Во рамките на тридневната посета на Република Италија, министерот Едмонд Адеми, задолжен за дијаспора, денеска оствари работни средби со претседателот на регионалниот парламент на Трст, Пјеуро Мауро Занин, и со потпретседателот Франческо Роко.

Како што информираат од владината прес-служба, на средбата се разговарало за одличните односи на регионот Трст, еден од најразвиените делови на северна Италија, со балканските земји во рамките на економската соработка, културата и традицијата.

Претседателот Занин го пренел интересот за продлабочување на односите со Република Македонија во областа на човековите ресурси, проектни програми, во областа на земјоделството, образованието и културата.

Адеми посочил дека регионот Трст и Република Македонија имаат потреба да ја зајакнуваат и развиваат соработката во насока на инвестициите и пренесување на искуствата во повеќе области на заемни интереси пред сè во областа на економијата, трговијата, земјоделската соработка и во областа на културата и образованието.

Воедно, Адеми и Занин размениле повеќе информации за актуелните политички состојби во двете земји. Станало збор и за дијаспората од Република Македонија, која е распространета во Америка, Европа, а со посебен нагласок на Италија, која е целосно интегрирана во Трст и регионот околу него.

Mинистерот остварил средба и со ректорот на Универзитетот на Трст, Маурицио Фермеглиа, со цел за запознавање на двете страни и  воспоставување основа за идна соработка помеѓу Универзитетот на Република Македонија и Универзитетот од Трст.

Адеми го посетил и центарот на поранешната Воена болница која е адаптирана во Академска институција за тренинг, менторирање, практична настава и усовршување.