Македонија
(Видео) Арсовски: Сакаат АД „Славија“ да ја продадат свесно обезвреднета

Молкот на цела Влада на СДСМ е само показател дека сакаат АД „Славија“ да ја продадат свесно обезвреднета по цена на основачкиот удел од 218.000 евра, а не по пазарна проценета вредност од страна на институциите, посочи во денешното ново излагање на оваа тема портпаролот на ВМРО-ДПМНЕ, Димче Арсовски.
Според информациите на Арсовски, целиот имот на АД „Славија“ чини над 20 милиони евра, а денеска објави документи, со кои, како што рече, го демантира СДСМ во обидот да се извлечат од криминалниот процес.
„Ова е официјален документ од Централниот регистар, каде што се гледаат годишните приходи и текот на парите на АД ‘Славија’. Ова е листинг од обработена годишна сметка од Централен регистар на АД ‘Славија’“.
Секоја година АД „Славија“ има приходи од работењето на самата компанија од приближно 50 милиони денари. Тоа се 70-80.000 евра месечно приходи во зависност од месецот, а кои легнуваат на контото на АД „Славија“.
Според нашите информации, во моментот на сметката на АД „Славија“ има околу 6 милиони денари или 100.000 евра, што значи новиот купец што би ја купил за 218.000 евра, доколку не се одложи како што апелираме, ќе си добие и пари на сметка кога ќе ги купи фирмата и акциите и практично може да му се фати за 100.000 евра да купи таква компанија бидејќи, нели, ќе му се вратат овие 100.000 евра на сметка.
Од друга страна, во делот пасива во годишната сметка може јасно да се види дека обврските на АД „Славија“ се 253.271.232 денара или 4,2 милиони евра обврски и долг. Како и што рековме на изминативе прес-конфереции, не е долгот како што лажеа во Владата на оние прес-конференции дека бил 17 милиони евра или многу повеќе, долгот е само 4,2 милиони евра.
Оттука, слободно можеме да посочиме, дека и покрај ваков долг, со вакви приходи на годишно ниво, АД „Славија“, со целиот свој имот, земјишта и работење, има вредност од над 20 милиони евра“, посочи портпаролот на ВМРО-ДПМНЕ и уште еднаш јавно порача да се повлече продажбата на АД „Славија“, која, како што рече, се подготвува на срамен начин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ахмети го посети семејството на Хашим Тачи: „Ќе го пречекаме како победник на правдата кога ќе се врати“

Лидерот на ДУИ, Али Ахмети на социјалните мрежи објави дека го посетил семејството на поранешниот косовски претседател Хашим Тачи, за, како што вели, да им даде срце и сила на неговите родители и роднини во битката за правдата.
„Нивниот син со пријателите го брани достоинството на ОВК. Правдата одложува, но не заборава. Гордо ќе го пречекаме Тачи со пријателите кога ќе се врати како победник на правдата“, напиша Ахмети на социјалните мрежи.
Хашим Тачи се изјасни за невин на судењето за воени злосторства на Косово, заедно со тројцата други членови на Главниот штаб на ОВК, Кадри Весели, Јакуп Красниќи и Реџеп Селими, на судскиот процес што пред неколку месеци почна во Хаг по речиси тригодишна истрага и повеќе од 20 години од војната.
Тачи се соочува со 10 обвиненија за апсење, убивање и мачење на оние кои се сметале за непријатели, вклучително и Албанци, Срби и Роми, додека се обидувале да ја преземат власта за време на ослободителната војна во 1998-99 година.
Македонија
Димитров: Северна Македонија да го сфати важното место на историската комисија за пристапувањето во ЕУ

Република Северна Македонија треба да го сфати важното место што го има работата на Мешовитата бугарско-македонска историска комисија во процесот на пристапување на земјата во Европската унија. Ова за бугарската агенција БГНЕС го изјави професорот Ангел Димитров, копретседател на Мешовитата бугарско-македонска комисија за историски прашања.
Во изјавата тој оцени дека на досегашните бројни состаноци не се постигнати резултати.
Темата на која најдолго се задржале било изнајдувањето на заедничка позиција за претставувањето на Охридската архиепископија, но како што кажа Ангелов, за жал не успеале да се договорат, пренесе БГНЕС.
Македонија
Ковачевски се сретна со американската амбасадорка: Важно е сите политички партии да го поддржат европскиот пат

Претседателот на Владата, Димитар Ковачевски, денеска имаше средба амбасадорката на САД во земјава, Анџела Прајс Агелер.
Kaко што соопштија од Владата, на состанокот станало збор за суштинските прашања во врска со напредокот на Северна Македонија во евроинтеграциите.
Реафирмирана е јасната порака на Соединетите Американски Држави, дека земјава по членството во НАТО, треба да стане членка и на ЕУ, за што, нашата држава има силна и конкретна поддршка од САД.
Нагласено е дека Северна Македонија е фактор на стабилноста и безбедноста во регионот и е посочено на важноста – сите политички партии во државата да го поддржат европскиот пат на државата.
Притоа, изразено е очекувањето дека сите политички лидери ќе го имаат предвид актуелниот контекст на случувања и дека во таа насока и ќе се носат и претстојните политички одлуки во Собранието.
На средбата со американската амбасадорка Агелер, како и при средбата на премиерот Ковачевски со сенаторот Крис Марфи во Скопје и на средбите со високите американски претставници Блинкен и Ескобар во САД, е потврдено искреното долгогодишно пријателство и успешното стратешко партнерство помеѓу Северна Македонија и САД, кое што се развива на принципите на доверба и разбирање.
„Како Влада, ја почитуваме добронамерноста на нашиот голем и стратешки партнер САД, како и на другите пријателски држави, членки на НАТО и ЕУ коишто нè поддржуваат во следниот исчекор во евроинтеграциите, којшто има одредувачка насока кон полноправното членство на нашата држава во ЕУ. Реално е очекувањето тоа да се случи до 2030 година и подготвени сме со уште посилен интензитет да работиме на потребните реформски процеси. Граѓаните заслужуваат да живеат во држава членка на Европа, со европски квалитет на живот и европска иднина за младите, во родната земја“, рече премиерот Ковачевски, на средбата со амбасадорката Агелер.