во рамки на престижниот Moscow International Film Festival (Меѓународен филмски фестивал – Москва).
Московскиот фестивал важи за еден од најголемите во светот и е класифициран во А листата на филмски фестивали, заедно со Кан, Берлин, Венеција.
Основан е во 1935 година, a редовно почна да се одржува од 1959 година. Фестивалот е познат по тоа што комбинира светски премиери, авторски филмови и амбициозни независни продукции од различни земји.
„Јон Вардар против галаксијата“ денес ќе има уште една проекција во Москва.
Првиот македонски долгометражен анимиран филм успешно го продолжува својот фестивалски живот, откако минатата недела се прикажуваше и на меѓународниот фестивал во Буенос Ајрес, БАФИЦИ, кој се смета за најголемиот и најважен фестивал за независен филм во Латинска Америка.
„Јон Вардар против Галаксијата“ е поддржан од Агенцијата за филм, со копродукции во Унгарија, Бугарија и Хрватска. Продуценти на филмот се Алан Кастиљо од „Линкс студио”, Ева Конрад, браќа Калинови и Ладо Скорин, арт директор е Михајло Димитриевски-Тхе Мичо, а директор на анимација е Димитар Ѓоргиев. Во главните улоги настапуваат Жарко Димовски, Дамјан Цветановски и Емилија Мицевска.