Македонија
(Видео) Николов: Две години корона, две години хаос, сега пациентите пак се заглавија во здравствениот безизлез
И по две години целосно конфузност во здравството, најмногу жртви и несоодветно справување во периодот на пандемијата со корона, Владата предводена од СДСМ и ДУИ не се грижи за подобрување на состојбите во здравствениот систем. Единствена грижа е да се прави перцепција дека сè е во ред иако сме далеку од ред, изјави на денешната прес-конференција Игор Николов, претседател на комисија за здравство на ВМРО-ДПМНЕ.
Тој додаде дека пациентите деновиве се повторно заглавени во здравствена некоординација која наликува на хаос креиран од оваа хибридна Влада.
Николов прашува дали има насоки, има ли правец и правила? Има ли патеки на движење на пациентите како да стигнат до вистинската здравствена установа? Деновиве во Клинички центар „Мајка Тереза“ затворени се двата ургентни центра, и хируршкиот и интернистичкиот, а за пациентите нема одговор и нема јасни патеки на движење. Наместо јасни насоки за граѓаните каде да се обратат за здравствена услуга, секој мора да лута и на крајот решението најчесто да се обиде да го бара во приватното здравство, ако има пари.
„На Клиниката за токсикологија се бојадисува првиот, а затворено е приземјето и тоа е добро образложение зошто не треба да се примаат пациенти. Од неодамнешното со фанфари најавувано реновирање на Инфективна клиника, излезе дека само се бојадисувале собите и се инсталирале нови противпожарни апарати. Наместо ветуваниот нов клинички центар, сведоци сме само на еден вид импровизирани објекти кои повеќе наликуваат на зарзаватчилници, коишто ниту новиот министер не смее да помисли да ги елиминира од паркот на кампусот „Мајка Тереза“. Низ кампусот клиники „Мајка Тереза“ никнуваат трафики, а за истите никој нема ингеренции во рамките на кампус, а овие клиники даваат услуги на граѓаните речиси од цела Македонија”, изјави Николов.
Тој ги повика граѓаните на 18 јуни во 20 часот пред Владата на Република Македонија да се стави крај на оваа неспособност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кумановци ќе се возат бесплатно во градските автобуси до крај на годинава
Кумановци ќе се возат бесплатно до крајот на годинава, одлучија советниците на последната седница. Мерката субвенциониран превоз кој опфаќа 26 линии ќе продолжи до крајот на декември 2025 година.
-Методологија за пресметка е 50 денари по изминат километар, секоја линија има возен ред, има број на поаѓања, секоја линија има утврдено точна километража така што прецизно е пресметано по број на поаѓање, односно утврдениот возен ред којшто го потпишува градоначалникот. Кога ќе се помножат изминати километри по релација и по број на поаѓање се доаѓа до цифра од 6,5 милиони денари за месец декември како и 650.000 мислам за овој меѓуопштински превоз помеѓу Куманово и Старо Нагоричане, рече раководителката на секторот за комунални дејности, Лидија Ланг Спасовска.
Одлуката беше изгласана со мнозинство советници. Опозицијата смета дека мерката е прескапа, во интерес на само дел од кумановци, предлагајќи мерките да важат за учениците и ранливите категории граѓани. Дел од советниците побараа и формирање на јавно претпријатие, некои и набавка на електрични автобуси. Надлежните потврдија дека општината аплицирала на повик на Владата за набавка на 25 електрични автобуси, што би требало да донесе долгорочно решение за јавниот превоз и да го намали товарот врз буџетот.
Од Општина Куманово потенцираат дека субвенционираниот превоз е социјална и еколошка мерка која има повеќекратни позитивни ефекти. Со мерката како што укажуваат се намалуваат трошоците во семејните буџети, се редуцира сообраќајниот метеж во централното градско подрачје и има придонес кон намалување на аерозагадувањето. Дополнително се наведува дека мерката најмногу им користи на жителите од приградските населби, кои во спротивно би имале значителен трошок за дневно патување. И граѓаните имаат различни коментари, додека едните ја поддржуваат, други реагираат дека има пренатрупаност на одредени линии, недоволна фреквенција на автобуси, злоупотреба од страна на поединци кои се возат без реална потреба, незадоволство кај ученици и работници поради недоволниот капацитет во одредени термини.
Македонија
Левица со остра реакција на најавените поскапувања на парното и струјата
Левица остро ја осудува одлуката за најновото зголемување на цената на парното за 5 проценти, како и најавениот раст на цената на електричната енергија од јануари. Од партијата сметаат дека овие одлуки не се само технички бројки во одлуките на Регулаторната комисија за енергетика, туку доказ за, како што наведуваат, хроничниот неуспех на Владата во енергетскиот сектор и за растечкиот удар врз стандардот на граѓаните.
Од партијата реагираат и на информациите дека ЕСМ ја нуди струјата по 65 евра за мегават-час, оценувајќи дека тоа ја демантира „владината приказна за стабилност во снабдувањето“.
Според Левица, граѓаните ја плаќаат струјата двапати – преку зголемените сметки и преку буџетски средства со кои се субвенционираат цените, со што, како што тврдат, Владата ја прикрива штетата од погрешните политики и скапи менаџерски одлуки.
Партијата дополнително обвинува дека РКЕ, наместо да го штити јавниот интерес, настапува како „сервис на монополските компании“, прифаќајќи ги нивните трошоци без реална проверка. Тоа, велат од Левица, резултира со повисоки тарифи на товар на граѓаните.
Во услови на инфлација и растечка енергетска сиромаштија, секое ново покачување претставува директен удар врз домаќинствата, реагираат од партијата. Наместо вложување во домашно производство, обновливи извори и енергетска ефикасност, според Левица, Владата дозволува стареење на мрежата, зависност од увоз и „одлив на профит кон приватен и странски капитал“.
Од таму бараат итно ревидирање на последните одлуки на РКЕ, јавно објавување на пресметките за поскапувањето, независна анализа на работењето на ЕСМ, промена на методологиите за пресметка на цени со заштита на стандардот на граѓаните, како и мерки за помош на енергетски сиромашните домаќинства.
Левица додава дека ќе продолжи да се спротивставува на политики кои, како што велат, го штитат профитот на монополите на штета на граѓаните и ќе се бори за враќање на клучните енергетски компании под државна контрола.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .

