Платата на десетте вработени во Одделението за специјализирани воздухоплови во ДЗС им е покачена за 100% и им е даден дополнителен мотив на персоналот за вршење на својата должност и конечно нивните плати се изедначени со платите на летачкиот персонал во Армијата и МВР, изјави в.д. директорот на Дирекцијата за заштита и спасување, Стојанче Ангелов.

Тој нагласи дека платите на пилотите на воздухоплови од типот амфибии со кои располага ДЗС, во Европа се многу повисоки и се движат околу 30.000 евра месечно, додека кај нас се постигнал еден разумен однос на висината на платата на пилотите.

Во врска со оваа тема, директорот Ангелов потсети дека пред два дена се потпишани договори со пензионираните пилоти од Дирекцијата за заштита и спасување, со што се дополнително се обезбедиле пилоти за оваа и наредната година.

Што се однесува со состојбата на воздухопловите, Ангелов изјави дека во моментов ДЗС располага со еден воздухоплов, вториот се чека да пристигне овие денови од сервис додека третиот воздухоплов ќе доцни.

Инаку, Ангелов ги повика сите лица кои поседуваат дозвола за летање и кои имаат поголем број часови на летови, да се обратат во ДЗС и ќе им биде овозможена дообука за летање со типот на воздухоплови амфибии.

На прашањето од новинарите дали се планира набавка на нови воздухоплови за гасење пожар, Ангелов изјави дека неговите планови и плановите на ДЗС се од поголеми размери и дека поради тоа што гасењето пожар со амфиби е еден од најефтините начини за гасење пожар, постои идеја за отварање на голем хангар за сервис и поправка на воздухопловите на ДЗС, но и на воздухоплови од други земји.

„Со ова не само што ДЗС ќе заштеди средства, туку и со тоа ќе ги надополни средствата во буџетот кои ќе се потрошат при гасење на пожари“, рече Ангелов.

Во врска со оваа тема, Ангелов изјави дека ДЗС се соочува со голем број предизвици меѓу кои што и со недоволниот број на инспектори.

„Во моментов ДЗС има 15 инспектори на цела територија на Македонија, а минимален број кој е потребен е 35 лица, барем по еден во секое подрачно одделение на ДЗС“, рече Ангелов и апелираше до сите граѓани доколку постојат случаи на злоупотреба на службената должност од страна на инспекторите да се обратат во МВР, Јавното обвинителство или директно во ДЗС.

На прашање на новинарите дали се планира ангажирање на дополнителен број пожарникари за гасење на пожари, Ангелов изјави дека Владата планира привремено вработување на 400 пожарникари, но за деталите, како што рече, новинарите ќе бидат дополнително известени.

Заради гасење на пожарите и обемноста на истите во летниот период, Ангелов изјави дека се пренаменети поголем број стари, но добро одржувани возила од армијата и полицијата што се надградени со топови за вода и кои ќе бидат во црвена боја со новиот знак на ДЗС. При прашање од новинар за тоа дали во возилата ќе се стават барем подвижни клими, бидејќи температурата во возилата е висока особено при гасење на пожар, Ангелов рече дека е расположен и отворен за ваков тип на сугестии.

Ангелов апелираше до сите граѓани за одговорно и совесно однесување и навремено обраќање на бројот 112 кога ќе забележат пожар или опасност за пожар.

Апелираше сите оние кои ќе забележат лабави електрични жици, веднаш да пријават до ЕВН или во ДЗС, бидејќи ова е исто така една од почестите причини за пожар – жиците се допираат до сува треба и искрите предизвикуваат пожар.

Исто така, тој апелираше и до сточарите да не ја палат тревата заради обезбедување пасишта на стоката како и до земјоделците да не ги палат стрништата, бидејќи најчесто пожарите се предизвикани од човечка негрижа, додека од криминални и пиромански побуди се предизвикани помал број пожари.

