Македонија
Битиќи се надева дека повисокиот суд ќе ја смени одлуката за ИРЛ: Тоа ќе биде само еден лош ден на една судијка

Вицепремиерот за економски прашања, Фатмир Битиќи вели дека како човек којшто бил дел од граѓанскиот сектор смета дека ограничувањето на слободата на изразувањето на кој било е многу сериозно и, штетно за понатамошниот развој.
„Се надевам дека повисокиот орган во судот ќе ја преиначи таа одлука и дека ќе биде само еден лош ден на една судијка, која заради своето убедување го направила тоа и дека ќе се вратиме во тоа во кое сите треба да живееме, слободата на изразување, слободата на говор, слободата на работење“, рече Битиќи.
Тој ги охрабри не само новинарите од ИРЛ, туку сите други кои работат во граѓанскиот сектор, во медиумите да продолжат да го прават тоа како што најдобро знаат да го прават.
ИРЛ беше осудена за клевета по тужба на поранешниот вицепремиер Кочо Анѓушев и компанијата БРАКО за емисијата „Заговор против воздухот“. Во образложението на пресудата судијката Јованка Спировска-Панева наведе дека истражувањата на ИРЛ не смееле да се публикуваат пред граѓаните, туку требало исклучиво да се користат за внатрешна едукација на вработените. Таа го отфрли исказот на уредничката на ИРЛ, Сашка Цветковска, со образложение дека таа и ИРЛ не се новинари и медиум.
Од ИРЛ, по пресудата, реагираа дека тие не се осудени за клевета, туку осудени се оти постојат, а поддршка добија од голем број новинари и медиуми. Основниот граѓански суд, велат од ИРЛ, преку судијката Јованка Спировска-Панева протолкува дека непрофитните организации, кои во земјата се занимаваат со истражувачко новинарство, не претставуваат медиумски организации, па поради тоа таа ги отфрлила доказите на ИРЛ во спорот со Анѓушев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ковачевски: СДСМ е автомобил којшто вози до Вашингтон и Брисел

СДСМ е кола којашто вози во Вашингтон и Брисел, од друга страна кај ДПМНЕ што имате, имате кола направена од стиропор која што никој не би ја купил, рече денеска во одговор на новинарско прашање премиерот и претседател на СДСМ, Димитар Ковачевски.
-Ако погледнете во годините наназад ние ветивме интеграција на државата во НАТО, испорачавме. Споредете го тоа со една кола која што ја гледате. Тоа е кола која што ве вози во Вашингтон каде што се депонирани потписите за членството во НАТО. Тоа е кола која што обезбеди почнување на преговорите со ЕУ, ве води во Брисел. Тоа е кола која што овозможи над 600 евра просечна плата во државата. Која овозможи 50% зголемување на минималната пензија. 50% зголемување на просечната пензија, намалување на невработеноста од 24% на 13% и дополнително 2% во текот на идната година. Највисоки капитални инвестиции во историјата на државата. Ние за 2 години 2022 и 2023 ќе имаме една милијарда капитални инвестиции реализирани. Тоа е кола која што го реализира Коридорот 8 и впрочем тоа е кола која што вреди да се има. Од друга страна што имате, имате кола направена од стиропор која што никој не би ја купил, рече Ковачевски.
Македонија
Се работи на развојот за производство на првиот македонски дрон

Министерката за одбрана Славјанка Петровска денеска заедно со премиерот Димитар Ковачевски и вицепремиерот за економски прашања Фатмир Битиќи беше во посета на компанијата “ATS Ammunition” во Самоков, дел од групацијата “ATS Group” чија дејност е производство за заштитна и воена опрема и вооружување.
По обиколката на капацитетите министерката Петровска порача дека ова е сериозна компанија со голем квалитет што е многу важно во време кога се соочуваме со сериозни предизвици за да се задоволат потребите на воената индустрија. Петровска информираше дека оваа компанија веќе е регистрирана за учество на НАТО пазарот и додаде дека интересот на компаниите за комплетирање на овој процес се зголемува.
„Оваа компанија веќе е регистрирана на НАТО пазарот и учествува на пазар кој вреден повеќе од 5 милијарди евра. Она што ме радува е дека и останатите компании во Северна Македонија кои се занимаваат со други дејности го зголемуваат интересот за регистрација на НАТО пазарот. Ако во 2021 година беа само 8 компании, веќе во октомври 2023, тој број е 18 само за една година или вкупно некаде околу 40-тина компании кои го добиле тој НАТО код и може да учествуваат на НАТО пазарот”, рече министерката.
Додаде дека Министерството за одбрана и Армијата имаат исклучително позитивна соработка користејќи ги производите кои оваа компанија ги произведува, а ќе соработуваат и во развојот и почетокот за производство на првиот македонски дрон.
Петровска потенцираше дека заради потребите кои се наметнуваат, дроновите ќе бидат повеќенаменски, со способност за извидничко разузнавачки мисии, борбени дејствија и за цивилни потреби.
Македонија
Приведени пет лица за случајот со исчезнувањето на 14-годишната Вања, полицијата обезбеди и едно возило

Пет лица се приведени доцна синоќа во врска со случајот со исчезнувањето на 14-годишната Вања, и обезбедено е едно возило, информираше денеска министерот за внатрешни работи, Оливер Спасовски за време на посетата на Куманово.
Одговарајќи на новинарски прашања за тоа дали има напредок во истрагата за девојчето кое исчезна на пат кон училиштето „Песталоци“, Спасовски рече дека низа криминалистички истражни мерки се презедоа во изминатиот период се со цел да се утврдат сите факти, но ќе ги соопштат во момент кога ќе треба да бидат соопштени оти предвременото објавување прави проблем на истрагата.
„Синоќа доцна во ноќта се работеше исто така интензивно, имаме приведено 5 лица и обезбедено едно возило со коишто се продолжува понатаму работењето. Тоа е нешто плус што го преземавме во однос на сето она како доказ или трага, со цел да дојдеме до целосно расчистување на овој случај“, рече министерот.
Шести ден се трага по исчезнатата Вања Ѓорчевска, на која и’ се изгуби трагата на пат кон училиштето „Песталоци“, во близина на Дебар Маало. Последен пат била забележана на булеварот Партизански одреди пред „Броз кафе“,
Во пребарувањето вклучени се стотици полицајци, граѓани, ловџии. За Вања распишана е и потерница на „Интерпол“.