Претседателот на Владата, Зоран Заев денеска во Австрија учествуваше на форумот Европа – Вахау, на којшто воведни обраќања имаа претседателот на форумот и министер за домаќинство, труд и меѓународни односи во Владата на долна Австрија, Мартин Ехтингер, Јоана Микл Летнер, гувернерка на Долна Австрија, како и федералната канцеларка на Република Австрија, Бригите Бирлајн.

На панелот, покрај Премиерот Заев зборуваа и Еврокомесарот за проширување и добрососедство, Јоханес Хан, како и Антонио Тајани, Претседател на Европскиот Парламент.

„Веруваме во Европски вредности можеби повеќе и од некои земји членки. Можеме многу да и дадеме на Европа. Ние сме дел од Европа и ги делиме истите вредности. Мора секогаш да имаме на ум дека Европа е формирана за да биде најмоќна заедница“, истакна Премиерот Заев во одговор на прашањето што би добила Европската Унија со членството на Северна Македонија. И затоа, како што додаде Премиерот Заев „Европа мора да ги отвори вратите. Веруваме и очекуваме дека оваа година нашата земја ќе добие датум за почеток на преговорите“.

Подвлекувајќи дека за Република Северна Македонија нема друга алетрнатива, освен членство во Европската Унија, Премиерот Заев пред присутните вискои гости истакна дека Република Северна Македонија направи низа реформи во правосудството, во јавната администрација, како и во безбедносните служби.

„Преку дијалог најдовме решение после 28 години. Создадовме модел за решение и притоа го зачувавме идентитетот на двете страни. И во моментов ги жнееме ефектите од овој договор. Сите земји членки на Унијата, можеме да ги донесеме бенефитите заедно. 15 години сме земја кандидат за членство во Унијата и време е да го преминеме прагот“, посочи Премиерот Заев и додаде дека дури и земјите земји коишто се двоумеа за можноста да се проширува Европската Унија полека го менуваат своето мислење.

На прашањето зошто на Европската Унија и е потребен Западен Балкан, еврокомесратот за проширување и добрососедска полтика, Јоханес Хан истакна дека во земјите од Западен Балкан коишто не се членки на Унијата живеат околу 18 милиони луѓе и дека регионот има многу предизвици. „И бидејќи Европа досега покажа дека може да се соочи со предизвиците, треба да му помогне на Западен Балкан зошто станува збор за регион со голем потенцијал“, рече меѓу другото еврокомесарот Хан и додаде дека “Европа ќе биде обединета и унифицирана, само ако во неа бидат обединети овие 6 земји од Западен Балкан“.

Еврокомесарот Хан на форумот Европа – Вахау исто така додаде дека неспоредлив е придонесот на Премиерот Заев и Северна Македонија за целиот регион на Западен Балкан. И затоа како што рече тој, „Треба да направиме се, за да и помогнеме не Северна Македонија“.

Федералната Канцеларка на Австрија, Бригите Бирлајн во своето прво јавно обраќање како Канцелар на Република Австрија, истакна дека само обединета Европа може да се соочи со сите предизввици

„Стабилноста на Западен Балкан значи стабилност и на целиот регион, силните политички одлуки ни требаат и за засилување на економијата“, заклучи претседателот на Европскиот Парламент, Антонио Тајани на затворањето на форумот Европа – Вахау, којшто се одржуваше во Република Австрија во последните три дена.

Класична лажна вест е тврдењето на Мицкоски дека Буџетот не се полни, по години стагнација, економијата расте и се движи во добар правец, реагираат од СДСМ, на обвинувањата од ВМРО-ДПМНЕ дека има дупка во Буџетот од три милијарди денари.

„Христијан Мицкоски и ВМРО-ДПМНЕ се единствените кои не можат да се помират со успешните економски политики потврдени преку официјални податоци, релевантни финансиски институции, како и преку најпозитивниот извештај на Европската комисија.
Одново се покажува дека Мицкоски не само што нема основни познавања од економија туку не знае ниту да ги прочита позитивните економски текови, па затоа шири лажни вести.
Не е точно дека платите не растат, а економијата пропаѓа како што лажно тврдат Мицкоски и ВМРО-ДПМНЕ. Класична лажна вест е тврдењето на Мицкоски дека Буџетот не се полни. Напротив, состојбата е одлична, граѓаните да бидат спокојни“, велат од СДСМ.

