Култура
Соработка меѓу Националниот џез-оркестар и академскиот сликар Сергеј Андреевски

„Сликам како џез-музичар“, ќе рече за себе Сергеј Андреевски. „Јас сум сликар што често патува и сонува низ светот вкрстувајќи ги четките и насочувајќи ги своите потези кон сонцето. Светот е моето ателје. Мојата творечка припадност е стилот на постекспресионизмот, а тоа е бесконечна слобода на изразувањето. Звукот е мојот партнер при создавањето. Особено џезот оти јас кога сликам, импровизирам – не случајно велам дека сликам како џез-музичар“.
Со оваа изјава на академскиот сликар Сергеј Андреевски беше најавена соработка меѓу Националниот џез-оркестар и академскиот сликар Сергеј Андреевски.
Имено, оваа година дизајните на плакатите за концертите на Националниот џез-оркестар ќе содржат дела на овој истакнат ликовен уметник со меѓународна кариера. Неговото творештво се движи во границите на постекспресионизмот, а импровизацијата и слободата на изразувањето се едни од главните одлики на џез-музиката, па вксрстувањето на нашите сродни сензибилитети веруваме дека неминовно ќе вроди со плод.
Сергеј Андреевски (1960, Скопје) дипломирал на Факултетот за ликовни уметности во Скопје во 1985 година. Во текот на својата кариера добитник е на повеќе стипендии за студиски престој во странство, меѓу кои може да се издвојат оние во Рим („Галерија ди арте модерна“, 1987/88), Нирнберг во 1991 година, потоа во Архус, Данска; Cité des Arts Internationale-Paris, Франција; Acme Art Studios, Вилмингтон, САД; Asolare Fine Arts Foundation, Лексингтон, САД; Imadate, Јапонија; Pi Artworks, Истанбул, Турција; Cromarty Arts Trust, Кромарти, Шкотска; In Situ, Александрија, Египет; Al Maken, Тунис и други.
Андреевски има реализирано над 60 самостојни претставувања во светот, меѓу кои изложбата „Неизложени дела на хартии,“ Општинска галерија REMEZZO во Каламарија, Солун, Грција; АЗБУКА, Народен музеј „Конак кнегиње Милице“, Белград, Србија; Имадате, Јапонија – Музеј на современа уметност; изложби во Фетвил (Fayetteville), Северна Каролина, САД – Музеј на модерна уметност; Париз, Франција – Cité des Arts Internationale; Њујорк, САД – Lincoln Centre, Cork Gallery at Avery Fisher Hall; Франкфурт на Мајна – LHB Bank, Gallery New Europe; Салзбери (Salisbury), Северна Каролина, САД – Waterworks Visual Arts Center, како и многубројни изложби во земјата. Бил дел и од над 200 групни претставувања во светот.
Основач е на меѓународниот центар за уметност и одржлив развој „Арт поинт – Гумно“, со седиште во с. Слоештица, каде што е и куратор на Меѓународната уметничка резиденција и колонија, што успешно се реализира од 2003 година.
Добитник е на повеќе награди и признанија.
Неговите дела се дел од поставките на државни институции, музеи и приватни колекционери во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Изложбата по повод 45 години од основањето на ФЛУ – Скопје ќе биде отворена до 16 мај

Факултетот за ликовни уметности – Скопје информира дека ревијалната изложба поставена во Музејот на современата уметност, по повод 45-годишнината од основањето на факултетот, останува отворена за посетителите до 16 мај (четврток), 2025 година.
Изложбата, која беше отворена на 3 април, во рамките на централниот настан за одбележување на 45-годишниот јубилеј на ФЛУ, претставува резултат на долгогодишната заедничка соработка меѓу Факултетот за ликовни уметности и Музејот на современата уметност, со цел да се одбележи богатото наследство и креативниот придонес на факултетот во развојот на македонската и регионалната уметничка сцена. Поставката симболично го прикажува континуитетот и еволуцијата на уметничките изрази што се развиваа во текот на четири и половина децении.
Изложбата прикажува избор на 45 дела од 45 автори, од колекцијата на МСУ, како и дела во сопственост на уметниците – наставен кадар на ФЛУ, почнувајќи од неговото основање до денес. Преку внимателно селектирани дела и архивски материјали, изложбата нуди ретроспективен поглед врз речиси половина век дејствување на ФЛУ како носител на ликовното образование и уметничка мисла во земјата.
Овој избор има за цел да ја отслика разновидноста на уметничките практики и правците што се развивале низ годините, нагласувајќи го нивниот континуиран дијалог со современите текови во уметноста. Преку оваа изложба, посетителите имаат можност да ги согледаат промените во визуелниот јазик и концептуалните пристапи што ги обликувале уметниците поврзани со ФЛУ, но и поширокиот уметнички контекст во кој тие твореле. Таа е и можност за новите генерации да се запознаат со историјата на институцијата, но и со нејзината улога во обликување на иднината на уметноста кај нас.
Култура
Објавени наградите за меѓународниот книжевен фестивал „Отворен круг”

Фондацијата за културна и научна афирмација и презентација Македонија презент од Скопје денес ги соопшти наградите и признанијата за Меѓународниот книжевен фестивал „Отворен круг”.
Фестивалот е традиционален и годинава ќе се одржи на 15 мај, со почеток во 12 часот, во Културниот центар „Феникс” во Скопје.
Како и минатата година, и годинава ќе бидат доделени вкупно седум награди и признанија и тоа: „Балкански книжевни видици” на писателот Селимир Радуловиќ (Нови Сад) – за меѓународни книжевни вредности и релации; „Отворен круг” на писателот Стефан Марковски – за иновации и експерименти во книжевноста; „Премостувања” на писателот Шаип Емерлаху – за презентација и афирмација на македонското литературно творештво на Фестивалот „Денови на Наим Фрашери” во Тетово; „Хаикин“ на писателката Елена Пренџова – за посебен придонес во Хаику поезијата; „Литературни координати” на писателката Роза Бојанова (Бугарија) – за соработка и доближување на литературите; „Македонски корени” на писателот Ивица Челиковиќ (Шведска) – за неговото литературно и преведувачко творештво и „Големиот Принц” на писателот Мито Спасевски – за придонесот на планот на литературата за деца и млади.
Култура
„Ода на радоста“ – музичка посвета за Денот на Европа од Пламенка Трајковска

По повод 9 Мај – Денот на Европа, македонската виолинистка Пламенка Трајковска потсетува на синглот „Ода на радоста“, инспириран од универзалните европски вредности на мир, заедништво и културна поврзаност.
Во духот на Бетовеновата музика и европското мото „Обединети во различноста“, оваа изведба не е само звучна интерпретација, туку порака на надеж и заедништво во време кога светот повеќе од кога било има потреба од сплотеност.
„Нека музиката не потсети дека Европа не е само географија – тоа се вредности што ги споделуваме и негуваме секојдневно“, вели Трајковска, која со години го поврзува класичниот израз со современ културен ангажман.