Во врска со состојбата со пожарите, Ангелов изјави дека на територијата во Македонија се активни 29 пожари, од кои:
– во Општина Прилеп во атарот на с.Бешиште гори квалитетна мешана шума како кај с.Градешница каде што е отежнато гасењето на пожар заради постоење на неексплодирани убојни средства од Првата светска војна
– Во Општина Валандово пожарот е активен веќе трет ден во атарот на с.Чрчиште но ја зафаќа и територијата на Општина Богданци и Општина Дојран каде што горат трева и грмушки. Утрово беше испратен хеликоптер на армијата, но е утврдено дека пожарот е во фаза на чадење но, со зголемување на температурите постои можност за повторно активирање
– Општина Старо Нагоричане во атарот на с.Глабочица гори мешана шума ,бор и букова шума
– во Општина Македонски Брод во с.Црешево гори деградирана дабова шума.

Инаку, оваа година, во јануари беа активни 31 пожар, во февруари 231 пожар, во март 495, во април имаше 99 заради зголемените врнежи од дожд, во мај беа активни 71 (исто така заради врнежите од дожд), во јуни 317 пожари и во јули, само за три дена се случија 43 пожари.

Начинот на кој е избрана судијката Даниела Димовска за вд претседател на Основниот кривичен суд Скопје ми дава за право да се сомневам дека една од причините за нејзиното унапредување е пресудата со која ме осуди на три и пол години затвор за работи што не сум ги сторил, вели градоначалникот на Општина Карпош, Стевчо Јакимовски, во неговата реакција за изборот на нов претседател на Кривичниот суд Скопје.

„Повеќе пријатели ме известија дека судијката Даниела Димовска е назначена за вд претседател на Основниот кривичен суд Скопје. И честитам на изборот, нормално е секој да сака да напредува, но да напредуваш преку газење на лешеви тоа е прво нечовечки. Самиот факт што во изминатиот еден час има силни реакции, особено од нејзини колеги на нејзиниот избор, ми дава за право да се сомневам дека една од причините за нејзиното унапредување е пресудата што ја донесе против мене, да бидам осуден на три и пол години затвор за работи што не сум ги сторил, Ова е само уште една потврда дека судството е партизирано. Можете да ја видите паралелата. Судијката напредува по заслуги, ама партиски. Јас сум бил четири пати градоначалник на Карпош исто така по заслуги, ама тоа е поради доброто служење на граѓаните. Нормално е да размислувам дека нејзиното унапредување е награда за пресудата што беше изречена од страна на она арамиско гнездо сместено во „Белата палата“, а дека таа само беше поштарот што ми ја соопшти пресудата на 23 април и која што впрочем се уште ја немам добиено“, изјави Јакимовски.

Градоначалникот вели дека унапредувањето на судијката за него е доказ дека пресудата е политичка и за него тоа е дополнителна мотивација да ги бодри карпошани на следните избори да не дозволат Мицкоски да ја претвори и општината во уште една негова партиска испостава.

„Ќе ме прашате дали сум резигниран, дали сум разочаран. Да, бев разочаран кога ми беше соопштена пресудата, но кога сега ова го слушам, ми дава повеќе мотив и повеќе енергија и повеќе доказ дека јас сум неправедно осуден и дека мојата пресуда е политичка и ова е само мотив повеќе да ги бодрам карпошани на идните локални избори да се борат и да не дозволат канџите на Христијан Мицкоски и неговата ДПМНЕ заедно со неговата клика да ги вгнезди, овде да ги зарие во карпошевото месо и Карпош го претвори во партиска испостава. Јас сум настапувал со политички партии но никогаш не сум дозволил Карпош да биде партиски штаб со една политичка партија. Напротив, ова било место каде што се решавале проблемите на граѓаните и подеднакво право имал секој граѓанин на Општина Карпош без разлика на политичката, верската, националната, религиозната припадност. За жал денеска сме сведоци во највиталниот дел од општеството, а тоа е судството дека и оваа власт се потруди максимално да го испартизира“, нагласи Јакимовски.

