Култура
Скопскиот градски фестивал од 11 мај на повеќе локации
Скопје го добива четвртото издание на Скопскиот градски фестивал, кој ќе се одржи од 11 до 13 мај на повеќе локации.
Исто како и минатите три години, и ова издание на Скопскиот градски фестивал е во организација на „Баги комуникации“ и носи возбудливо музичко искуство, кое ќе го овозможат балкански и европски музичари. Сите концерти почнуваат во 20 часот.
На 11 мај (четврток) во салата „Фросина“ во МКЦ ќе настапат:
Елвис Станиќ – најпознатиот хрватски џез-музичар, извонреден гитарист, мултиинструменталист и продуцент, со долгогодишна успешна регионална и меѓународна кариера. Лидер е на групата Elvis Stanic Group, со која настапувал на џез-фестивали во САД, Англија, Холандија, Австрија, Италија, Турција, Германија, Норвешка, Грција, Унгарија, а двапати настапил и на најпознатиот и најголем светски џез-фестивал во Montreaux. 2009 година, како гостин на Lenny White, Bustera Williams и George Calligana, настапил и во престижниот Lincoln Centar во Њујорк. Како музичар и продуцент соработувал со познати имиња од регионалната и светската џез-сцена, меѓу кои со Бошко Петровиќ, Невен Франгеш, Gilberto Gil, Django Bates, Scott Kinsey, Матија Дедиќ, Тамара Обровац, Јосипа Лисац, Martin Drew, Alwin Queen, Bobby Thomas, Hadrien Feraud, Katisse Buckingham, Марио Маврин, Furio di Castri.
AJS Quartet (Albanian Jazz Society Quartet) – квартет составен од најпознатите џез-музичари во Албанија: Gent Rushi – пијано, Ermal Rodi – саксофон и флејта, Roni Gjura – бас, Emilijano Dhimo – тапани. Квартетот има успешна регионална и меѓународна кариера, настапувале на Beijing Tianchang Art Festival во Кина, Roccella Jazz Festival во Италија, Nišville Jazz Festival во Србија, Petrovac Jazz Festival во Црна Гора, Jazz in Albania Festival во Албанија, „Куманово џез-фестивал“ во Македонија, Jazz Appreciation Month. AJS Quartet е организатор на традиционалниот Balkan Jazz Show Case, на кој учествуваат музичари од Балканскиот Регион. Двајца членови на AJS Quartet се дел од академскиот тим на University of Arts во Тирана.
На 12 мај (петок) во големата сала во Филхармонијата настап ќе има најуспешниот и најпознат српски и балкански етносостав „Биља Крстиќ и Бистрик оркестар“.
Биља Крстиќ и „Бистрик“ имаат долгогодишна успешна кариера, со голем број настапи на сите континенти, со добиени голем број награди и признанија, музика создадена за филмови и ТВ-серии, 5 студиски албуми и 2 албума со филмска музика. Нивни албуми издаваат и странски дискографски куќи, меѓу кои ARC Music од Англија, Intuition Shot Music од Германија и V2 (разгранок на Virgin) од Грција. Голем дел од репертоарот на Биља Крстиќ и „Бистрик“ се обработки на македонски традиционални композиции, кои ќе бидат изведени на концертот на Скопскиот градски фестивал.
На 13 мај (сабота), во камерната сала во Филхармонијата, пијанистот Бобан Мирковски ќе го промовира својот најнов музички проект со наслов „Аалбум“, кој содржи 12 врвни македонски композиции изведени на пијано. На концертот ќе бидат изведени некои од најпознатите македонски евергрини, создадени во периодот од 1969 до 2001 година. Ќе бидат застапени дела на некои од најпознатите композитори, меѓу кои Славе Димитров, Љубомир Бранѓолица, Александар Џамбазов, Григор Копров, Влатко Стефановски, Кире Костов, Љупчо Мирковски, Тодор Бојаџиев, Димитар Масевски и Ванчо Димитров. Сите композиции ќе бидат изведени со нови аранжмани, специјално создадени за оваа пригода.
Концертната промоцијата ќе се одржи под слоганот „Ја чуваме македонската музика“.
Во периодот од 26 мај до 5 јуни во МКЦ ќе биде отворена изложба на македонски музички плакати. На изложбата ќе бидат претставени плакати на македонски музичари и групи од изминатите три децении и ќе биде своевиден пресек на музичкиот дизајн кај нас и документ за 30-годишното постоење на македонската музичка сцена.
Фестивалот е поддржан од Министерство за култура и Комерцијална банка.
Влезници може да се набават преку платформата www.bileti.mk
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Новогодишен концерт на Зарина Првасевда, „Кадифено“, во Македонската филхармонија
На 20 декември со почеток во 19 и 30 часот во Македонската филхармонија концерт ќе одржи македонската вокална интерпретаторка и музичарка Зарина Првасевда.
На денешната прес-конференција беа споделени детали за концертот „Кадифено“, кој претставува уникатно музичко патување што ги спојува традицијата, современиот звук и светската музичка виртуозност.
