Македонија
(Видео) Почнува уредувањето на покривот на „Мавровка“, ќе бидат засадени над 40 садници

Град Скопје во соработка со Општина Чаир и Здружението на корисниците на деловен простор во деловниот центар „Мавровка“ почна со уредување на третиот и најголем зелен покрив во Скопје – покривот на „Мавровка“.
Зелениот покрив се уредува според проект на архитектот Бесиан Мехмети.
„Се наоѓаме на најфреквентната раскрсница во нашиот град, каде што дневно поминуваат повеќе од 70.000 автомобили, место на кое се наоѓа државна мерна станица и место на кое избравме да го правиме овој зелен покрив од две причини. Прво, да го покажеме нашиот пристап на еднаквост на Градот, а второ, да го замениме зеленилото што во лудилото на проектот ‘Скопје 2014’ овде, на оваа микролокација, кај Ректоратот, беше уништено со цел да се изградат и недоизградат овие барокни згради што не се ниту дел од Универзитетскиот кампус. Искуството што го имаме со најексплоатираниот зелен покрив, зелениот покрив на Градскиот трговски центар, е навистина прекрасно. Мислењето на граѓаните и посетеноста ни даваат право како Град и како институции да продолжиме да вложуваме во овој тип на простор, кој во иднина ќе биде јавен. Во моментот може да видиме колку е сериозно уништен. Со реализацијата на овој проект не само што ќе имаме импакт со зеленило врз најголемата раскрсница во градот туку ќе влијаеме и врз самиот трговски центар. На луѓето ќе им овозможиме уште едно прекрасно катче, кое од вака руинирана површина што зрачи топлина поради бетонот, ќе стане површина на која граѓаните ќе може да поминуваат пријатни моменти“, изјави денеска градоначалникот Петре Шилегов.
На овој простор се планира да бидат засадени над 40 вида садници на вкупна површина од 4.000 квадратни метри. Значајно е да се истакне и дека Скопје во услови на пандемија на коронавирусот ќе добие уште едно прекрасно место на кое ќе може да се одвиваат културни настани на отворено со почитување на здравствените протоколи. Дополнително, овој зелен покрив се наоѓа во непосредна близина на комплексот факултети при УКИМ и Националната универзитетска библиотека, што го прави уште една зелена локација на која студентите ќе може да го користат своето слободно време во паузите.
„Зелените покриви се една од мерките за намалување на т.н. урбани топлотни острови, кои воедно даваат можност за развој на вегетацијата и животинскиот свет во урбаните средини, а со нив Скопје добива еден нов и модерен лик со многу зелени површини и урбани содржини, кои нè носат чекор поблиску до целта – нашиот град, конечно, да стане зелена престолнина со која сите ќе се гордееме“, велат од Град Скопје.
За реализацијата на проектот, Град Скопје потпиша меморандум за соработка со Здружението на корисниците на деловен простор во „Мавровка“ и со Општина Чаир, а проектот е донација од Здружението.
На денешниот настан присуствуваше и градоначалникот на општина Чаир, Висар Ганиу.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Шар Планина ќе биде прогласен за национален парк

Триесет села на 62.705 хектари ќе влегуваат во заштитената зона на Шар Планина, која е на чекор да биде прогласена за Национален парк. Владата на вчерашната седница го утврдила текстот на предлог-законот подготвен од Министерството за животна средина и просторно планирање, со што Шара би станала заштитено подрачје од втора категорија.
Откако Собранието ќе го усвои законот, Владата ќе треба да оформи јавна установа, национален парк, во рок од 3 месеци, за што веќе се обезбедени средства од буџетот.
Министерот за животна средина и просторно планирање Насер Нуредини информираше дека додека трае постапката за донесување на законот, Владата донела одлука Шар Планина да биде под привремена заштита, со цел да се спречи донесување нови концесии на територијата на подрачјето. Ова решението треба да биде изготвено во рок од 2 недели.
„ Во однос на одлуките за градење мали хидроцентрали кои се веќе поминати, дадовме рок од една година надлежните министри да преговараат со инвеститорите со цел тие да се повлечат од градење, но истовремено да не биде финансиски оштетена државата. Нови концесии нема да има, тоа е впрочем и идејата, да се спречи давањето нови концесии“, изјави Нуредини.
Иницијативата Шар Планина да биде прогласена за национален парк датира од 1994 година.
„ Низ годините беа направени многу напори, но имаше и многу неуспешни обиди за да дојдеме до денешниот ден. зацврстувањето на брендот на Шара ќе има национално, регионално и меѓународно значење, а ќе го поттикне социоекономскиот развој, туризмот и органското производство“, рече Нуредини.
Македонија
Електронска адреса за пријавување на прекршување на правата на граѓаните за време на пописот

