Од ВМРО-ДПМНЕ ја повикаа пратеничката од СДСМ, Мира Стојчевска, јавно да каже дали, освен син ѝ, кој се вработил во ЕЛЕМ, и брат ѝ е вработен во РЕК „Битола“? Според информации на партијата, и двајцата биле вработени пред распишувањето на претседателските избори.

„Воопшто не ѝ е лесно на пратеничката Мира (Дизел) Стојчевска штом не знаела и морала од медиумите да разбере дека нејзиниот син Виктор Стојчевски аплицирал и, за негова среќа, бил вработен во државната ЕЛЕМ. За да не ги обвини медиумите дека кријат информации од неа, еве да ѝ помогнеме со уште една информација, која би сакале да ја потврдиме пред целата македонска јавност. Почитувана Мира, дали е точно дека, освен Виктор, твојот син вработен во ЕЛЕМ, преку агенција за привремени вработувања е примен и твојот брат како перспективен бравар со завршено средно училиште? Еве ѝ шанса на Мира (Дизел) Стојчевска да се јави кај својот брат и да го праша дали и тој е ангажиран во ЕЛЕМ, односно во РЕК ‘Битола’, дали е на определено или неопределено време и дали и тој почнува со работа од 11 февруари?“, рече Димче Арсовски, портпарол на ВМРО-ДПМНЕ

Според нашите информации, додаде тој, датумот на спроведување на вработувањето на син ѝ и на брат ѝ во Агенцијата за вработување е 9 февруари, односно во саботата, а изборите се распишани во петокот на 8 февруари.

„Првиот работен ден на Виктор и на братот на Мира им бил вчера, односно на 11 февруари, во понеделникот, три дена по распишувањето на претседателските избори од страна на Собранието. Она што е симптоматично и ја интересира јавноста е следново: дали е точно и како е можно син ѝ на Мира Стојчевска да биде пријавен како вработен во државната ЕЛЕМ ден по распишување на претседателските избори во Собранието?“, рече Арсовски.

Според него, премногу е симптоматично како е можно сите блиски роднини на функционерите од власта токму сега да добијат шанса за вработувања и тоа баш во институциите и претпријатијата каде што платите се многу повеќе од просечната плата од 500 евра што ја ветуваше Зоран Заев пред изборите.