Работната посета на Ирска, министерот за европски прашања Орхан Муртезани, денеска во Даблин, ја започна со средба со ирскиот државен министер за европски прашања и одбрана, Томас Брн, која беше посветена на продлабочувањето на билатералните односи и институционалната соработка меѓу Северна Македонија и Ирска, со фокус на европската интеграција, реформските процеси и регионалната стабилност.

На средбата беше истакната важноста на имплементацијата на Реформската агенда и Планот за раст на ЕУ за ЗБ како главни двигатели на приближувањето кон Унијата. Поаѓајќи од пораките испратени од Самитот за Планот за раст на ЕУ што неодамна се одржа во Скопје, средбата овозможи и продлабочување на дијалогот околу натамошната имплементација на оваа иницијатива како инструмент за забрзување на интеграцијата.

Министрите разговараа за европската перспектива на земјата и претстојното ирско претседавање со Советот на ЕУ во втората половина на 2026 година, како можност за дополнително зајакнување на соработката со земјите од Западен Балкан.

Муртезани се заблагодари за цврстата и доследна поддршка што Ирска ѝ ја дава на Северна Македонија, особено за нејзината принципиелна и гласна позиција за дебилатерализација на евроинтегративниот процес преку отфрлање на билатералните условувања и залагањето за пристапување засновано исклучиво на исполнети критериуми и заслуги, како основа за зачувување на кредибилитетот и интегритетот на Унијата. Тој ја поздрави посветеноста на Ирска во нејзината активна улога во унапредувањето на евроинтегративниот процес во пресрет на претседавањето, особено преку подготовката на првата Ирска Стратегија за Западен Балкан.

Во светло на тековните подготовки на овој документ, како национална стратегија на Ирска, а кој треба да ја постави рамката за посистемска и продлабочена соработка со земјите од нашиот регион, министерот Брн оцени дека навремената посета на министерот Муртезани претставува вреден придонес за подготовката на Стратегијата, како и во насока на унапредување на политичкиот дијалог и соработката во делот на евроинтеграциите.

Брн и Муртезани разговараа за можностите што овој документ ќе ги отвори за засилено ирско дипломатско присуство во регионот, интензивирање на политичките билатерални контакти, поддршка за нашата реформската агенда, како и соработка во домените на културата, образованието и економијата. Тие исто така се осврнаа на регионалната стабилност и политиката на проширување на ЕУ, кои претставуваат централни елементи на ирските приоритети за време на претстојното претседавање со Советот на ЕУ и ќе бидат рефлектирани и во Стратегијата за Западен Балкан.

Mинистерите Муртезани и Брн се согласија дека во услови на зголемени геополитички превирања, зачленувањето во Европската Унија не е само политички избор, туку стратешка неопходност за зајакнување на европската безбедносна архитектура.

Соговорниците констатираа дека блокирањето на процесот на интеграција ја поткопува стабилноста на континентот, додека одржлива и предвидлива интеграција на земјите-кандидатки е во заеднички интерес. За време на средбата, Брн и Муртезани потенцираа дека проширувањето мора да остане меѓу клучните приоритети на Унијата и дека стабилна и обединета Европа е најдобриот одговор на предизвиците со кои се соочува и регионот на ЗБ и Унијата.

Министерот Муртезани исто така нагласи дека Владата на Северна Македонија е заинтересирана за иницијативи кои ќе помогнат во приближување кон Единствениот европски пазар, во спроведување на ЕУ-реформите и во подобро искористување на ИПА фондовите. Во тој контекст, двајцата министри разговараа за можностите за институционално партнерство и пренос на ирското искуство и знаење, вклучително и преку техничка помош и обуки за јавната администрација, во соработка со Ирскиот институт за јавна администрација и други релевантни институции.