Од таму додаваат дека е факт дека за само две години, економијата далелку постабилна и развојна, отколку што беше за време на 11 годишното криминално владеење на ВМРО-ДПМНЕ.

„Од – 1,8 отсто во последните два месеца од владеењето на ВМРО-ДПМНЕ, за неполни две години економијата има раст од 4.1 во првиот квартал од 2019 година. Само во 2018 забележан е рекорден износ на странски директни инвестиции од 624,5 милиони евра, а нашата држава има убедливо најголем раст на странски инвестиции во регионот, што е потврдено и во „Извештајот за инвестициите во светот 2019“ на Конференцијата на Обединетите нации за трговија и развој. Невработеноста е намалена на историски минимум и изнесува 17,8 отсто. Платите растат во сите сектори, зголемена е минималната плата, а за само две години просечната плата е зголемена за околу 2.000 денари“, велат од СДСМ.

Од таму додаваат дека по 13 години, агенцијата „Фич” го зголеми кредитниот рејтинг на нашата земја од ББ на ББ+, со стабилен изглед, што е последен во низата показатели за успешноста на реформите и потврда дека е довербата во економијата е вратена и таа се движи во нагорна линија.

Портпаролот на Независниот синдикат на полицијата, Дејан Саздов, обвини дека раководството на Министерството за внатрешни работи врши мобинг врз членовите на синдикатот и останати припадници на полицијата. Саздов вели дека станува збор за незаконски распределувања преку кои раководството се пресметува со оние кои се спротиставуваат на незаконското работење.

„Како синдикат сметавме дека власта лекциите за примерно и законито однесување ги научи и навистина ќе се почуствуваат позитивните промени, но од тоа ништо не се случи. Наместо промени, кон синдикатот продолжија притисоците и заканите за преместувања кои голем дел од нашите претставници ги осетија на својот грб, како и притисоци врз највисоките структури на НСП и срамна дискредитација на истите. Се уште се водат неосновани постапки против наши претставници со притисоци од страна на највисоките структури. Исто така и притисоците за отчленување на членови од НСП не престануваат. Нашите претставници се соочуваат со невиден мобинг, почнувајќи од незаконски распределувања за внесување страв до безмилосен напад на професионалниот интегритет. Се демонстрираше моќ и способност за конструкции и фингирање на лоши слики ставајќи им етикети на професионалците кои ќе се спротистават на незаконското работење“, вели Саздов.

Мотивирани од, како што велат неправдата која им е нанесена, членовите на НСП се обратиле до Народниот правобранител, внатрешната контрола на МВР и Комисијата за управна постапка. Сите овие институции утврдиле неправилности во постапката за прераспределување по што Основниот суд 2 на 10 април оваа година донел пресуда со која се поништуваат решенијата на МВР за прераспределување и се бара вработените да бидат вратени на старите позиции.

Како што велат од НСП, оваа одлука на судот сè уште не е испочитувана иако раководството на министерството за внатрешни работи имало рок од 8 дена да ја изврши судската одлука.

Од синдикатот бараат премиерот, Зоран Заев, да „замете“ и во МВР со цел правдата да биде задоволена, а зборот оддржан. Тие исто така се надеваат дека трудовиот инспекторат и Јавното обвинителство ќе се позанимава со овие прераспределување во полицијата.

„Од премиерот бараме по доставување на доказите за незаконското работење на раковдството на МВР, метлата да заигра и правдата да биде задоволена, а дадениот збор одржан. Одговорноста во највисокото раководство мора да ја има. Гласот да допре до сите надлежни институции посебно до Трудовиот инспекторат и Јавното обвинителство. Да се спроведе ревизија и истрага на сите досегашни решенија за прераспределување и унапредување во МВР донесени од страна на актуелното раководство“, велат од Независниот синдикат на полицијата.