Македонија
(Видео) Митева: СДСМ го осиромашува домашниот буџет

Неуспешните економски политики на СДСМ не може да резултираат со успех во енергетиката, тоа се гранки што се поврзани и зависни една од друга. СДСМ минатата година ја заврши со прогласување енергетска криза, а почетокот на оваа година го дочека со криза во снабдувањето со топлинска енергија, изјави на денешната прес-конференција Марија Митева, портпарол на ВМРО-ДПМНЕ.
Таа додаде дека единствена причина за ова е неспособноста на СДСМ. Од истите луѓе во економскиот и во енергетскиот сектор можеме да очекуваме исти погубни и лоши политики. Бислимоски како прв човек на РКЕ уверуваше дека нема да се покачи парното, нема да се покачи цената на гасот, дека компаниите се спремни за грејната сезона, а реалноста е сосема спротивна – парното е поскапено, цената на гасот е поскапена и компаниите работат со загуба.
Митева истакна дека додека ревносно се обидуваат да се претстават како решение на проблемите, фактите излегуваат на површина. Сѐ уште не се знае колку државата ќе ја чини кризната состојба на пазарот со топлинска енергија. Познато е само дека со 6 милиони евра од буџетот ќе се помогне БЕГ да ги покрие високите трошоци за гас.
Не се знае ниту кога точно ЕСМ ќе го преземе управувањето со БЕГ. Компанијата БЕГ, која испорачува топлина за најголем дел од корисниците на парно греење во Скопје, досега ѝ должи на централата ТЕ-ТО речиси три милиони евра за испорака на топлинска енергија. Само во првите 16 дена од месецот долгот кон ТЕ-ТО, која, освен струја, произведува и топлинска енергија, е речиси еден милион евра, изјави Митева.
Од ВМРО-ДПМНЕ прашуваат зошто Владата дозволи да се прогласи кризна состојба со снабдување топлинска енергија кога цената на гасот како енергент е ситуација што може да се предвиди? Зошто Владата на СДСМ не успеа да обезбеди гас по ниска цена, како што тоа го направија и другите земји од регионот и светот? Зошто Владата на СДСМ го претставува ова како свој успех кога цената на гасот повторно ќе се плаќа од парите на граѓаните?
Според Митева, додека просечниот граѓанин нема пари да ја помине зимата, додека високите цени во маркетите, поскапената струја за 15 %, поскапеното парно за 14 % го осиромашува домашниот буџет, СДСМ нуди парцијални решенија што долгорочно со сигурност ќе имаат негативен ефект.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Пендаровски од Давос: Политиката на отворени врати не треба да важи само за НАТО, туку и за ЕУ

Претседателот Стево Пендаровски, во рамки на учеството на Годишниот состанок на Светскиот економски форум во Давос, денеска се обрати на панел сесијата „Одржувањето на безбедноста во Европа“.
Учесници на дебатата беа Генералниот секретар на НАТО, Јенс Столтенберг, премиерот на Белгија, Александар де Кро, министерката за одбрана на Холандија, Кајса Олонгрен и шефот на претседателската администрација во Украина, Андриј Јермак, модерирана од новинарката Френсин Лаква, уредничка во Блумберг.
Во фокусот на дискусијата беше војната во Украина, како заедничка закана што го урна безбедносниот поредок кој со децении ѝ помогна на Европа да напредува во мир, но и чекорите што Европската Унија треба да ги преземе во радикално променетиот контекст.
Учесниците на панелот ја осудија руската агресија и изразија поддршка за украинскиот народ. Тие ја посочија важноста од превенција на ескалација на конфликтот во Украина и неопходноста да се обезбеди заштита на НАТО сојузниците.
Претседателот Пендаровски истакна дека руската инвазија врз Украина како никогаш претходно ја наметна потребата Европската Унија да се фокусира на интеграцијата кон земјите од Западен Балкан, процес кој дополнително ќе ја зајакне стабилноста, безбедноста, демократизацијата на нашиот регион, а со тоа ќе придонесе и кон целокупната безбедност на континентот.
Нагласи дека НАТО, но и Европската Унија, се двата коридори за подобра, побезбедна и попросперитетна иднина.
„ Потребно е да ѝ помогнеме на Украина, да ги убедиме и другите сојузници кои можеби имаат одредена доза на скептицизам. Политиката на „отворени врати“ не треба да важи само за НАТО, туку да се применува и за Европската Унија, вратите и на двете организации да останат отворени за украинскиот народ. Украинците се борат за сопствената слобода, но оваа борба е и за одбрана на демократските вредности. Ова е војна на една автократија против демократија. Доколку Путин успее некако да победи во оваа војна, тогаш нема само да ја победи Украина“ додавајќи дека Северна Македонија во рамки на своите можности дава поддршка на Украина, од воена до дипломатска помош и дека политиката на отворени врати мора да продолжи, не само во однос на НАТО, туку и во однос на Европската Унија.
„Политиката на отворени врати не треба да важи само за НАТО Алијансата, туку и за Европската Унија. Во спротивно, концептот за обединета Европа, во мир со себе и со светот од Атлантикот до Урал, ќе биде само сон“, рече претседателот Пендаровски.
Македонија
Утре сончево и топло, попладне нестабилно со пороен дожд и грмежи

Времето утре ќе биде сончево и многу топло со слаб до умерен ветер од јужен правец. Попладне, претежно во источните делови, ќе има изолиран развој на нестабилна облачност со пороен дожд, грмежи и засилен ветер.
Минималната температура ќе биде во интервал од 9 до 15, а максималната ќе достигне од 29 до 34 степени. УВ=8
Во Скопје сончево и топло, попладне во делови од котлината ќе има услови за појава на нестабилност со краткотраен пороен дожд, грмежи и засилување на ветерот. Минималната температура ќе се спушти до 13, а максималната ќе достигне 33 степени.
Во следните денови ќе продолжи сончево и натпросечно топло време. Во попладневните часови ќе има локален развој на нестабилна облачност, проследена со пороен дожд, грмежи и засилен ветер, на места и во форма на невреме со појава на град. Во недела дневната температура ќе се намали за неколку степени.
Македонија
Муцунски: Автокефалноста на МПЦ ни носи духовна радост и душевен мир

Честитки по повод упатувањето на томосот за автокефалност на Македонската Православна Црква – Охридска Аерхиепископија од страна на светиот синод на Српската Православна Црква, упати градоначалникот на општина Аеродром, Тимчо Муцунски.
„ Искрено посакуваме и веруваме дека наскоро ќе следи официјалното прогласување на автокефалноста на нашата вековна Македонската Православна Црква – Охридска Архиепископија и од страна на вселенскиот патријарх Вартоломеј.
Овие значајни одлуки и благопријатни вести ни носат голема радост, духовен мир и надеж за поубава и посветла иднина на сите нас во татковината, на сите Македонци ширум светот и на целиот христијански православен свет“ напиша Муцунски.