Во населбата Капиштец синоќа повторно беше нарушен јавниот ред и мир, откако група малолетни лица со непримерно однесување извршија серија вандалски активности. Тие кршеа шишиња, палеа петарди и предизвикуваа тепачки, со што ја загрозија безбедноста на локалното население.

Градоначалникот на Општина Центар, Горан Герасимовски, остро го осуди овој чин и побара итна интервенција од надлежните институции.

„Ова не е изолиран инцидент, туку континуиран проблем кој бара итна реакција. Како одговорни граѓани, веќе поднесовме пријава до надлежните институции и апелираме до Министерството за внатрешни работи веднаш да преземе мерки за справување со овие недолични активности и да поведе детална истрага,“ истакна Герасимовски.

Општината апелира до Министерството за внатрешни работи да преземе брзи и ефикасни мерки за справување со ваквите појави, со цел да се спречат потенцијални трагични последици.

Градоначалникот предупреди дека малолетниците вклучени во ваквите дејства не само што им наштетуваат на другите, туку ризикуваат и да се повредат самите.

„Очекуваме брза и ефикасна реакција за да се спречи некоја поголема трагедија“, додаде Герасимовски.

Од 06:55 часот утрово, на патниот правец Гостивар – Стража и обратно, воведена е забрана за движење на тешки товарни возила, соопшти Автомото сојузот на Македонија (АМСМ).

Според информациите, сообраќајот на државните патишта во земјата се одвива непречено, но под зимски услови, по влажни коловози. АМСМ предупредува возачите да бидат внимателни, особено на делови каде што видливоста е значително намалена.

„На планинскиот премин Плетвар регистрирана е намалена видливост до 50 метри поради појава на густа магла. Ги потсетуваме возачите дека е неопходно користење на соодветна зимска опрема и прилагодување на брзината според условите на патот“, се наведува во соопштението на АМСМ.

Возачите се советуваат да ја следат состојбата на патиштата преку редовните ажурирања на АМСМ и да избегнуваат непотребни патувања низ погодените подрачја.

Времето денеска ќе биде променливо облачно со повремени врнежи од дожд. На планините и на некои од повисоките места врнежите ќе бидат од снег. Ќе дува умерен, а вдолж Повардарието засилен северен ветер. Минималната температура ќе биде во интервал од 0 до 5, а максималната ќе достигне од 4 до 10 степени.

Како што информира УХМР, во Скопје ќе биде променливо облачно со повремен дожд, а во повисоките делови од котлината од дожд и снег. Ќе дува умерен северен ветер. Минималната температура ќе се спушти до 3, а максималната ќе достигне до 6 степени.

Во текот на следната работна седмица времето ќе биде стабилно со ниски утрински температури. В понеделник ќе дува умерен, вдолж Повардарието засилен северен ветер. Од вторник до четврток по котлините ќе има појава на магла и ниска облачност, поради што и дневни температури ќе бидат пониски.