Со Колективниот договор веќе од септември, вработените во високото образование ќе добијат покачување на платите за 10 отсто, а ќе им биде исплаќан и минат труд кој само некои од установите го исплаќале досега, соопшти на денешната прес-конференција Бисера Костадинова Стојчевска од СДСМ.

„Колективниот договор ги нормира и унапредува правата на работен однос во секторот високо образование и наука меѓу кои: вработување, унапредување, право на годишен одмор, право на платено и неплатено отсуство, право на отпремнина, заштита од отказ, услови за парична помош, синдикална организација. Во договорот се дефинира и начин за пресметување на платата, кој се темели на степенот на сложеност и одговорност на работното место, изразен како коефициент во однос на просечната државна плата“, посочи пратеничката од владејачката партија.

Според Костадинова Стојчевска, со ова се обезбедува систем на валоризација, но и континуиран раст на платата, која, како што кажа, ќе расте заедно со просечната. Дополнително, во основната компонента на платата, ќе се исплаќа и минат стаж.

„Со вклучувањето на Независниот академски синдикат во колективниот договор, за првпат во 30 години независна држава, професорите директно преговараа за своите права со Министерството, без посредство на раководните структури на државните универзитети“, кажа таа додавајќи дека овој Колективен договор е потврда за грижата на институциите кон високото образование.