Времето утре претпладне ќе биде променливо облачно, во северните делови со слаб локален дожд. Ќе дува умерен до засилен северен ветер, особено по должина на Повардарието. Во текот на денот облачноста ќе се намалува. Минималната температура ќе биде во интервал од 5 до 13, а максималната ќе достигне од 13 до 21 степен.

Во Скопје, претпладне променливо облачно со услови за слаб дожд. Ќе дува умерен до засилен северен ветер. Попладне облачноста ќе се намали. Минималната температура ќе се спушти до 8, а максималната ќе достигне до 16 степени.

Во наредните денови времето ќе биде сончево со мала до умерена, а на места, особено во северните и источните делови повремено значителна облачност со услови за слаб дожд. Ќе дува слаб до умерен северен ветер, особено по должина на Повардарието.

Министерот за здравство, Венко Филипче, по деветтата седница на Советот за безбедност за актуелната ситуација со пандемијата на Kовид-19 во земјава, на новинарско прашање истакна дека целиот Клинички центар е во ситуација на мобилизација.

„Утрово имав состанок со директорите на сите интерни клиники. На списокот на лекари, на медицински сестри практично се сите вработени лекари, медицински сестри од клиниките и по потреба ќе работат во дополнителните капацитети. Најпрво, со оглед на тоа што модуларната болница е речиси исполнета, во Институтот за белодробни заболувања и дополнителни болнички легла во рамките на повеќе интерни клиники. Во Клиниката за дерматологија, Клиниката за неврологија, којашто има пристап до централен довод на кислород. Во рамките на другите болници секаде се ослободени интерните одделенија и  кадарот е целосно ставен во истата ситуација, мобилизација како тука во Клиничкиот центар“, потенцираше Филипче.

Тој рече дека дополнителни одделенија веќе се спремни и во Градската општа болница „8 Септември“ има доволно болнички легла, кадарот е спремен да работи со пациенти со Ковид-19.

„Граѓаните треба да бидат спокојни, никој нема да остане без здравствена заштита, без лекарска услуга. Дозволете да апелирам да се почитуваат новите мерки. Вчера се изгласа измената на Законот за заштита на населението од заразни болести, мерките коишто се сега на сила се мерки коишто се практично имплементирани во цела Европа. Ограничениот капацитет на пополнување во јавниот превоз, задолжителното носење маски на отворено, понатаму затворањето на угостителските објекти по 23 часот, препораката да се работи од дома и онлајн е нешто што доколку се почитува може сериозно да ја намали трансмисијата на вирусот“, изјави министерот Филипче.

Пратеничката група на ВМРО-ДПМНЕ ќе ги искористи сите можности согласно Уставот, закон и Деловникот за работа на Собранието да го спречи изборот на Кацарска за избор на уставен судија.
Кацарска е судија на кој Уставен суд ѝ поништил одлука, таа е извршител и џелатот на власта. Кацарска е негативен пример за кој пишуваа универзитети од САД, таа не може и не смее да биде уставен судија, изјави Ели Панова, пратеник на ВМРО-ДПМНЕ.

Според Панова, со предлогот Кацарска да биде уставен судија само се заокружува договорот помеѓу власта и Кацарска.

„Таа требаше сите неистомисленици да ги осуди на максимална казна, а за возврат да биде избрана за уставен судија. Кацарска не е ниту морално, ниту стручно соодветна за да биде уставен судија. Нејзината номинација е благодарност и оддолжување од трас-трас ‘луј витон судството’ на власта, поради извршувањето на нарачките за драгонски казни. Кацарска значи неправда, а нејзиниот избор значи целосна контрола на власта врз Уставниот суд.

Во свое гостување во телевизиска емисија, во телевизијата на сега веќе осудениот Боки 13, сама кажа дека е комуњарка.

Кацарска беше дел од предметот „Поткуп“ во кој Зоран Заев беше фатен со видео и аудиоснимка како зема поткуп, предмет во кој таа снимка не се призна за доказ, а Заев беше ослободен.

Добрила Кацарска јавно се постави како портпарол на СДСМ во време на кампањата за Парламентарните избори 2020, кога за претседателот на ВМРО-ДПМНЕ Христијан Мицкоски зборуваше дека застанал на страната на криминалот и бранел криминалци, затоа што партијата искажала критика за нејзиното работење. Апсолутистот Луј 14 рекол „Државата, тоа сум јас“. Кацарска, извршителот власта, егзекуторот на одлуките на Бихаќка вели: „Правдата, тоа сум јас“.

Зошто Кацарска не може да биде уставен судија говори и фактот што таа не го почитува Уставот. Кацарска е судија на кој Уставниот суд ѝ поништил одлука. Судија кој не го знае и почитува Уставот не смее да биде уставен судија. Дополнително Комисијата за заштита од дискриминација утврди во повеќе наврати дека судијата Добрила Кацарска повредувала основни човекови права.
Кацарска е судија која не ги почитува жените.

Противуставните одлуки на Кацарска станаа предмет на интерес и на најврвните универзитети во светот, како Универзитетот Колумбија од САД, кој пишува за Добрила Кацарска како судија кој го прекршил Уставот и Европската конвенција за човекови права. Само во Северна Кореја и некои африкански племиња за уставен судија би се избрал некој кој го прекршил Уставот и човековите права, потврдено со одлука на Уставен суд. Но за власта тоа не е проблем.

Поставувањето на Кацарска за судија во Уставен суд е исто иста како одлуката Зоран Заев, трипати аболициран, да раководи со советот за реформи во правосудството. Или на Лидија Димова да ѝ се даде да биде министерка за финансии. Или најпрецизно, како на Катица Јанева да ѝ се дозволи да биде министерка за правда.

Кацарска држеше маратонски рочишта секој ден во неделата пред промената на името во случајот во кој имаше 5 обвинети пратеници, од кои тројца гласаа за промена на името и добија амнестија. За на крај својата пресуда, со која на 211 години затвор осуди луѓе за измисленото дело тероризам, да ја темели на исказите на докажаниот криминалец и лажен сведок на суд Александар Василевски – Нинџа, кој 4 пати го менуваше исказот за 27 април искажувајќи бројни лаги и измислици. Кацарска не им веруваше на сведоци под заклетва, туку на заколнат криминалец.

Кацарска со драгонски казни со прекршување на законите ги осуди и Јанкулоска, Талевски, Поповски и многу други кои не се истомисленици со власта.

Поставувањето на Кацарска во Уставен е само продолжување на праксата на СДСМ. Секогаш кога СДСМ е на власт, за судии во Уставен суд бира луѓе од многу голема доверба за самиот врв, како што на пример беше и судијката Габер-Дамјановска.

Овие судско-обвинителски кланови мора да станат минато“, порача Панова.