Македонија
(Видео) Запленета дрога вредна 600.000 евра, пресечен канал за шверц од Косово

Во координирана акција на полицијата, во текот на вчерашниот ден (8 декември) бил пресечен меѓународен канал за транспорт на дрога од Косово во Македонија, при што запленета е марихуана во количина од речиси 200 килограми со вредност од приближно 600.000 илјади евра, а лишени од слобода се шест лица, македонски и косовски државјани.
Како што соопштија од МВР, на автопатот „Пријателство“, при извршен полициски преглед на автомобил „опел зафира“ со скопски регистарски ознаки, управуван од И. П. (51) од Скопје, биле пронајдени патнички куфери во кои имало 55 пакувања марихуана.
Истовремено, при контрола на автомобил „бмв туран“, со скопски регистарски ознаки, управуван од Б. Р. (30) од Скопје, биле пронајдени вреќи со вкупно 116 пакувања марихуана.
Во близина на бензинска пумпа биле сопрени два автомобила – „мерцедес“, со струмички регистарски ознаки, управувани од О. А. (36) од Скопје, каде што сопатник бил косовскиот државјанин Џ. Љ., како и автомобил „мини купер“, со скопски регистарски ознаки, управуван од Е. А. (33) од Скопје, каде што совозач бил Б. Р. (24) од Скопје, кои биле ангажирани за да го обезбедуваат транспортот на дрогата.
Во консултација со јавен обвинител, по добиена судска наредба, извршен бил претрес во домот на Б. Р., при што биле пронајдени торба со 29 пакувања со марихуана, кеса со марихуана, фантомка, дигитална вага и 11 куршуми, а при извршен претрес во домот на Е. А. пронајдени биле еден сигнален пиштол „екол“ во 9 милиметри со празна рамка, како и еден пиштол „црвена застава“ во 9 милиметри со една рамка со 10 куршуми за него, а во куќниот двор бил пронајден автомобил „бмв“ донесен од Косово без соодветна документација, кој од страна на Царинската управа е одземен за понатамошна проверка.
Денеска, до надлежното Јавно обвинителство против лицата ќе бидат поднесени соодветни кривични пријави.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Алијанса за Албанците: Македонија е безбедна држава далеку од каква било опасност

На 27 март 2020 година, Република Северна Македонија стана најновата членка на НАТО. Од овој момент, РСМ, како дел од најмоќната Северноатлантската алијанса, е безбедна држава и далеку од каква било опасност за суверенитетот и интегритетот на земјата. РСМ како членка на НАТО дава свој придонес за секоја земја во која мора да се обезбеди светскиот мир, велат од Алијанса за Албанците.
Според оваа партија, руската агресија врз Украина, загрозувајќи ја глобалната безбедност, уште еднаш докажа дека како дел од НАТО, граѓаните и земјата се заштитени од сојузот на најмоќните држави во светот.
„Алијанса за Албанците имаше среќа да придонесе во процесот на членството на Северна Македонија во НАТО. Алијанса за Албанците со иста динамика и сериозност ќе даде политички и програмски придонес за забрзување на процесот за членство во ЕУ заедно со предизвиците на уставните измени кои се предуслов и примарна цел на членството на земјата во ЕУ“, потенцираат од партијата.
Македонија
(Видео) Приведени 18 навивачи по инцидентите на натпреварот Вардар-Пелистер во Аеродром

Полицијата приведе 18 навивачи по инцидентите во салата „Јане Сандански“ каде имаше дерби во Првата македонска ракометна лига меѓу Вардар 1961 и Еурофарм Пелистер. По фрлањето на предмети на теренот, а потоа и судир меѓу групите, известен е и јавен обвинител.
„Известен е јавен обвинител и се преземаат дополнителни мерки и активности за расчистување на случајот по закон за спречување насилство на спортски натпревари“, велат од МВР за „Макфакс“.
По натпреварот, битолската навивачка група Чкембари, со шест автобуси и едно комбе заминаа од салата „Јане Сандански“. Вардар го совлада Пелистер. Долж булеварот беа распоредени униформирани полицајци и специјалци.
Натпреварот беше прекинат во 17-тата минута при резултат од 6-6, откако гостински навивачи при влегување во салата „Јане Сандански“ почнаа да фрлаат кон домашните навивачи со пиротехнички средства, на што возвратија навивачите на Вардар, кои влегоа на теренот фрлајќи со шишиња и тврди предмети.
Во рамките од петтото коло во ракометната Суперлига, Вардар на домашен терен во Скопје со 31:24 (13:10) славеше победа откако го победи Пелистер.
Македонија
(Видео) „Левица“: Природна и социјална катастрофа – Експлоатација на песок на реката Пчиња

Жителите на селата долж текот на реката Пчиња цела деценија се соочуваат со еколошка катастрофа. Како и на повеќето реки низ Република Македонија, така и овде бизнис интересите задираат во квалитетот на животот на жителите и условите кои го одредуваат, соопштија од „Левица“.
„ Речните корита во минатото, пред да почне расчеречувањето кое го предводат СДСМ-ДУИ и ВМРО-ДПМНЕ, им служеле на селаните кои живееле околу нив. Поради негувањето на односот помеѓу човекот и природата, изобилното плодно земјиште било организирано во задруги и им користело како на жителите така и на државата. Сега, кога богатењето на поединци е далеку поважно од добробитта на луѓето и зачувувањето на државните ресурси, правилата на игра се различни.
Партиите на милионерите кои владеат изминатите децении, го впрегнаа државниот апарат директно на штета на чесниот народ. Така, коритата на реките на чии пространства се наоѓаат селата, нивите и пасиштата кои се во сопственост на АД Водостопанство, свирепо и систематски се уништуваат.
И во случај на селата Горно, Средно и Долно Коњари, под превезот на уредување на речните корита се врши предаторска експлоатација на песок која ја уништува плодната почва и ги контаминира подземните води кои селаните ги користат за пиење“ додаваат од партијата.
На средба со селаните од овие села разговараа пратеникот Борислав Крмов, членот на Президиумот Реџеп Исмаил и портпаролот Амар Мециновиќ, на кои им беа посочени сите препреки со кои се имаат соочено во нивната борба. За сите повеќегодишни притисоци кои кулминираат со минатогодишниот протест и блокирањето на патиштата околу селата.
„ Просторот помеѓу селата е потполно уништен а самото корито е поместено од прекумерното ископување. Живиот свет во реката е речиси пред исчезнување.
„Левица“ е секогаш на страната на селаните, работниците и обесправените, и во отсуство на слух од централната власт, како и од градоначалниците на општините во ова подрачје, се залагаме за крајно решение, реставрација и одговорност за стореното“ велат од „Левица“.