Овој проект ја означува премиерата на новиот музички опус на Зарина Првасевда, каде интимниот и длабоко емотивен израз се испреплетуваат со македонската и ориенталната традиција, добивајќи современа звучна форма низ импровизација и модерен сензибилитет.
„Овој концерт за мене е многу личен процес и еден вид враќање кон корените, но и нивно преосмислување. Материјалот што ќе го изведам произлегува од македонската и ориенталната музичка традиција, но е создаван низ слобода, импровизација и современ звучен јазик. Сакав публиката да го почувствува овој концерт како интимен простор – како заедничко доживување во кое музиката не е само изведба, туку разговор, емоција и трансцедентност“, изјави Евгенија Здравевска, позната под својот уметнички псевдоним Зарина Првасевда.
Гостите од Турција, Џенк Еродоган, светски познатиот виртуоз на фретлес гитара и Греми награден уметник како и перкусионистот и мултиинструменталист Ахмет Алан, беа оправдано отсутни поради доцнење на нивниот лет за Скопје од повеќе од два часа, предизвикано од густата магла над Скопје, изјавија организаторите.
Џенк Ердоган е Греми награден композитор и еден од највлијателните фретлес-гитаристи во светот. Како дипломец со First Class Honours и предавач на Berklee College of Music, тој е врвно интернационално име. Добитник е на Yeşilçam награда за Најдобар саундтрак, настапувал со светски музичари како светски познатиот индиски перкусионист Трилок Гурту и американскиот џез фјужн тапанар Дејв Врекл како и турнеи низ Европа и САД.
Ахмет Алан е турски перкусионист кој свири традиционални инструменти како бендир. Гордо го комбинира богатството на турската фолклорна музика со современи ритми, давајќи му свеж, жив звук на традиционалниот перкутерски израз. Неговите настапи често се мешавина од енергија, игра и ритам — што ги прави привлечни и за публиката што ја обожава класичната етно-музика, и за оние кои бараат модерни звучни искуства. Со тоа, Алан е мост помеѓу минатото и сегашноста во светот на турската перкусиона музика.
„Кадифено“ е концерт кој ќе понуди искрена емоција, длабока музичка нарација и редок спој на домашна и меѓународна уметничка енергија – вистинско предновогодишно културно доживување.
Билетите за концертот се достапни на веб страната другастрана.мк.
фото/Кристијан Арсовски
Култура
Гоце Цветановски со специјална награда во Белград за придонес во филмската уметност и индустрија
Македонскиот режисер и сценарист Гоце Цветановски доби специјална награда за придонес во филмската уметност и индустрија на 19. издание на Српскиот фестивал за фантастични филмови, еден од најзначајните регионални фестивали посветени на жанровскиот и авторскиот филм.
Свеченото отворање на фестивалот се одржа во Културниот Центар во Белград, во присуство на бројни филмски автори, професионалци и љубители на фантастичниот филм. На настанот присуствуваше и директорот на македонскиот Културно-информативен центар во Белград, Васко Шутаров.
Наградата на Цветановски му беше врачена по проекцијата на оскаровецот „Поплава“, по што следеше панел-дискусија на тема иднината на анимираниот филм во регионот. На панелот, покрај Цветановски, учествуваа и истакнатите автори Растко и Ивана Чириќ, Никола Мајдак и Алекса Гајиќ, кои разговараа за предизвиците, новите технологии и можностите за регионална соработка во современата анимација.
При примањето на наградата, Цветановски се наврати на своите почетоци и емотивната врска со фестивалот:
„Мојата прва награда во кариерата ја добив токму на овој фестивал, за краткиот игран филм ‘Мал дисконтинуитет во време-просторот’ во 2014 година. Затоа ова признание за мене носи особена емоционална и професионална вредност.“
Наградата доаѓа како признание за долгогодишната авторска работа на Цветановски и неговиот придонес во современиот филм, со посебен акцент на фантастичниот и анимираниот жанр.
Култура
Во Центарот за култура „Трајко Прокопиев“ втора меѓународна изложба на уметничка фотографија „Мотус 2025“
Здружението за промоција на интелектуални, мултикултурни и спортски вредности – Мотус од Куманово, преку својот Фото клуб – Мотус, во период од 18 декември (четврток) 2025 во просториите на Центар за култура „Трајко Прокопиев“ во Куманово, ќе ја организира втората Меѓународна изложба на уметничка фотографија Мотус 2025.
На изложбата ќе бидат изложени пеесетина фотографии. Учество зедоа 249 автори од 50 земји.

Финансиер на изложбата е Општина Куманово, преку програмата за подршка на културни манифестации за 2025 година, а истата е под патронат на Меѓународната Федрација на Фотографска Уметност (ФИАП 2025/393), (Фото Сојуз на Македонија (ФСМ 2025/003) и Меѓународна Фото Асоцијација Дунав (ДИПА 2025/054).
Изложбата ќе биде отворена на 18 (четврток) декември 2025 во 19:30 часот во просториите на Центар за култура „Трајко Прокопиев“ во Куманово.