Народниот правобранител ги информира граѓаните дека активно ќе го следи процесот на спроведување на пописот, за целиот период на неговото времетраење од 1 март до 21 април.
За таа цел секој граѓанин кој смета дека му е прекршено некое право може да поднесе претставка по електронски пат на адресата [email protected]
Народниот правобранител по поднесената претставка ќе ја спроведе потребната постапка и за исходот ќе го информира подносителот.
Македонија
ВМРО-ДПМНЕ поднесе предлог-закон за укинување на пописот

Пратеничката на ВМРО-ДПМНЕ, Иванка Василевска на денешната прес-конференција ја обвини власта дека подготвува политички фалсификат и нерелевантен и фингиран попис. Таа нагласи дека пратеничката група на ВМРО-ДПМНЕ денеска во Собранието поднела предлог на закон за престанување на важење на Законот за попис, по итна постапка.
„ Сите факти и аргументи, ни говорат дека власта подготвува политички фалсификат и нерелевантен и фингиран попис. Од тие причини, како Пратеничката група на ВМРО-ДПМНЕ јасно и гласно кажуваме дека нема да бидеме нем набљудувач на овој крајно несериозен политички процес и затоа денес во Собранието на Република Македонија поднесовме Предлог на закон за престанување на важење на Законот за попис, по итна постапка.
На ова самоволие мора да му застанеме на патот и да не дозволиме криминален и насилнички попис. Оваа лакрдија што ни се случува во врска со пописот, ја најавувавме и предвидовме уште од самиот почеток. Но самобендисаната власт на чело со Зоран Заев, воопшто не сакаше да разговара и дебатира на оваа тема. Од редовна и статистичка операција, неспособноста на Зоран Заев и владата овој попис го претвори во политичка операција и пазарење, додворување и враќање на коалициски долгови“ изјави Василевска.
Таа рече дека пратеничката група на ВМРО-ДПМНЕ уште од самиот старт укажувала на многубројните недостатоци и аномалии на Законот за попис, поради што сега поднесуваат околу триесетина суштински амандмани, кои, како што рече, имаа за цел да го подобрат текстот на законот, но власта предводена од Зоран Заев не прифатила ниту еден амандман.
„ Нашите издржани забелешки и секојдневни укажувања за недостатоците и аномалиите на овој закон беа и се уште се, и тоа:
· злоупотреба на европското знаменце и европските вредности и скратената можност за стручна и опширна дебата,
· недостиг на консензус од сите политички партии,
· проблематична и недоречена методологија за спроведување на пописот,
· нефункционален и небезбеден систем за електронска евиденција на дијаспората, и
· погрешен тајминг за одржување на пописот, иако многу европски земји поради КОВИД кризата го одложија пописот за една година.
Но и покрај овие издржани аргументи, власта и Зоран Заев никако не отстапуваат од политичкиот договор и намерата по секоја цена да се одржи пописот. Нашата легитимна борба против одржување на ваков сомнителен и фингиран попис, го препознаа и огромен број на граѓани. За само неколку дена над 100 илјади граѓани, со име и презиме, јасно и гласно го кажаа своето мислење и недоверба и рекоа големо „НЕ“ за ваков попис“ додаде таа.
Пратениците од ВМРО-ДПМНЕ исто така бараат закажување на итна и неодложна седница на Собранието на која што ќе се изгласа овој Предлог на закон и ќе се стопира овој политички попис. За таа цел, Пратеничката група на ВМРО-ДПМНЕ апелира до сите пратеници, без разлика на која политичка партија и коалиција припаѓаат и без разлика на етничка и национална припадност, да го поддржат овој Предлог закон.
Василевска нагласи дека ВМРО-ДПМНЕ и пратеничката група на ВМРО-ДПМНЕ не се против попис на населението, бидејќи, како што рече таква статистичка операција е многу важна и неопходна за Република Македонија, но сакаат да упатат силна порака дека се и ќе бидат против фингиран и наместен попис.
- Книги3 месеци
Македонски лекар ја објави последната исповед на Јосип Броз Тито
- Македонија3 месеци
МЖСПП: Мечкиното грозје важен ресурс, кој треба грижливо да го собираме
- Македонија3 месеци
(Видео) Отстранети два нелегално изградени објекта во општина Центар
- Македонија2 месеци
Возачот на „бентлито“ што „влета“ на плоштад казнет со 45 евра, објавена фотографија од записникот
- Регион2 месеци
(Видео) Прекината прес-конференција на градоначалникот на Бања Лука: „Луѓе ова е сериозен земјотрес“
- Регион2 месеци
(Видео) Снимен моментот на потресот во Петриња – луѓе не можат да се задржат на земјата
- Европа1 недела
Планот за отклучување на Германија протече во медиумите, Меркел: Имаме трет бран
- Свет1 месец
Поради примање мито во Кина погубен поранешен државен функционер