Претседателот на Комисијата за европски прашања, Арбер Адеми, имаше работна средба со претставници од Националната конвенција за Европска Унија во Република Северна Македонија, Милева Ѓуровска, Мухамед Хаљими и Никола Јазанџиски.

На средбата, како што информира собраниската прес-служба, Адеми, истакнал дека Националната конвенција за Европска Унија (НКЕУ-МК) е добра платформа која дава можност парламентот и другите релевантни чинители да имаат активна улога, но и која овозможува инклузивна јавна дебата за европската интеграција; потоа таа ја институционализира јавната дебата поттикнувајќи партнерства на различни сегменти во општеството; како и тоа дека ги поврзува носителите на одлуки на сите нивоа на општеството.

Адеми, посочил дека во насока на исполнување на крајната цел на Република Северна Македонија кон овој процес за полноправно членство во Унијата, Собранието на Република Северна Македонија, а поконкретно Комисијата за европски прашања како клучна институција која го следи процесот на пристапување, доследно ќе се раководи од својата контролна улога на овој план и во европски дух ќе продолжи да ја унапредува политиката на целосна поддршка и отвореност кон граѓанското општество.

Во суштина, на оваа средба се потенцираше важноста на Националната конвенција за ЕУ во Република Северна Македонија. Покрај тоа, оваа средба беше одлична можност и за разменување на предлози и идеи за идни заеднички активности, како и унапредување на соработката, со уверување дека во иднина ќе следат заеднички активности. Претставниците на Европското движење срдечно се заблагодарија на можноста за средба и на искрената поддршка што ја дава претседателот Адеми, се наведува во соопштението.