Комисјата за здравство на ВМРО-ДПМНЕ подготви предлог-мерки, кои смета дека треба да се преземат од надлежните што побргу за да се спречи ширење и нов пандемиски бран од делта-сојот на коронавирусот, посочи денеска Игор Николов, претседател на партиската комисија.

„Комисијата за заразни болести најави дека сега ќе ја разгледува состојбата, очигледно затоа што кажа Филипче, а само пред некој ден рекоа ‘се е под контрола и дека мерки не требаат’. Евиденто е дека Комисјата работи под диктат на Филипче и Владата, а не професионално“, смета Николов.

Тој посочи дека иако министерот Филипче најавил дека неделава ќе се разгледува воведување мерки на границите при влез во земјата, сепак изостанува каква било реорганизација на институциите надлежни за справување со вирусот.

Затоа, Комисијата за здравство на ВМРО-ДПМНЕ предлага 15 мерки, кои Николов ги наброи во продолжение:

1. Професионализација на Комисијата за заразни болести;

2. Забрзување на вакцинацијата против Ковид-19;

3. Зголемување на контролата на границите;

4. Достапност на тестирање на Ковид-19;

5. Јасен и прецизен бел план за здравствениот систем при нов бран на Ковид-19;

6. Зголемување на достапноста за рендген и лабораториските анализи за пациенти со Ковид-19;

7. Актуализирање и обновување на протоколите за третман на Ковид-19;

8. Мапирање на здравствениот персонал;

9. План за пациентите со други дијагнози;

10. Мапирање на здравствените капацитети;

11. Одредување болници посветени на Ковид-19;

12. Мапирање на постојната функционална апаратура;

13. Достапност на соодветен третман за пациенти со Ковид19;

14. Достапност на лична заштитна опрема ;

15. Постковид-центри за пациенти што прележале Ковид-19.