Македонија
(Видео) Шилегов на трибината „Најдоброто за нашата општина“: Скопје го направивме успешна приказна
Заедно со вас граѓаните успеавме да создадеме едно сосема ново, едно поинакво Скопје да го претвориме Скопје во една сосема поинаква, успешна приказна, а таа приказна не завршува тука. Скопје денес е многу подобро од пред 4 години. И тоа е така затоа што Скопје го заслужува најдоброто. А најдоброто допрва следува, порача пред насобраните граѓани на трибината на СДСМ под мотото „Најдоброто за нашата општина“, градоначалникот на Град Скопје Петре Шилегов.
Тој додаде дека после 4 години вложување многу љубов, средства, волја и упорност, разликите се видливи
„Луѓе без визија и морал не затрупаа во камен, стиропор и бронза, служевме за потсмев во светот додека се буквално се гушевме од невкусот и криминалот и во загадениот воздух, што ни го оставија во аманет, а денес, после 4 години вложување многу љубов, средства, волја, упорност во секое маало, во секое катче од Градот убав, од нашето Скопје, разликите се видливи, разликите се неспоредливи, нагласи Шилегов, додавајќи дека токму тоа опозицијата најмногу ја боли и води црна пропаганда, која паѓа во вода кога се возат по новиот булевар Христијан Тодоровски Карпош, до обиколница, кога возат велосипед на булевар АСНОМ, кога се движат по Никола Карев или пластичарска или Босна и Херцеговина“, рече Шилегов.
Тој наведе дека само минатата година се реконструирани и изградени вкупно 21 улица, сите 23 средни училишта во градот се реконструирани и сега имаат нови енергетски ефикасни фасади и прочистувачи за воздух во секоја училница.
„Бас рапид транзит системот на брз автобуски превоз популарно наречен „трамвај на тркала“ е на чекор од неговата имплементација. Со потпишувањето на договорот за заем од 70 милиони евра, со поддршка на Владата, процесот на воведување на БРТ во Скопје го доведовме до точка од која нема враќање. За 4 години ќе почне да работи на двата правци“, истакна Шилегов, додавајќи дека токму СДСМ во Скопје имплементира најбрз концепт за превоз на патници во Европа.
Според Шилегов, денеска никој веќе не зборува за загадување.
„Започнавме војна со аерозагадувањето со воведување на нови 40 мерки“, истакна Шилегов.
Тој додаде дека само со субвенциите за инвертер клима уредите во Скопје се заменети 6.500 грејни тела, изградени се 2 нови зелени кровови на ГТЦ и Домот на градежници, третиот на Мавровка се прави, а воведен е целосно нов концепт за третман на комуналниот отпад, дивите депонии и дивите паркиралишта ги претвораме во паркови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес без вода повеќе скопски улици во општините Бутел и Гази Баба
ЈП „Водовод и канализација“ – Скопје информира дека денеска поради два одделни зафати на водоводната мрежа, повеќе скопски улици и населби ќе останат без вода или со намален притисок во снабдувањето.
Од претпријатието соопштуваат дека поради уличен дефект од ф-400 мм на ул. Бутелска б.б, кај сервис „Топал“, во периодот од 11:00 часот па сè до негово отстранување, без вода ќе бидат корисниците на улиците Хо Ши Мин, Марко Крале, Призренска, Петар Манџуков, Александар Бујнов, Краишка, Коле Канински, како и корисниците на Бутелска – од крак 1 до крак 35 и од крак 2 до крак 14, на подрачјето на општина Бутел.
Исто така, денеска, поради технички зафат на бул. Александар Македонски б.б, во периодот од 05:00 часот па до завршување на работите, без вода ќе останат корисниците на бул. Александар Македонски, улиците Палмиро Тољати и Маџари, жителите од населбата Методија Андонов – Ченто и село Сингелиќ, како и дел од корисниците на ул. 808 и бул. Киро Глигоров, на територија на општина Гази Баба.
Намален притисок во водоснабдувањето, како што информира ЈП Водовод и канализација, ќе имаат и корисниците од населбата Автокоманда – ниска зона, како и од населбите Триангла и Хиподром, како и корисниците на ул. Перо Наков во близина на Кванташкиот пазар.
Македонија
Поплавени дворови, подруми и ниви во Општината Чешиново – Облешево, не се чистеле каналите
Во Општината Чешиново – Облешево во повеќето од населени места се поплавени дворови, подруми, ниви со неожнеан ориз и житни култури, што е резултат на обилните дождови што го зафати регионов неделава. Веќе неколку дена се користи градежна механизација, пумпите на Територијална противпожарна единица од Кочани, исто така работат со полна пареа. На ваков начин се прават обиди да се санираа штетите и да не се дозволи водата од каналите и реките да влезе во селата.
Кризничиот штаб на Општината Чешиново-Облешево е на терен, а градоначалникот Јорданчо Костадинов бара помош и од државните институции за да се справат со поплавите.
– Ние, со малите можности што ги имаме со Јавното комунално претпријатие, неколку дена се бориме со овој проблем и бараме најсоодветни решенија. Излезени сме на терен со капацитетите кои ги имаме, но сепак морам да апелирам до целата јавност да пружи помош на нашата општина, бидејќи со тоа што ние го располагаме како капацитет не е доволно да се справиме со овој проблем, алармира градоначалникот на Општината Чешиново – Облешево.
Мештаните на Чешиново и Облешево велат дека причина за поплавите во нивните села се неисчистените канали, појава, што според нив, се повторува повеќе години наназад.
Во понеделник во поплавеното подрачје ќе се формира Комисија, а граѓаните ќе имаат можност да пријавуваат штети.
Македонија
Облачно со сончеви периоди, на некои места слаб снег
Времето денеска ќе биде променливо облачно со сончеви периоди. Во утринските часови наместа ќе провејува слаб снег. Ќе дува слаб до умерен ветер од северозападен правец. Минималната температура ќе биде во интервал од -2 до 3, а максималната ќе биде во интервал од 7 до 13 степени.
Во Скопје, времето ќе биде променливо облачно со сончеви периоди. Ќе дува умерен северен ветер. Минималната температура ќе се спушти до 0, а максималната ќе достигне до 9 степени.
До вторник ќе биде претежно облачно и суво, а во среда ќе има врнежи од дожд кои ќе бидат пообилни во западните делови. На некои од повисоките планини врнежите од дожд ќе преминуваат во врнежи од снег. До крајот на неделата во утринските часови ќе има појава на магла во одделни котлини.

