Возачот на „бентлито“, кое влета на скопскиот плоштад, е Бурим Маслан познат како Бурим Харачина, познат на полицијата, кој бил осуден со затворска казна за тешки дела разбојништво и загрозување со предизвикување општа опасност. Лежел затвор и за обид за убиство. И од лани има две кривични пријави за разбојништво и за насилство, изјави денеска портпаролот на ВМРО-ДПМНЕ, Наум Стоилковски.

„Лани и кај него е направен претрес дома при онаа т.н. спектакуларна полициска акција во Грчец и Арачиново кога беше пронајдено нелегално оружје и дрога. Кај него било пронајдено најмалку едно парче недозволено оружје. Овој човек поминува неказнето за илегално оружје, обид за убиство и насилство и затоа дивее на скопските улици“, посочи партискиот портпарол.

Тој се осврна и на првичната казна што му беше одредена на возачот во износ од 45 евра.

„Харачина објавува снимки на социјалните мрежи како вози со над 220 на час, лудува меѓу украсите на Петре од 200.000 евра, загрозува пешаци на плоштадот, а Заев и Оливер Спасовски прават маркетинг дека му наплатиле 45 евра“, рече Стоилковски.

Тој објави податоци според кои Харачина нема ниту еден ден работен стаж, но, како што рече портпаролот, има за лудување со луксузни возила, да купува нови како „бентлито“ купено пред неколку дена.

„Кој му дава сила и храброст на Харачина неказнето да се однесува како шериф среде Скопје со толку кривични пријави? Можеби и вчера ќе убиеше некого, ама помина со глоба од 45 евра. Вчерашното лумпување е исто предизвикување општа опасност по член 288 од КЗ, особено што е повторување на делото! Па го штити ли Заев возачот што дивееше со ‘бентлито’“, запраша Стоилковски.