На денешната седница на собраниската комисија каде се дискутираат измените на Законот за заштита на населението од заразни болести, пратеничката од ВМРО-ДПМНЕ, Дафина Стојаноска, истакна дека иако состојбата е алармантна на старо-новата Влада и требале повеќе од 40 дена за да донесе некомплетно предлог законско решение, во кој период имало илајдници заразени и стотици починати граѓани.

„Состојбата е алармантна, ќе одам хронолошки па ќе потсетам дека старо-новата Влада се избра на 30 август оваа година што знали дека се поминати 40 дена откако профункционира оваа влада, и 40 дена и требаа за да поднесе ваков предлог закон за состојба за која вие велите дека ВМРО-ДПМНЕ го кочи, а ние ве чекаме да донесете едно некомплетно предлог законско решение“, истакна пратеничката Стојаноска.

Таа вели дека конкретните амандмани се нецелосни, погрешни и небулозни.

„Бројките на 30 август во однос на новозаразени чудно тој ден беа паднати од претходниот ден од 131 новозаразен, на 39 новозаразени и 4-ца починати, а вчера имавме 628 новозаразени и 15 починати лица, 40 дена и требаа на власта во кој имавме илјадници новозаразени и неколку стотици починати, за тоа опозицијата во парламентот не сноси вина, затоа што 40 дена го чекавме ова законско решение, кое дојде на 8 октомври, а денеска сме 28 октомври за кое ви текна по 20 дена да поднесете амандмани на ова законско решение кое е итно“, рече Стојаноска.

Министерството за образование и наука го повлече учебникот по македонски јазик за петто одделение, поради несоодветна и дискриминирачка содржина.

„ Во овој учебник се констатирани дискриминирачки текстови, но и примери коишто ја засилуваат родовата нееднаквост. Утврдени се голем број пропусти и грешки, но и непочитување на македонската стандарднојазична норма. Министерството за образование и наука продолжува со силни реформски процеси во образованието како и со обезбедување на квалитетни и современи материјали за учениците и наставниците“ се наведува во соопштението од МОН.

Од МОН информираат дека во тек е подготовка на целосно нов Закон за учебници со кој ќе се надминат недостатоците во овој сегмент од образованието.

Министерот за транспорт и врски Благој Бочварски имаше видео-конференциски состанок со Амбасадорот на Европската Унија во земјава, Дејвид Гир.

Тема на разговорот беа крупните инфраструктурни проекти што се реализираат во нашата држава со поддршка на ЕУ.

Пред сè, акцент се стави на железничкото поврзување со Република Бугарија и доизградбата на Коридор 8. Притоа, министерот изрази силно уверување дека изградбата на пругата е примарен фокус на Владата и се преземаат сите неопходни чекори за нејзино завршување.

Министерот Бочварски и амбасадорот Гир разговараа и за активностите за доизградба на експресниот пат Градско-Прилеп, за што Министерот истакна дека Министерството за транспорт и врски и ЈП за државни патишта ги преземаат сите потребни чекори за интензивирање на градежните работи.

Се отвори и прашањето за зголемување на капацитетите и потребата од искористување на средствата преку ИПА фондовите.

Министерот Бочварски потенцира дека евроинтеграцијата е наш врвен приоритет, а Европската Унија наш најзначаен партнер. Во таа насока, поддршката што ја добиваме од ЕУ во изградба и унапредување на целокупната инфраструктура во државата е од исклучителна важност за нашата земја.

„ Интензивирање на соработката со земјите членки на ЕУ и унапредување на регионалното поврзување се стратешки определби на Владата. Во таа насока, решително се соочуваме со сите предизвици и ги преземаме сите неопходни чекори за доизградба на железницата кон Република Бугарија и целосно комплетирање на патниот и железничкиот Коридор 8, кој е клучен не само за економскиот развој на нашата земја, туку е од особена важност за целиот Регион. Со амбасадорот Гир разговаравме и за модернизација на патната инфраструктура, потенцирајќи ги нашите заложби за подобрување на регионалното поврзување, олеснување на транспортот и зголемување на безбедноста на патиштата“ – изјави министерот за транспорт и врски, Благој Бочварски.

На крај министерот изрази благодарност за досегашната соработка и поддршка што Европската Унија и ја овозможува на Република Северна Македонија во евроинтегративните процеси.