Како дел од агендата, на редовната четврта седница на Владата на Северна Македонија, што ќе се одржи во Штип, премиерот Спасовски и министрите во Владата ќе имаат серија активности што ќе се одржат во регионот.

Министерот за земјоделство, шумарство и водостопанство, Трајан Димковски, како дел од своите активности во пресрет на владината седница во 12.30 часот во Штип, ќе изврши увид во работата на пречистителната станица „Злетовица“ во населбата Баби. По увидот, предвидени се изјави за медиумите.

Во текот на денот и во рамките на овие теренски активности пред одржувањето на владината седница во Штип, заменик-претседателката во Владата и министерка за одбрана, Радмила Шекеринска, заедно со британскиот бригаден генерал, Хју Лојд Џонс, ќе ја посети касарната „Јане Сандански“ во 13.30 часот во Штип, во која се реализира обука под менторство на припадниците на вооружените сили на Обединетото Кралство.

Теничкиот премиер Оливер Спасовски во придружба на заменик-претседателката задолжена за координација со економските ресори, Мила Царовска, дополнителната заменик-министерка за труд и социјална политика, Санела Шкријељ, и директорката на УЈП, Сања Лукаревска, ќе ја посети текстилната компанија „Албатрос“ во Штип, каде што ќе оствари средба со менаџментот и вработените во фабриката во 14 часот. По средбата, предвидени се изјави за медиумите. На оваа средба ќе присуствуваат градоначалникот на општина Штип, Благој Бочваров, и претставник на Организацијата на работодавците, како и претставник на здружението „Гласен текстилец“.