Министерките за образование и наука и за одбрана, Мила Царовска и Радмила Шекеринска, се сретнаа со учениците што постигнаа големи успеси на двете врвни интернационални олимпијади по информатика во Грузија и во Сингапур и поразговараа за предизвиците што ги имаат во наставата, како и за начинот на кој се подготвуваат за натпреварувањата.

На Интернационалната олимпијада по информатика во Сингапур учествуваа Благојче Павлески, Андреј Величковски, Андреј Шекеров и Тео Китановски, а тимот што учествуваше на Европската јуниорска олимпијaда по информатика во Грузија го сочинуваа Сара Стефановска, Атина Рувинова, Јан Стојановски и Иван Јованоски.

Министерката Царовска рече дека промовирањето на постигнувањата на учениците е поттик младите да се натпреваруваат со врсниците од светот и да постигнуваат што подобри резултати.

„Секој медал доаѓа како резултат на многу учење, посветеност и желба постојано да се открива нешто ново во областа во која истражувате. Информатиката е испреплетена во сите сфери на современиот живот и затоа вашите резултати се уште позначајни. Продолжете истрајно да учите и да бидете наша гордост, а ние како Министерство за образование и наука и како Влада ќе бидеме ваша поддршка и ќе го поттикнуваме зголемувањето на интересот за стекнување повисоки знаења“, укажа Царовска.

Охрабрувајќи ги сите ученици да вложуваат во себе и во своето знаење, министерката за одбрана Шекеринска изјави дека од почетокот на 2021 година Министерство за одбрана ќе почне со стипендирање млади што студираат и се образоваат за т.н. критични специјалности за Армијата.

„Тоа се области што им се потребни на Армијата и на нашата одбрана, а ги немаме доволно. Такви се областите информатика, електротехника, сајбер-одбрана, области во кои ни треба специјализирано знаење, но ќе ни треба и дополнителна наобразба. Стипендијата ќе ги опфати сите години на факултетот, со единствен услов кандидатите да преземат обврска по дипломирањето да работат во полза на нашата одбрана и нашата Армија“, рече министерката Шекеринска.

Од вчера стапија во сила новите измени и дополнувања на Законот за заштита на задравјето на населението од заразни болести. Со тоа и инспекциските служби добија нови овластувања при постапување со прекршителите на здравствените протоколи.

Државниот пазарен инспекторат синоќа во повеќе градови во државата извршил 48 надзори и 742 контроли во угостителски објекти, казина и обложувачници во согласност со Законот за угостителската дејност, Законот за заштита од пушењето и здравствените протоколи.

„При спроведените контроли во Гостивар (2 надзора и 50 контроли) во угостителски објект што се наоѓа во ТЦ ‘Јавор’, констатирано е прекршување на новите одредби од изменетиот Закон за заштита на здравјето на населението од заразни болести за што ќе се преземат соодветни мерки. Не е затекнато прекршување на работното време кај контролираните објекти. Во истиот момент кога се констатирани прекршувањата ДПИ на самото место го затвори објектот, а изречена е и парична казна.

Најмногу контроли и надзори се спорведени во Скопје, односно 213 контолри и 12 надзори, при што не се констатирани прекршувања на здравствените протоколи, потоа во Битола (9 надзори и 131 контрола), Штип (3 надзори и 83 контроли), Кавадарци (3 надзори и 63 контроли), Струмица (2 надзора и 50 контроли), другите контроли и надзори се во Тетово, Охрид, Куманово, Битола, Струга“, се наведува во извештајот на ДПИ.

Инаку, според новите измени и дополнувања на Законот за заштита на здравјето на населението од заразни болести, доколку на терен инспекткорите констатираат дека одредено правно лице ги прекршува здравствените протоколи, во истиот момент ќе му се изрече привремена забрана за вршење на дејноста од 10 до 30 дена, односно објектот на самото место ќе биде затворен. Дополнително, според новите измени висината на глобите ќе варира во зависност од големината на правниот субјект – микро, мало, средно или големо претпријатие, како и соодветни глоби за одговорен на правно лице, трговец поединец или физичко лице.

Немаме ширење на Ковид-19 во училиштата, додека не се создадат услови за затворање, остануваме на овој модел, изјави министерката за образование Мила Царовска како одговор на барањето на СОНК наставниците да работат од дома.

„Сите држави во светот, а и СЗО и УНИЦЕФ, препорачуваат училиштата да останат отворени. Секаде во светот се отворени. Ние немаме голем број заразени. 0,05 проценти е заразеноста кај учениците и 0,6 проценти кај наставниците, што значи не надминуваме ни еден процент“, рече Царовска.

Според неа, социјалниот дијалог меѓу СОНК и Министерството е на многу високо ниво.

„Ние со ребалансот на буџетот обезбедивме финансирање. Училиштата во кои има доказ за надминување на часовите, во согласност со Законот за работните односи, треба да ги исплатат прекувремените работни часови“, вели Царовска по однос на барањето на СОНК наставниците да добијат додаток на платата.

Царовска, сепак, вели дека нема голем број училишта каде што има надминување на бројот на часови.