Лидерот на ВМРО-ДПМНЕ, денеска по повод празникот Водици присуствуваше на чинот на положување на светиот крст во водите на Охридското езеро, исто како и претседателот на владејачката СДСМ, Зоран Заев.

Мицкоски по завршувањето на манифестцијата, од страна на новинарите беше запрашан за негов став во врска со тоа што Заев за следната недела најавил можна лидерска средба во однос на предлог законот за јавно обвинителство.

Мицкоски одговори дека во јавноста е познат ставот на ВМРО-ДПМНЕ во однос на законот и дека нема намера да оди на паушални лидерски состаноци на кои СДСМ, како што кажа, предлага закон кој што треба во иднина да ги штити криминалните структури кои по 12 април ќе заминат во опозиција.

„Работните групи се состануваа, имавме една неуспешна лидерска средба. Нема никаква дилема дека треба да се донесе европски закон, реформски закон за јавното обвинителство. Но, ова што денеска е предложено од страна на СДСМ практично претставува закон кој што треба во иднина да ги штити криминалните структури од СДСМ кои што ќе заминат во опозиција. Така што ако треба да се одржи средба колку ради реда, јас навистина немам намера да го губам времето ниту на господинот Заев, ниту на граѓаните. Тука се работните групи, во неделата која што следи претпоставувам ќе имаат состанок ќе разговараат, доколку ги приближат ставовите тогаш веќе можеме да зборуваме за нешто поконкретно, односно одржување на лидерска средба“, посочи лидерот на ВМРО-ДПМНЕ.

Скопјенецот Кристијан Ниневски (26) и годинава беше најсреќниот од околу 140 верници кои се фрлија по светиот крст во водите на реката Вардар во центарот на Скопје.

Ова е втор пат светиот крст да заврши во рацете на младиот скопјанец, кој исто така и лани беше најсреќниот од учесниците во традиционалниот чин по повод верскиот празник Богојавление – Водици.  Досега Ниневски вкупно седум пати има учествувано во положувањето на крстот.

Се верува дека на Богојавление Свети Јован Крстител го крштевал Исус Христос во водите на реката Јордан.

Централната манифестација по повод верскиот празник во Скопје беше напладне на водите на реката Вардар, поточно на мостот кај хотелот „Холидеј Ин“. Студеното време во главниот град, не спречи околу 140 верници да влезат во реката, каде поглаварот на Македонската православна црква – ОА, г.г. Стефан го фрли крстoт за да ги освети водите во чест на големиот православен празник.

Непознати сторители деновиве скршиле и опожариле десетина нови канти за ситен отпад во Старата скопска чаршија, информираат од ЈП Комунална хигиена-Скопје.

Од таму додаваат дека корпите за отпад биле поставени пред неколку месеци, поточно во октомври минатата година, на барање на Здружението на занаетчии на Чаршијата, со цел да се подигне нивото на хигиена во Скопската чаршија, која важи за туристичка локација во центарот на градот.

„При поставувањето на корпите за ситни отпадоци упативме порака дека од граѓаните очекуваме со својот однос и постапки што подолго време да ги сочуваат функционални и неоштетени, а денеска апелираме веднаш да престане уништувањето на опремата, имајќи го предвид фактот дека во текот на 2019 година се опожарени 137, а од почетокот на новата година дури шест контејнери за одлагање на отпад“, изјави директорот на ЈП Комунална хигиена, Абдусамед Шабани.