Од Буџетот трансферирани се скоро 80 милиони денари на општина Ресен, за обесштетување на граѓаните погодени од невремето во 2019 година во Долна Преспа.

Градоначалникот на Општина Ресен, Живко Гошаревски, соопшти дека општината во законскиот рок од еден месец ќе го изврши обесштетувањето на граѓаните.

Во знак на благодарност поради залагањата и напорите за обесштетување на земјоделците од преспанскиот регион, градоначалникот на општина Ресен, Живко Гошаревски, на премиерот на Владата, Зоран Заев, на вчерашната средба му додели плакета „Преспански јаболкобер 2020“.

Гошаревски оцени дека оваа мерка на Владата претставува вистинска поддршка и помош за земјоделците, кои и покрај големиот труд и напори не успеаа да го соберат родот на преспанско јаболко, од кое производство зависи развојот и економскиот раст на Ресен и Преспа.

Во текот на изминатото деноноќие, по однос на мерката за носење лична заштита на лице, регистрирани се 846 прекршоци.

Министерството за внатрешни работи апелира до граѓаните да ги почитуваат мерките и протоколите донесени од Владата со цел справување со Ковид-19.

Со вчерашните нови 404 случаи со Ковид-19, во болниците низ Македонија се лекуваат 595 пациенти.

Министерството за внатрешни работи во текот на вчерашниот ден продолжи со засилените акциски контроли во областа на сообраќајот.

На територијата на град Скопје во текот на вчерашниот ден изречени се вкупно 429 санкции, меѓу кои 62 прекршоци за пречекорување на дозволената брзина на движење, 35 мерки за технички неисправни и нерегистрирани возила, 31 за возење без возачка дозвола, а 58 санкции за неносење на заштитна маска.

Засилените сообраќајни контроли продолжуваат и во наредните денови. МВР апелира до граѓаните да ги почитуваат сообраќајните правила и прописи за зголемување на безбедноста во сообраќајот.