„Две години како СДСМ ја презема локалната власт, а бранот на неработење и пустош не ја одмина ниту општина Неготино. Две години откако градоначалник на општина Неготино е Тони Делков и две години очекување да почнат со реализиација неговите ветени проекти во изборната програма“, изјави Петре Манчев од ВМРО-ДПМНЕ.

„Сите ветувања што ги дадовте, градоначалниче, пред изборите, останаа заборавени, програмите нереализирани, а нема никаков економски напредок во општина Неготино. Како показател на ова е реализираниот буџет во третиот квартал, со реализација не повеќе од 30 отсто, а капиталните инвестиции не се поголеми од 10 отсто.

Граѓаните се сведоци дека во овој период во општина Неготино нема ниту еден проект, нема ниту една мерка што ја направивте и која ќе остане запаметена. Она по што ќе останете запаметени се само непотизамот, вработување партиски војници и матните тендери.
Неготино и граѓаните на Неготино, господине градоначалниче, немаат веќе трпение за вашите празни ветувања, оправдувања и барања виновници од минатото. Доста им е од ветувањата што се само предизборен маркетинг. И не само тоа што немате реазлицација на ветените проекти, вие не сте ни во состојба да ги продолжите претходно почнатите.

Нема ниту катни гаражи, нема паркинг-простор, нема градски пазар, градоначалниче, нема нова градинка, нема атмосферска канализација, а да не зборуваме за повторно активирање на породилниот дом, што исто така ви беше ветување во предизборната кампања. Граѓаните на општина Неготино видоа доволно за овој период, ама не видоа ништо од вашите ветувања. И понатаму насекаде гледаат само смет и нечистотија, ископани и несредени улици, гледаат нови депонии, неискосени и ненавадени тревници. Во градот се пишуваат казни за погрешно паркирање, а не е обезбеден паркинг.

Градоначалниче, секојдневно сме сведоци на сè поголем број фамилии, кои, гледајќи ја ваквата состојба, се иселуваат барајќи ја својата егзистенција надвор од државата. Никогаш повеќе нема да ја вратите довербата кај граѓаните, а тоа ви го кажаа и на последните избори на кои бевте катастрофално поразени“, додаде тој.

Вие и вашето неработење го докажавте во овие две години, а граѓаните ќе си го кажат своето на следните избори. Колку побргу сфатите дека проблемот е во вас, а не во народот, толку подобро ќе биде за градот и за граѓаните. И крајно време е, градоначалниче, да почнете да работите за барем по нешто да ве паметат граѓаните.