„Вчера, во центарот на Скопје, се слушнаа фашистички, навредливи и понижувачки повици кон Албанците во нашата земја. Сторители на овие повици беа навивачката група ‘Комити на ФК ‘Вардар’“, изјави Фатон Фазлиу од Алтернативата во Скопје.

Според него, „жално е што овие повици (кои не се случуваат првпат) се случуваат на плоштадот во главниот град, лицата не се анонимни и тие поминуваат без трн во здрава нога: ниту Обвинителството, ниту полицијата ниту судовите не се занимаваат со нив. Од друга страна, Албанците остануваат во затвор, дури и за случајни сообраќајни незгоди“.

„Поаѓајќи од ова, го осудуваме овој јазик на македонските навивачи на ФК ‘Вардар’, очекуваме клубот да се дистанцира од нив, а го повикуваме и Јавното обвинителство да не молчи и да глуми жител на Марс, туку да ги собира видеоснимките од овие сцени и да поднесе тужби за ширење говор на омраза, за повикување за истребување, за понижување и навреда на заедницата. Стравуваме дека ако овие случаи останат неказнети, нивните сторители ќе бидат уште помотивирани и тие многу лесно можe да се претворат во дејства од непожелни размери и со непредвидливи последици.

Aлтернaтивaта ќе го иницира ова прашање и во другите инстанции, но сака да верува дека државните институции ќе бидат поефикасни во оваа задача“, додаде Фазлиу.