„Андреј Жерновски, познат по своите политички прескокнувања и вечна желба да биде „прв во партијата“, повторно се јавува како гласноговорник на СДС, очигледно туркајќи ја агендата за сопствена промоција и позиционирање за иден лидер на партијата“, реагираат од ВМРО-ДПМНЕ.

„Додека го анализира ВМРО-ДПМНЕ и измислува анкети по нарачка на партиската кујна на Бихаќка, Жерновски молчи за вистинските скандали кои ја потресоа неговата партија – за јахтите на Заев и Филипче, за апетитите на нивниот олигархиски круг, за милионските тендери и провизии, за клиентелизмот кој ја потопи СДС.

Тој е дел од тажната група вечни политичари кои живеат удобен и комотен живот, а никој не може да се сети на ниту едно нивно конкретно дело или резултат. Политичка неконзистентност и лична амбиција тоа е неговиот единствен „капитал“.

Наместо да држи лекции за економија и политика, нека објасни како тој и неговите ментори ја доведоа Македонија до економски колапс, до историски одлив на млади луѓе и до ниво на корупција невидено во модерната историја.

Жерновски е симбол на политичари кои мислат само на својата фотелја, а секој негов напад врз ВМРО-ДПМНЕ е ништо повеќе од обид да се прикаже релевантен пред партиската база на СДС, во надеж дека еден ден ќе ја заземе лидерската позиција“, се вели во реакцијата на ВМРО-ДПМНЕ на ставовите на Жерновски.

„Рамковниот договор е важен документ кој стави крај на конфликтот од 2001 година, воспостави мир и отвори поглавје на соживот во градењето заедничка иднина“, велат од СДСМ.

„Освен зачувување на суверенитетот и на територијалниот интегритет, како и унитарниот карактер на државата, суштината на Рамковниот договор е издигнувањето над поделбите, меѓусебно помирување и отворање на вратите за заеднички напредок и еднакви можности на сите граѓани.

Сите политички чинители во земјава треба своите напори да ги вложат во политики коишто ги сплотуваат граѓаните, да работат заеднички за едно современо, демократско и интегрирано општество за сите“, соопшти СДСМ.

Министерот за здравство, Азир Алиу ја продолжи иницијативата „Мобилен кабинет“ со денешната посета на Општа болница Гостивар, каде информираше дека во континуитет се вложува во кадар и инфраструктурни проекти.

– Ние како Министерство дефинитивно работиме да се постигнат стандардите во инфраструктурата на здравствените установи да бидат компатибилни со европските стандарди. Состојбата на терен покажува дека има недостиг од медицинска опрема, слаба инфраструктура и персонал. Тоа е последица на лошата политика која се водела во овој ресор. Здравството е таков систем кој мора да предвидува, а не само да креира политики. Предвидувањата треба да бидат на рок од над десет години. Неопходни се и навремени планирања на кадарот, со оглед дека за обука лекар супспецијалист потребни се минимум 15 години, рече во изјава за медиуми министерот Алиу.

Болницата е зајакната со 12 приватни специјализанти и двајца специјалисти по гинекологија, а годинава на специјализација се пратени уште осум доктори.

Исто така, се очекува вработување на 37 лица во сите дејности, кои ќе бидат реализирани по локалните избори. Доколку во периодот на предизборие кога не се дозволени вработувања во јавниот сектор, се појави потреба, посочи министерот Алиу, Министерството ќе вложи напори и ќе бара начин за да не остане некоја институција без лекар или медицинска сестра.

Во рамки на посетата на Гостивар, министерот одржа средби со повеќе граѓани кои беа пријавени преку платформата „Отворен кабинет“, достапна на веб страницата на Министерството за здравство. Граѓаните на средбите споделија искуства со здравствените услуги на примарно и секундарно ниво на здравствена заштита, како и конструктивни предлози за унапредување на организациските аспекти на системот, соопшти МЗ.