Оваа година ја бележиме како година во која имаме предвидено историски најголем буџет за изградба и реконструкција на патната мрежа во државата, истакна министерот за транспорт и врски, Благој Бочварски, на форумот по повод 100 дена Влада.

„Го завршивме експресниот пат Штип – Радовиш, инвестиција од над 60 милиони вера. Работиме активно на изградба на автопатот Кичево – Охрид, а во меѓувреме цел тим работи на процесот за доизградба на Коридорот 8 на ниво на модерен автопат“, посочи министерот додавајќи дека се работи и на изградбата на автопатската делница од Скопје до граничниот премин Блаце кон Косово.

Во однос на експресните патишта, тој потенцира дека на терен има, како што рече, силна градежна активност на трите експресни патишта за што се инвестирани вкупно 135 милиони евра.

Бочварски додаде дека се продолжува и со реализација на капиталните инвестиции во делот на железницата, каде што се очекува оваа година да се почне со изградба на пругата кон Бугарија, од Куманово до Крива Паланка.

„Градежната механизација е секаде на терен, следува силна градежна сезона оваа година, која ќе продолжи и во следниот период. Само да илустрирам во бројки што во моментот градиме, а тоа е 59 километри автопатски делници, а се подготвуваме за нови 140 километри автопатски делници. Се градат 118 километри експресни патишта, од кои веќе привршуваат 54 километри. Во делот на железницата, во поновата историја на државата ова е најголемата инвестиција со речиси 200 милиони евра за изградба на двете фази кон Бугарија“, истакна министерот Бочварски.

Тој најави дека во следниот период ќе се работи и на реконструкција на магистралните и регионалните патни правци, како и санација на локалните патишта во општините како директна помош за општините.