Зоран Заев и Драги Рашковски зајдоа во криминал и корупција, па уште хеликоптери им фалат, рече на прес-конференција генералниот секретар на ВМРО-ДПМНЕ, Игор Јанушев, кој и денеска зборуваше за Системите за итна хеликоптерска медицинска помош и спасување (САР и ХЕМС).

Како што рече тој, инволвираните ги лажат и новинарите и јавноста дека фирмата стара 24 дена пред да биде распишан тендерот, всушност конкурирала за монополскиот бизнис за да нема никаков ќар.

„Ако ова не е потценување и понижување и на медиумите и на граѓаните, тогаш навистина не знаеме што е. Има ли бизнис што го почнале Вице Заев или Трајче Заев, а знаеле дека во него нема профит? Ете во тоа нè убедуваше Рашковски. Дека било нормално фирма да влезе во бизнис, без да има добивка. Доколку државата нема никаков трошок, а фирмата сама треба да се грижи за покривање на трошоците, зошто тогаш на фирмата би ѝ требало јавно приватно партнерство, а не би стартувала сама“, јавно праша генералниот секретар на опозициската партија.

Според него, се кријат фактите во надеж дека јавноста ќе престане да прашува каде ќе завршат 72 милиони евра, но како што рече, ВМРО-ДПМНЕ ќе продолжи да бара одговори.

„Како партнерот ќе наплаќа 9 милиони евра годишно или 72 милиони за 8 години? Дали и колкав дел од патарини ќе се издвојуваат за овој проект? Дали споменувањето на зелениот картон од страна на Рашковски, значи дека и тој е во игра за наплата? Кои се другите иновативни методи за наплата на 9 милиони евра?“, се дел од прашањата кои ги упати Јанушев.

Тој вели дека јасно е оти овие 72 милиони евра ќе отидат во нечиј џеб.

„Затоа Заев нè убедува дека тоа немало да бидат од буџетот, но најверојатно ќе бидат од патарини или авионски карти. Значи не по врат, по шија“, оцени претставникот на ВМРО-ДПМНЕ и порача дека веќе постојат две издвоени мислења во однос на сомнителната постапка.